বেংগালুৰুৰ আই টি কৰ্মী অতুল সুভাষৰ দৰে দিল্লীৰ বেকাৰীৰ স্বত্বাধিকাৰী পুনীত খুৰানা (৪০)য়েও মৃত্যুৰ পূৰ্বে তেওঁৰ সকলো অভিযোগ ভিডিঅ’ ৰেকৰ্ডিং কৰিছিল। সেই ভিডিঅ’বোৰৰ পৰাই চাঞ্চল্যকৰ অভিযোগ পোহৰলৈ আহিছে। পত্নী আৰু শহুৰেকৰ ঘৰৰ মানসিক নিৰ্যাতনৰ কথাও ওলাই পৰিছে।
ইংৰাজী নৱবৰ্ষৰ নিশা দিল্লীৰ কল্যাণ বিহাৰ অঞ্চলৰ মডেল টাউনত থকা নিজ ঘৰত আত্মহত্যা কৰে খুৰানাই। অভিযোগ অনুসৰি পত্নী আৰু শহুৰেকৰ ঘৰে তেওঁক হাৰাশাস্তি কৰিছিল। পত্নীৰ দাবী মানিবলৈ গৈ তেওঁৰ উশাহ বন্ধ হৈ আছিল।
ভিডিঅ’টোত বেকাৰীৰ মালিকে পত্নী মনিকা পাহৱাৰ সৈতে মিউচুৱেল বিবাহ বিচ্ছেদৰ মাজেৰে পাৰ হোৱাৰ কথা উল্লেখ কৰিছে। ইয়াৰ মাজতে মনিকা আৰু তেওঁৰ পৰিয়ালৰ লোকে বিভিন্ন ধৰণৰ ভাবুকি দি আছিল।
যদিও দুয়োপক্ষই কিছুমান চৰ্তত বিবাহ বিচ্ছেদৰ বাবে আবেদন দাখিল কৰিছিল, খুৰানাই অভিযোগ কৰিছে, মনিকা আৰু তেওঁৰ পৰিয়ালৰ লোকে খুৰানাৰ পৰা অতিৰিক্ত ধন আৰু অন্যান্য বস্তু দাবী কৰিছিল। যিটো তেওঁৰ বাবে দিয়া সম্ভৱ নাছিল। অতিৰিক্ত ১০ লাখ টকা দাবী কৰা হৈছিল যিটো খুৰানাই ইয়াক দিয়াটো কাৰ্যতঃ অসম্ভৱ বুলি কোৱা শুনা গৈছিল । আৰু ঠিক এই কাৰণেই তেওঁ আত্মহত্যাৰ পথ বাছি লৈছে বুলি তেওঁ ভিডিঅ’টোত কয়।
তেওঁ কৈছে, ‘মোৰ পত্নী আৰু শহুৰৰ পৰিয়ালৰ লোকে মোক অমানৱীয় নিৰ্যাতন চলাই আছে যাৰ বাবে মই আত্মহত্যাৰ সিদ্ধান্ত লৈছো। কেইবাটাও চৰ্তত বিবাহ বিচ্ছেদ দাখিল কৰা হয়। যিটো মই ১৮০ দিনৰ ভিতৰত পূৰণ কৰিব লাগিব। কিন্তু পত্নী আৰু শহুৰৰ ঘৰৰ লোক সকলে নতুন নতুন চৰ্ত দিবলৈ ধৰিলে। মোক ১০ লাখ টকা বিচৰা হৈছিল। মোৰ সেই শক্তি নাই। ঘৰৰ মানুহৰ পৰাও বিচাৰিব নোৱাৰো কাৰণ তেওঁলোকে ইতিমধ্যে বহুত টকা দিছে।’
ইপিনে, পুনীত খুৰানাৰ কৰুণ আত্মহত্যাৰ পিছত পোহৰলৈ আহিছে নতুন চিচিটিভি ফুটেজ। য’ত পত্নীৰ লগত কাজিয়া হোৱা দেখা গৈছে। খালী কোঠা এটাত তেওঁ আৰু তেওঁৰ পত্নীয়ে উচ্চস্বৰত কথা পাতি আছে। ইজনে সিজনৰ মুখামুখি বহি থকাৰ সময়তে কঠোৰ ভাষাত শব্দৰ আদান-প্ৰদান চলি আছে। য’ত মনিকাই কোৱা শুনা যায়, মই তোমাক ১০ মিনিট দিছো, মাঠা ঠাণ্ডা কৰি বহা। তুমি কি কৰিব বিচাৰা কোৱা, মোক স্পষ্ট আৰু পোনপটীয়াকৈ উত্তৰ দিয়া।
তৰ্কাতৰ্কিৰ মাজতে মনিকা পাহোৱাই কোৱা শুনা যায় যে এনেদৰে চলি থকাৰ বাবে তেওঁৰ জীৱনটোও ধ্বংস হৈ আছে। ইয়াৰ পিছতে পুনীতৰ আত্মীয়স্বজনৰ ঠিকনা আৰু ফোন নম্বৰ তেওঁৰ হাতত আছে বুলি ভাবুকি দিয়ে। তেওঁ সকলোকে ক’ব কি হৈছে। ইয়াৰ প্ৰত্যুত্তৰত দিল্লীৰ ‘ফৰ গডছ কেক’ নামৰ বেকাৰীৰ স্বত্বাধিকাৰী খুৰাণাই কয়, যিকোনো এদিন। আন এটা ভিডিঅ’ত পুনীতে ঘৰৰ বাবে শহুৰেকক ২ কোটি টকা ট্ৰেন্সফাৰ কৰাৰ কথা কোৱা দেখা গৈছে।
খুৰানা পৰিয়ালৰ দাবী যে তেওঁলোকৰ হাতত এনে অসংখ্য ভিডিঅ’ আৰু অডিঅ’ ক্লিপ আছে। আৰক্ষীৰ হাতত গতাই দি তেওঁলোকে অভিযোগৰ সপক্ষে যুক্তি দিব পাৰে। তেওঁলোকে পুত্ৰ বোৱাৰী আৰু শহুৰেকৰ ঘৰৰ বিৰুদ্ধে এজাহাৰ দাখিল কৰি ঘটনাৰ ন্যায় বিচাৰিছে। আৰক্ষীয়ে খুৰানাৰ ফোনটো জিম্মাত লৈ তদন্ত আৰম্ভ কৰিছে। পুনীতৰ মাকে দাবী কৰিছে, ‘তেওঁলোকৰ পৰিয়ালে মোৰ ল’ৰাটোক বিভিন্ন ধৰণে মানসিক নিৰ্যাতন কৰিছিল।’
পুনীতৰ ভনীয়েকে অভিযোগ কৰে, ‘মণিকা আৰু তেওঁৰ ভনীয়েকৰ লগতে মাক-দেউতাকেও মানসিকভাৱে অত্যাচাৰ চলাইছিল। সেই মহিলাগৰাকীয়ে পুনীতৰ ছ’চিয়েল মিডিয়া প্ৰফাইল হেক কৰি ব্লেকমেইল কৰিছিল।’
সমগ্ৰ ঘটনাৰ তদন্ত অব্যাহত আছে। ইফালে পুনীতে ৰাখি থৈ যোৱা ভিডিঅ’ই তদন্তৰ তথ্য গোটোৱাত সহায় কৰিব।
