অধিনায়ক ৰোহিত শৰ্মাৰ এনে প্ৰত্যাৱৰ্তন সঁচাকৈয়ে অনুৰাগীৰ বাবে এক সপোনৰ ক্ষণ আছিল। ক্ৰিকেট জগতে প্ৰত্যক্ষ কৰিলে ৰোহিত শৰ্মাৰ হিট শ্ব’। ফলত দ্বিতীয়খন এদিনীয়াতে উৰুৱাই দিলে ইংলেণ্ডক। টীম ইণ্ডিয়াই ৪ উইকেটত জয়লাভ কৰি শৃংখলা দখল কৰে। ইয়াৰ লগতে চেম্পিয়নছ ট্ৰফীৰ প্ৰস্তুতিও ভালদৰেই চলালে।
কটকত ইংলেণ্ডৰ অধিনায়ক জোছ বাটলাৰে টছত জয়লাভ কৰি প্ৰথমে বেটিং কৰাৰ সিদ্ধান্ত লয়। ইংলেণ্ডৰ আৰম্ভণি বেয়া নাছিল। ফিল ছল্ট আৰু বেন ডাকেটে আক্ৰমণাত্মক আৰম্ভণি কৰিছিল। এই যুটিৰ পাৰ্টনাৰশ্বিপত ৮১ ৰান সংযোজন হয়। এদিনীয়াত অভিষেক ঘটোৱা বৰুণ চক্ৰৱৰ্তীয়ে সেই যুটী ভংগ কৰে।
আনহাতে, ৰবীন্দ্ৰ জাদেজাই ডাকেটৰ ধুমুহা স্তব্ধ কৰি দিলে। ইংৰাজ অ’পেনাৰগৰাকীয়ে ৫৬টা বলত ৬৫ ৰান সংগ্ৰহ কৰি উভতি আহে। জাডেজাৰ সৌজন্যত তাৰ পৰাই ৰানৰ গতি অলপ লেহেমীয়া হ’ল। তেওঁ ডাকেট, ৰুট আৰু জেমী অভাৰটনৰ উইকেট দখল কৰে।
ইফালে, জো ৰুটে ৬৯ ৰান সংগ্ৰহ কৰি ইংলেণ্ডৰ ইনিংছৰ সুদৃঢ় ভেটি গঢ়ি তোলে। হাৰ্দিক পাণ্ডিয়াই বাটলাৰক ঘূৰাই পঠিয়ায় (৩৪)। অন্তিম মুহূৰ্তত জিলিকি উঠিল লিয়াম লিভিংষ্টনে। ৩২টা বলত ৪১ ৰান সংগ্ৰহ কৰি শেষৰ অভাৰত তেওঁ ৰান আউট হয়। শেষত ইংলেণ্ডৰ ইনিংছ ৩০৪ ৰানত সমাপ্ত হয়।
তাৰ পিছত আৰম্ভ হ’ল ৰোহিতৰ শ্ব’। তেওঁৰ অফ ফৰ্ম ক্ৰিকেট মহলত বহুদিনৰ পৰা চৰ্চাৰ বিষয় হৈ আহিছে। সেই সকলোবোৰৰ উত্তৰ দিলে তেওঁৰ শতকীয় ইনিংছটোৱে। মাত্ৰ ৩০টা বলতে অৰ্ধশতক কৰে। তেতিয়ালৈকে তেওঁ ৪টা চাৰি আৰু ৪টা ছয় মাৰে। যেন এদিনীয়া নহয়, টি-২০ খেলিছে।
ফ্লাডলাইট নুমাই যোৱাৰ লগে লগে খেলখন কিছু সময় বন্ধ কৰি দিয়া হ’ল। কিন্তু ৰোহিতৰ বিস্ফোৰণ বন্ধ নহ’ল। গোটেই ষ্টেডিয়ামতে মোবাইল ফোনৰ ফ্লেছ চলি আছিল। তাৰমাজতে আহিল ৰোহিতৰ ৩২ সংখ্যক এদিনীয়া শতক। আৰু সেইটোও ছয় মাৰি সম্পূৰ্ণ কৰিলে। শেষত হিটমেনৰ ইনিংছ শেষ হয় ৯০টা বলত ১১৯ ৰানত। তেওঁ ১২টা চাৰি আৰু ৭টা ছয় মাৰে।
আনহাতে, সহ-অধিনায়ক শুভমন গিলে নিজৰ দুৰ্দান্ত ফৰ্ম অব্যাহত ৰাখিছে। তেওঁ ৫২টা বলত ৬০ ৰান সংগ্ৰহ কৰে। কিন্তু বিৰাট কোহলীৰ বেয়া সময় অব্যাহত আছে। তেওঁ আদিল ৰছিদৰ বলত ৫ ৰানত পেভলিয়নলৈ উভতি আহে।
ৰোহিত আউট হোৱাৰ পাছত অক্ষৰ পেটেলে লাহে লাহে লক্ষ্যৰ ফালে আগবাঢ়ে। শ্ৰেয়াছ আয়াৰৰ সৈতে হোৱা ভুল বুজাবুজিৰ বাবে ৪৪ ৰান সংগ্ৰহ কৰি ৰান আউট হৈ যায় আয়াৰ। কে এল ৰাহুলে (১০) ৰান নাপালে। হাৰ্দিক পাণ্ডিয়াই (১০) ভাল আৰম্ভণি কৰিছিল যদিও শীঘ্ৰেই আউট হৈ যায়। অৱশ্যে মেচখনত জয়ী হোৱাত অসুবিধা হোৱা নাছিল। ৰবীন্দ্ৰ জাদেজাৰ সৈতে পাৰ্টনাৰশ্বিপ গঢ়ি ভাৰতক জয়ী কৰি খেলপথাৰ এৰিলে অক্ষৰে। তিনিখন খেলৰ শৃংখলাটোত ২-০ ব্যৱধানত জয়লাভ কৰে টিম ইণ্ডিয়াই।
সংক্ষিপ্ত স্কোৰঃ
ইংলেণ্ড: ৩০৪/১০ (ৰুট ৬৯, ডাকেট ৬৫, জাডেজা ৩২/৩)
ভাৰতঃ ৩০৮/৬ (ৰোহিত ১১৯, শুভমন ৬০)
ভাৰতে ৪ উইকেটত জয়লাভ কৰে।
ভাৰতে ২-০ ব্যৱধানত জয়লাভ কৰে এই শৃংখলা।
