হিমন্ত বিশ্ব শৰ্মা কংগ্ৰেছত থকা হ’লে এদিন মুখ্যমন্ত্ৰী হ’লহেঁতেন।— এই মন্তব্য ৰাজ্যৰ প্ৰাক্তন মুখ্যমন্ত্ৰী তৰুণ গগৈৰ।
আজি কইনাধৰাত এখন সংবাদ মেল যোগে বিজেপি চৰকাৰক তীব্ৰ সমালোচনা কৰি গগৈয়ে কয়— বিজেপি চৰকাৰে বহু আশ্বাস দি ক্ষমতালৈ আহিছিল।কিন্তু সেই আশ্বাস বুমেৰাঙত পৰিণত হৈছে। আমাক তেওঁলোকে সমালোচনা কৰিছিল। কিন্তু আমি এতিয়া মোদীক সমালোচনা কৰিব নোৱাৰো। এতিয়া মোদীক সমালোচনা কৰিলে ভাৰতৰ বিৰূদ্ধে কোৱা হয়।
আনহাতে বিজেপিয়ে কেন্দ্ৰত চাৰিটা বৰ্ষ পাৰ কৰা সন্দৰ্ভত গগৈয়ে কয়— চাৰি বছৰৰ পাছত বিজেপিয়ে যি ৰিপ’ৰ্ট কাৰ্ড দিছে সেইখন ভুৱা।তেওঁলোকে বিদেশীক খেদিম বুলি কৈছিল কিন্তু কেইজন বিদেশী খেদিলে। প্ৰধানমন্ত্ৰীয়ে বাংলাদেশ ভ্ৰমণ কৰোতে বাংলাদেশত হিন্দুসকলৰ ওপৰত অত্যাচাৰ চলাৰ কথা কিয় উত্থাপন কৰিব নোৱাৰিলে।
আনহাতে মুখ্যমন্ত্ৰী সোণোৱালক লক্ষ্য কৰি গগৈয়ে কয়— সৰ্বানন্দই পৰিৱৰ্তনৰ কথা কৈছিল, পৰিৱৰ্তন কি হ’ল? এতিয়া অসমত শান্তি নাই, কেৱল আন্দোলন আৰু আন্দোলন। কিন্তু তেওঁলোকে অসমৰ ৰাইজৰ কথা ভ্ৰক্ষেপ কৰা নাই।
অসম চৰকাৰে অসমৰ মানুহৰ দাবী কেন্দ্ৰক বুজাব পাৰিব লাগিছিল।অসমৰ মানুহে ইন্দিৰা গান্ধীক সমালোচনা কৰে।কিন্তু অসম আন্দোলনৰ সময়ত কেন্দ্ৰীয় চৰকাৰৰ মন্ত্ৰী আহি আছুৰ লগত আলোচনা কৰিছিল। কিন্তু সেই কাম বিজেপিয়ে এতিয়া কৰিব পৰা নাই।
আনহাতে মন্ত্ৰী হিমন্তক লৈ বক্তব্য প্ৰকাশ কৰি গগৈয়ে কয় যে বাপেকক পুতেকে এৰি গ’লে আক্ষেপ হ’বই।হিমন্তক ডাঙৰ- দীঘল কৰাৰ পাছত বিস্বাসঘাটকতা কৰি এৰি গ’ল। তেওঁ লগতে মুখ্যমন্ত্ৰী সৰ্বানন্দ সোণোৱালেও অগপক বিস্বাসঘাটকতা কৰিছে বুলি উল্লেখ কৰি কয় যে সৰ্বা-হিমন্তৰ মাজত শীতল যুদ্ধ চলি আছে।
একেখন সংবাদমেলতে গগৈয়ে সোণোৱাল চৰকাৰক বিভিন্ন প্ৰসংগক লৈ সমালোচনাৰে থকা- সৰকা কৰি পৰিৱৰ্তনৰ নামত publicity চলি থকা বুলি কটাক্ষ কৰে।বিজেপিয়ে আশ্বাস দিয়া ব্ৰহ্মপুত্ৰ খনন, এক্সপ্ৰেছ হাইৱে কি হ’ল বুলি প্ৰশ্ন উত্থাপন কৰি তেওঁ লগতে অগপ-বিপিএফৰ লগত কংগ্ৰেছৰ মিত্ৰতা সন্দৰ্ভত অনিশ্চয়তা প্ৰকাশ কৰে।
