ৰাজস্থানৰ কোটাত সংঘটিত হ’ল আন এক আত্মহত্যাৰ ঘটনা। এইবাৰ এগৰাকী ১৮ বছৰীয়া ছাত্ৰই চৰম পন্থা বাছি লয়। NEET ৰ বাবে প্ৰস্তুতি চলাবলৈ তেওঁ ওড়িশাৰ পৰা কোটালৈ আহিছিল। শুকুৰবাৰে পি জি কক্ষৰ পৰা উদ্ধাৰ কৰে মৃতদেহটো।
ৰাষ্ট্ৰীয় যোগ্যতা সহ প্ৰৱেশ পৰীক্ষা, চমুকৈ NEETত প্ৰতি বছৰে হাজাৰ হাজাৰ ছাত্ৰ-ছাত্ৰীয়ে ৰাজস্থানৰ কোটালৈ গৈ ইয়াৰ বাবে প্ৰস্তুতি চলায়। প্ৰতি বছৰে কোটাৰ পৰা একাধিক আত্মহত্যাৰ খবৰ পোৱা যায়। যোৱা ১৭ দিনত এই বিষয়ক লৈ আত্মহত্যা কৰিলে তৃতীয়জন ছাত্ৰই।
শুকুৰবাৰে ঘটনা সন্দৰ্ভত তথ্য লাভ কৰাৰ পাছতে আৰক্ষীয়ে ততাতৈয়াকৈ অঞ্চলটোত উপস্থিত হয়। পি জি কৰ্তৃপক্ষই এই খবৰ দিয়ে আৰক্ষীক। ছাত্ৰজনক ওলমি থকা অৱস্থাত উদ্ধাৰ কৰে। ওড়িশাত থকা তেওঁৰ পৰিয়ালক খবৰ দিয়া হৈছে। তদন্তকাৰী বিষয়াসকলে এই আত্মহত্যাৰ সঠিক কাৰণৰ তদন্ত অব্যাহত ৰাখিছে।
ইয়াৰ পূৰ্বে ৮ জানুৱাৰীত কোটাত পিজিত আত্মহত্যা কৰিছিল জেইইৰ এগৰাকী ২০ বছৰীয়া ছাত্ৰই। জনা যায় যে তেওঁ মধ্যপ্ৰদেশৰ গুণাৰ বাসিন্দা আছিল। ২০২৩ চনৰ মে’ মাহৰ পৰা কোটাত থকা তেওঁ প্ৰস্তুতি চলাইছিল।
তাৰ ঠিক আগদিনা ৭ জানুৱাৰীত হাৰিয়ানাৰ ১৯ বছৰীয়া যুৱক নীৰজ নামৰ এজন ছাত্ৰই আত্মহত্যা কৰে। তেওঁৰ হোষ্টেলৰ কোঠাত উদ্ধাৰ হয় তেওঁৰ মৃতদেহ। কিন্তু স্থানীয় প্ৰশাসনে দাবী কৰিছে যে বিগত কেইবাবছৰৰ তুলনাত ২০২৪ চনত আত্মহত্যাৰ সংখ্যা যথেষ্ট হ্ৰাস পাইছে। ২০২৩ চনত ২৯ জন লোকে আত্মহত্যা কৰাৰ বিপৰীতে ২০২৪ চনত সেই সংখ্যা ১৯ লৈ বৃদ্ধি পায়। এই সংখ্যা ক্ৰমান্বয়ে হ্ৰাস পাব বুলি তেওঁলোক আশাবাদী।
ইফালে প্ৰশাসনে কোচিং চেণ্টাৰক বিভিন্ন গাইডলাইন দিছে। লগতে সময়ে সময়ে পৰীক্ষা কৰা হৈছে যে কোচিং চেণ্টাৰসমূহে সেইবোৰ মানি চলি আছে নে নাই।
