সেয়া আছিল ২০২১ চনৰ ৮ ডিচেম্বৰ। হেলিকপ্টাৰ দুৰ্ঘটনাত দেশৰ প্ৰথমগৰাকী চিফ অফ ডিফেঞ্চ ষ্টাফ বিপিন ৰাৱটৰ মৃত্যু ঘটে। দুৰ্ঘটনাটোত তেওঁৰ পত্নী মধুলিকা ৰাৱটৰ লগতে ১১ গৰাকীৰ মৃত্যু হয়। অৱশেষত এক প্ৰতিবেদনত এই দুৰ্ঘটনাৰ কাৰণ কি সেই কথা পোহৰলৈ আহিল।
শেহতীয়াকৈ বায়ুসেনাই গঠন কৰা তদন্ত সমিতিখনে লোকসভাত এই প্ৰতিবেদন দাখিল কৰে। আৰু সেই প্ৰতিবেদনত স্পষ্ট দাবী কৰা হৈছে যে যান্ত্ৰিক বিজুতি বা সংঘাতৰ বাবে নহয়, দেশৰ প্ৰথমগৰাকী সেনাধ্যক্ষৰ মৃত্যু হৈছে মানুহৰ ভুলৰ বাবে।
প্ৰতিবেদনত সঠিকভাৱে কি দাবী কৰা হৈছে? ইয়াত কোৱা হৈছে যে ২০২১ চনৰ ৮ ডিচেম্বৰত এম আই-১৭ চপাৰখন দুৰ্ঘটনাগ্ৰস্ত হোৱাৰ আঁৰৰ মূল কাৰণ হঠাৎ বতৰৰ অৱনতি। যাৰ বাবে চপাৰখন মেঘৰ ভিতৰত প্ৰৱেশ কৰে। আৰু পাইলটসকলে সেই পৰিস্থিতিৰ কোনো আভাসেই নাপালে। তেওঁলোকৰ ‘স্থানকেন্দ্ৰিক বিভ্ৰান্তি’ৰ বাবে চপাৰখনে নিয়ন্ত্ৰণ হেৰুৱাই পেলায়।
বিমানৰ ডাটা ৰেকৰ্ডাৰ আৰু ককপিটৰ ভইচ ৰেকৰ্ডাৰ বিশ্লেষণ কৰাৰ উপৰিও প্ৰত্যক্ষদৰ্শীসকলকো সোধা-পোছা কৰা হয়। সকলো দিশ চোৱাচিতা কৰি এই দাবী প্রতিবেদনত উত্থাপন কৰা হৈছে৷ ইয়াৰ উপৰিও ২০১৭ চনৰ পৰা ২০২২ চনলৈ বায়ুসেনাত মুঠ ৩৪টা দুৰ্ঘটনা সংঘটিত হোৱা বুলি প্ৰতিবেদনত উল্লেখ কৰা হৈছে। ইয়াৰে ৯টা ২০২১-২২ বিত্তীয় বৰ্ষত সংঘটিত হৈছে। ইয়াৰ ভিতৰত বিপিন ৰাৱাটৰ চপাৰ দুৰ্ঘটনাও আছে।
উল্লেখ্য যে ২০২১ চনৰ ৮ ডিচেম্বৰত তামিলনাডুৰ কুনুৰত চপাৰ দুৰ্ঘটনাত দেশৰ প্ৰথমজন সেনা সৰ্বাধিনায়ক (চিডিএছ) বিপিন ৰাৱটৰ মৃত্যু হয়। ভাৰতীয় বায়ুসেনাৰ এম আই ছিৰিজৰ চপাৰখন চুলুৰত থকা সেনা চাউনীৰ পৰা ৱেলিংটন ঘাটিলৈ গৈ আছিল। কিন্তু বিমান যাত্ৰাৰ কিছু সময়ৰ পিছতে ভাঙি পৰে।
নীলগিৰিৰ ননজাপ্পান চথিৰামৰ কট্টেৰী পাৰ্কৰ অৰণ্যত দুৰ্ঘটনাগ্ৰস্ত হোৱা কপ্টাৰখনত জুই লাগে। ৰাৱটৰ কপ্টাৰ দুৰ্ঘটনাৰ পিছত বায়ুসেনাই বহু প্ৰশ্নৰ সন্মুখীন হ’বলগীয়া হৈছে। গাফিলতি বা আভ্যন্তৰীণ সংঘাতৰ তত্ত্ব উঠিলেও তাক নাকচ কৰি দিয়া হয়। অৱশেষত কমিটীৰ চূড়ান্ত প্রতিবেদন প্রকাশ কৰা হ’ল৷
