নাগৰিকত্ব সংশোধনী বিধেয়ক উত্থাপনেৰে কেন্দ্ৰীয় চৰকাৰে ৰাজ্যখনত ধৰ্মৰ নামত বিদেশী লোকক সংস্থাপন কৰাৰ অভিসন্ধিৰ বিৰুদ্ধে ওদালগুৰি জিলাতো প্ৰতিবাদী কাৰ্যসূচীয়ে তীব্ৰ ৰূপ ধাৰণ কৰিছে। দেওবাৰে ওদালগুৰি অগপ জিলা সমিতিৰ উদ্যোগত টংলাত গণ-স্বাক্ষৰ কাৰ্যসূচী ৰূপায়ণ কৰা হয়।
আজিৰ এই গণস্বাক্ষৰ কাৰ্যসূচীত সাহিত্যিক, সাংবাদিক, নাগৰিক সমাজৰ লগতে শিল্পী সমাজৰ বিভিন্ন লোকে অংশগ্ৰহণ কৰি নাগিৰকত্ব বিধেয়কখনৰ বিৰুদ্ধে প্ৰতিবাদ সাব্যস্ত কৰে। অংশগ্ৰহণকাৰীসকলে কয় যে কেন্দ্ৰীয় চৰকাৰে ধৰ্মৰ ভিত্তিত বিদেশী নাগৰিকক ভাৰতত সংস্থাপন দিয়াৰ যি যোজা চলাইছে সেয়া হ’লে ভাৰতৰ সংবিধানক সম্পূৰ্ণৰূপে উলংঘন কৰা হ’ব।
আনহাতে অগপৰ নেতা-কৰ্মীসকলে এই বিধেয়কখন গৃহীত হ’লে অসমৰ ভাষা-সংস্কৃতিত বিৰূপ প্ৰভাৱ পৰিব বুলি মন্তব্য কৰে।
‘প্ৰস্তাৱিত এই বিধেয়কখনে অনুসূচিত জাতি, জনজাতিৰ লগতে অসমৰ থলুৱা লোকসকললৈ ভাবুকি কঢ়িয়াই আনিব। আৰু এই বিধেয়কখন গৃহীত হ’লে অসমত থলুৱা লোকসকল সংখ্যালঘুত পৰিণত হ’ব’। ওদালগুৰি জিলা অগপৰ সভাপতি যতিন কুমাৰ ডেকাই এইদৰে মন্তব্য কৰা দেখা যায়।
ওদালগুৰি জিলা অগপৰ উদ্যোগত চলা গণ স্বাক্ষৰ কাৰ্যসূচীত শিক্ষাবিদ বিনয় কুমাৰ মেধি, বিশিষ্ট ব্যক্তি তথা অৱসৰপ্ৰাপ্ত শিক্ষক নবিন চন্দ্ৰ বেজবৰুৱা, ওদালগুৰি জিলা অগপৰ যুটীয়া সম্পাদকদ্বয় প্ৰমোদ হাজৰিকা আৰু প্ৰদীপ পাঠকৰ লগতে বহুতো লোক উপস্থিত থাকে।
আজিৰ এই কাৰ্যসূচীত ওদালগুৰি জিলাৰ বিভিন্ন অঞ্চলৰ প্ৰায় চাৰি হেজাৰ লোকে বিধেয়কখনৰ বিৰোধীতাৰে স্বাক্ষৰ কৰে। ইফালে এই স্বাক্ষৰ সম্বলিত পত্ৰখন ওদালগুৰি জিলা অগপ সমিতিয়ে যুটীয়া সংসদীয় সমিতিলৈ প্ৰেৰণ কৰিব বুলি জানিবলৈ দিয়ে।
