ট্ৰেফিক জামৰ ক্ষেত্ৰত ভাৰতৰ ভিতৰত শীৰ্ষত আছে কলিকতা। ইয়াৰ উপৰিও বিশ্বৰ ভিতৰতে ট্ৰেফিক জামৰ ক্ষেত্ৰত দ্বিতীয় স্থানত আছে কলিকতা চহৰ। ‘টমটম ট্ৰেফিক ইনডেক্স’ অনুসৰি কলিকতা চহৰত প্ৰতি ১০ কিলোমিটাৰ যাবলৈ গড়ে ৩৪ মিনিটতকৈ অধিক সময় লাগে। কলকাতাৰ পিছত এই তালিকাত আছে বেংগালুৰু। বেংগালুৰু হৈছে দেশৰ ভিতৰতে দ্বিতীয় ট্ৰেফিক জাম হোৱা চহৰ।
উল্লেখ্য যে দেশখন যিমানেই উন্নয়নশীল হৈছে সিমানেই বাঢ়িছে ট্ৰেফিক জাম। টমটম ট্ৰেফিক সূচকাং অনুসৰি কলম্বিয়াৰ বাৰাংকুইলা চহৰখনত ১০ কিলোমিটাৰ যাত্ৰা কৰিবলৈ বিশ্বৰ ভিতৰতে আটাইতকৈ বেছি সময় লাগে। তাত গড়ে ৩৬ মিনিট ৬ ছেকেণ্ড সময় লাগে ১০ কিলোমিটাৰ পথ অতিক্ৰম কৰিবলৈ।
এই ক্ষেত্ৰত বিশ্বৰ তৃতীয় স্থানত থকা বেংগালুৰুত ১০ কিলোমিটাৰ যাত্ৰা কৰিবলৈ গড়ে ৩৪ মিনিট ১০ ছেকেণ্ড সময় লাগে।
এই তালিকাৰ চতুৰ্থ স্থানত আছে পুনে। পুনত একে দূৰত্ব অতিক্ৰম কৰিবলৈ ৩৩ মিনিট ২২ ছেকেণ্ড সময় লাগে।
এই তালিকাত পঞ্চম স্থানত আছে লণ্ডন। লণ্ডনত যাতায়ত কৰা লোকসকলেও যান-জঁটৰ সন্মুখীন হৈছে। তাত ১০ কিলোমিটাৰ যাত্ৰা কৰিবলৈ গড়ে ৩৩ মিনিট ১৭ ছেকেণ্ড সময় লাগে।
ষষ্ঠ স্থানত আছে জাপানৰ অন্যতম গুৰুত্বপূৰ্ণ চহৰ কিয়’ট’। তাত ১০ কিলোমিটাৰ যাত্ৰা কৰিবলৈ গড়ে ৩৩ মিনিট ১৬ ছেকেণ্ড সময় লাগে।
ভাৰতৰ ৰাজধানী দিল্লী বিশ্বৰ ভিতৰতে ১২২ নম্বৰ স্থানত আছে। ইয়াত ১০ কিলোমিটাৰ যাত্ৰা কৰিবলৈ গড়ে ২৩ মিনিট ২৪ ছেকেণ্ড সময় লাগে।
আনহাতে, কম যান-জঁট থকা চহৰৰ তালিকাৰ শীৰ্ষ তিনিখন চহৰৰ আটাইকেইখনেই আমেৰিকাৰ। তালিকাৰ শীৰ্ষত আছে থাউজেণ্ড অকছ। এই চহৰত ১০ কিলোমিটাৰ যাত্ৰা কৰিবলৈ গড়ে ৮ মিনিট ৩৬ ছেকেণ্ড সময় লাগে। দ্বিতীয় স্থানত আছে লিটিল ৰক। য’ত ১০ কিলোমিটাৰ যাত্ৰা কৰিবলৈ ৯ মিনিট ২০ ছেকেণ্ড সময় লাগে। তৃতীয় স্থানত আছে মেছা। ইয়াত ৯ মিনিট ৩৯ ছেকেণ্ড সময় লাগে। চতুৰ্থ স্থানত আছে নেদাৰলেণ্ডৰ আমাৰ্ছফোৰ্ট। ইয়াত ১০ কিলোমিটাৰ অতিক্ৰম কৰিবলৈ গড়ে ৯ মিনিট ৪৮ ছেকেণ্ড সময় লাগে।
মন কৰিবলগীয়া যে এই সমীক্ষা ৬খন মহাদেশৰ ৬২খন দেশৰ ৫০০খন চহৰত কৰা হৈছিল।
