২৭ বছৰৰ মূৰত ৰাষ্ট্ৰীয় ৰাজধানীলৈ উভতি আহিল বিজেপি। ভাৰতীয় জনতা পাৰ্টিয়ে শেষবাৰৰ বাবে দিল্লীত ক্ষমতা দখল কৰিছিল ১৯৯৮ চনত। শেষৰগৰাকী মুখ্যমন্ত্ৰী আছিল সুষমা স্বৰাজ। তাৰ পাছত কংগ্ৰেছে ক্ষমতা দখল কৰিলে। ২০১৩ চনত প্ৰথমবাৰৰ বাবে আম আদমি পাৰ্টি শাসনলৈ আহিছিল। ৰাজধানীৰ ৰাইজে ‘মাফলাৰ মেন’ কেজৰিৱালক ৰাজ্যৰ দায়িত্ব অৰ্পণ কৰে। কিন্তু তেওঁৰ দলটোৱে এইবাৰৰ বিধানসভা নিৰ্বাচনত সেই আস্থা হেৰুৱাই পেলাইছে। বহুদিনৰ মূৰত গেৰুৱা শিবিৰত এক বৃহৎ সুখৰ অনুভূতি। নৰেন্দ্ৰ মোদীয়ে কয় যে মানুহে এই প্ৰতিকূলতাক জয় কৰিছে।
আপৰ প্ৰতি মোদীৰ কটুক্তি নতুন নহয়। ইয়াৰ পূৰ্বে তেওঁ দিল্লীত অনুষ্ঠিত এখন বৈঠকৰ পৰা অৰবিন্দ কেজৰিৱালৰ আম আদমী পাৰ্টিক ‘আপদ’ বুলি অভিহিত কৰিছিল। একে ধাৰাতে শনিবাৰে পুনৰবাৰ বিজেপিৰ মুখ্য কাৰ্যালয়লৈ গৈ দিল্লীৰ জনসাধাৰণৰ লগতে দলৰ কৰ্মী-সমৰ্থকসকলৰ প্ৰতি মৰম প্ৰকাশ কৰে।
শনিবাৰে বিজেপিৰ মুখ্য কাৰ্যালয়ৰ পৰা তেওঁ কয়, “দিল্লীৰ জনসাধাৰণে আমাৰ ওপৰত আস্থা ৰাখিছে। এইবাৰ ৰাজ্যৰ ডাবল ইঞ্জিন চৰকাৰে সেই ঋণ উন্নয়ন আৰু বৃদ্ধিৰ জৰিয়তে জনসাধাৰণক পৰিশোধ কৰিব। আজিৰ জয় সৰু জয় নহয়, ই ঐতিহাসিক। আজিৰ জয়ে ‘আপদ‘ক খেদি পঠিয়াইছে। দিল্লীক আপদৰ পৰা মুক্ত কৰা হৈছে, যিটো ইস্তাহাৰত স্পষ্ট হৈ পৰিছে।”
