বৃহস্পতিবাৰে (২ জানুৱাৰী) এক গুৰুত্বপূৰ্ণ সিদ্ধান্তত উচ্চতম ন্যায়ালয়ে কয় যে সম্পত্তিৰ অধিকাৰ এটা মানৱ অধিকাৰ আৰু সাংবিধানিক অধিকাৰ আৰু আইন অনুসৰি পৰ্যাপ্ত ক্ষতিপূৰণ নিদিয়াকৈ এজন ব্যক্তিক সম্পত্তিৰ পৰা বঞ্চিত কৰিব নোৱাৰি।
ইণ্ডিয়ান এক্সপ্ৰেছৰ খবৰ অনুসৰি ন্যায়াধীশ বি আৰ গাভাই আৰু ন্যায়াধীশ কে ভি বিশ্বনাথনৰ বিচাৰপীঠে কয় যে সংবিধান (৪৪ সংশোধনী) আইন, ১৯৭৮ৰ বাবে সম্পত্তিৰ অধিকাৰ এতিয়া মৌলিক অধিকাৰ নহয় যদিও বৰ্তমান ই মানৱ অধিকাৰ হৈয়েই আছে আৰু সংবিধানৰ অনুচ্ছেদৰ দ্বাৰা সুৰক্ষিত ই ধাৰা ৩০০-এৰ অধীনত সাংবিধানিক অধিকাৰ। সংবিধানৰ ৩০০-ক অনুচ্ছেদত উল্লেখ আছে যে কোনো ব্যক্তিক আইনৰ কৰ্তৃত্ব অবিহনে নিজৰ সম্পত্তিৰ পৰা বঞ্চিত কৰিব নোৱাৰিব।
জানিব পৰা মতে, বেংগালুৰু-মহীছুৰু আন্তঃগাঁথনি কৰিডৰ প্ৰকল্প (বিএমআইচিপি)ৰ বাবে ভূমি অধিগ্ৰহণৰ সৈতে জড়িত গোচৰত ২০২২ চনৰ নৱেম্বৰ মাহত কৰ্ণাটক উচ্চ ন্যায়ালয়ৰ সিদ্ধান্তক প্ৰত্যাহ্বান জনাই বৃহস্পতিবাৰে উচ্চতম ন্যায়ালয়ে এই সিদ্ধান্ত প্ৰদান কৰে।
মন কৰিবলগীয়া যে প্ৰকল্পটোৰ বাবে মাটি অধিগ্ৰহণৰ বাবে ২০০৩ চনৰ জানুৱাৰী মাহত কৰ্ণাটক ঔদ্যোগিক এলেকা উন্নয়ন ব’ৰ্ডে (কেআইএডিবি) প্ৰাৰম্ভিক অধিসূচনা জাৰি কৰিছিল আৰু ২০০৫ চনৰ নৱেম্বৰ মাহত আপীলকাৰীসকলৰ মাটিৰ দখল লোৱা হৈছিল। এই গোচৰত একাংশ মাটিৰ মালিক আবেদনকাৰী আছিল, যিয়ে কয় যে বহু বছৰ ধৰি মাটি অধিগ্ৰহণৰ পিছতো তেওঁলোকক এতিয়াও ক্ষতিপূৰণ দিয়া হোৱা নাই।
উল্লেখযোগ্য যে এই গোচৰত উচ্চতম ন্যায়ালয়ে সংবিধানৰ ১৪২ নং অনুচ্ছেদৰ অধীনত থকা ক্ষমতা ব্যৱহাৰ কৰি ২০১৯ চনৰ ২২ এপ্ৰিলত প্ৰচলিত বজাৰ মূল্যৰ ভিত্তিত আপীলকাৰীসকলক দিবলগীয়া ক্ষতিপূৰণ নিৰ্ধাৰণ কৰিবলৈ এছ এল এ অ’ক নিৰ্দেশ দিছিল। আপীলকাৰীসকলেও ভূমি অধিগ্ৰহণ আইন, ১৮৯৪ৰ অধীনত তেওঁলোকৰ বাবে উপলব্ধ সকলো বিধিগত সুবিধাৰ অধিকাৰী হ’ব।
