চুবুৰীয়া যুৱকৰ কামনাৰ বলি এগৰাকী ৩০ বছৰীয়া মহিলা। ঘৰত প্ৰৱেশ কৰি তেওঁক ধৰ্ষণ কৰাৰ অভিযোগ উত্থাপন হৈছে ২৮ বছৰীয়া যুৱকজনৰ বিৰুদ্ধে। কেৱল সেয়াই নহয়, দুই সন্তানৰ সন্মুখতে মহিলাগৰাকীৰ গাৰ ওপৰত এচিড ঢালি দিয়ে যুৱকজনে।
বৰ্তমান যুৱতীগৰাকী সংকটজনক অৱস্থাত চিকিৎসালয়ত ভৰ্তি হৈ আছে। আনহাতে, অভিযুক্ত যুৱকজন পলাতক। এই মাৰাত্মক ঘটনা সংঘটিত হৈছে এইখন অসমতে।
আৰক্ষীৰ সূত্ৰ অনুসৰি যোৱা ২২ জানুৱাৰীত কাছাৰ জিলাৰ ধলাই আৰক্ষী থানাৰ অন্তৰ্গত অঞ্চলৰ বাসি ন্দা যুৱতীগৰাকীৰ ঘৰত প্ৰৱেশ কৰি চুবুৰীৰ এজন যুৱকে তেওঁক ধৰ্ষণ কৰে। তাৰ পিছত তেওঁৰ শৰীৰত এচিড ঢালি পলায়ন কৰে।
সেই সময়ত যুৱতীগৰাকীৰ দুটা সন্তানো ঘৰত উপস্থিত আছিল। যুৱকজনে তেওঁলোকৰ সন্মুখতে সংঘটিত কৰে এই ভয়াবহ ঘটনা। যুৱতীগৰাকীৰ স্বামী ঘৰত নথকাৰ সুবিধা লৈ যুৱকজনে এই অপৰাধ সংঘটিত কৰে। যুৱকজন পেচাত এগৰাকী ড্ৰাইভাৰ বুলি জানিব পৰা গৈছে।
কেইঘণ্টামান পিছত যুৱতীগৰাকীৰ স্বামী ঘৰলৈ উভতি আহি পত্নীক হাত ভৰি, মুখ বন্ধা অৱস্থাত অৰ্দ্ধ উলংগ হৈ মাটিত পৰি থকা দেখে। তেওঁৰ শৰীৰৰ একাধিক অংশ পুৰি গৈছে। তেওঁ দেখি বুজিব পাৰিছিল যে এচিডৰ দৰে কিবা ঢালি দিয়া হৈছে। লগে লগে ব্যক্তিজনে তেওঁক শিলচৰ চিকিৎসা মহাবিদ্যালয় আৰু হাস্পাতাললৈ লৈ যায়। জানিব পৰা মতে এই মুহূৰ্তত যুৱতীগৰাকীৰ শাৰীৰিক অৱস্থা সংকটমুক্ত নহয়।
যুৱতীগৰাকীৰ স্বামীয়ে আৰক্ষীৰ ওচৰত গোচৰ ৰুজু কৰে। আৰক্ষীয়ে পলাতক যুৱকজনক বিচাৰি অভিযান চলাইছে। অৱশ্যে মহিলাগৰাকীক প্ৰকৃততে ধৰ্ষণ কৰা হৈছে নে নাই সেই সন্দৰ্ভত আৰক্ষীৰ মাজত বিভ্ৰান্তিৰ সৃষ্টি হৈছে। তেওঁলোকে অনুমান কৰে যে তেওঁক প্ৰহাৰ কৰাৰ পিছত হয়তো তেওঁৰ ওপৰত এচিড ঢালি দিয়া হৈছিল। এতিয়া যুৱতীগৰাকীৰ মেডিকেল ৰিপৰ্টৰ বাবে অপেক্ষা কৰা হৈছে।
আৰক্ষীয়ে জানিবলৈ চেষ্টা চলাইছে যে যুৱকজনে কেৱল যৌন লালসাৰ বাবেই এই কাণ্ড সংঘটিত কৰিছে নে ইয়াৰ আঁৰত আন কিবা কাৰণ আছে?
