অৰ্থনৈতিক বিকাশ বা উদ্যোগীকৰণতকৈ দুৰ্নীতিমুক্ত দেশ গঢ়াৰ কথা ক্ষমতালৈ অহাৰ পিছৰে পৰা প্ৰধানমন্ত্ৰী নৰেন্দ্ৰ মোদীয়ে দেশবাসীক দেখুৱাই আহিছে। চৰকাৰী বা ৰাজনৈতিক অনুষ্ঠানেই হওক, প্ৰধানমন্ত্ৰী আৰু তেওঁৰ কেবিনেট সদস্যসকলে সকলোতে দুৰ্নীতি ৰোধৰ কথা কোৱা শুনা যায়। কিন্তু কথাবোৰৰ বাস্তৱৰ লগত মিল আছেনে? শেহতীয়া সমীক্ষাৰ প্ৰতিবেদনে অৱশ্যে ইয়াৰ বিপৰীত কথাহে সূচায়। দেখা গৈছে যে দুৰ্নীতিৰ সূচকাংকৰ ক্ষেত্ৰত ভাৰতৰ ৰেংকিং আৰু তললৈ গৈছে। বিশ্বৰ ১৮০খন দেশৰ ভিতৰত ভাৰতৰ স্থান ৯৬তম। যোৱা বছৰ ই আছিল ৯৩ সংখ্যক।
জাৰ্মান সংস্থা ট্ৰেন্সপাৰেন্সি ইণ্টাৰনেশ্যনেলে প্ৰতি বছৰে দুৰ্নীতিৰ ধাৰণা সূচকাংক প্ৰকাশ কৰে। এখন দেশ দুৰ্নীতিয়ে কিমান জুৰুলা কৰিছে সেই কথা প্ৰতিবেদনত উল্লেখ কৰা হৈছে। শেহতীয়াকৈ এখন প্ৰতিবেদন প্ৰকাশ পাইছে য’ত ২০২৪ চনত দুৰ্নীতিৰ ক্ষেত্ৰত প্ৰতিখন দেশে ক’ত থিয় দিছে সেইটো সঠিকভাৱে দেখুওৱা হৈছে। ‘ট্ৰেন্সপাৰেন্সি ইণ্টাৰনেশ্যনেল’ৰ প্ৰতিবেদনত কোৱা হৈছে যে কেৱল ভাৰততে নহয়, চুবুৰীয়া দেশ বাংলাদেশ আৰু পাকিস্তানতো পৰিস্থিতি অধিক ভয়াৱহ হৈ পৰিছে। সূচকাংক তালিকাত দেশদুখন্ৰ স্থান ক্ৰমে ১৫১ আৰু ১৩৫ নম্বৰত আছে।
জাৰ্মান সংস্থাটোৱে এই তালিকাখন এনেধৰণে তৈয়াৰ কৰে যে এখন দেশে ১০০ৰ ভিতৰত কিমান পইণ্ট পায়। ২০২৪ চনৰ ট্ৰাইলত ভাৰতে লাভ কৰিছিল ৩৮পইণ্ট। বাংলাদেশ ২৩ আৰু পাকিস্তানে ২৭। শ্ৰীলংকাৰ স্থিতিও হ্ৰাস পাইছে। যোৱাবাৰৰ পৰা দেশখনৰ দুটা স্থান হ্ৰাস পাইছে। কিন্তু প্ৰতিবেদন অনুসৰি চীনত দুৰ্নীতি সামান্য হ্ৰাস পাইছে। তালিকাত এখোজ ওপৰলৈ উঠিছে। যোৱা বছৰ চীনে ৭৭ নম্বৰ স্থান লাভ কৰিছিল। এইবাৰ চীন ৭৬ নম্বৰত আছে। চীনে ১০০ৰ ভিতৰত ৪৩ পইণ্ট সংগ্ৰহ কৰিছে। আমেৰিকাত দুৰ্নীতি বৃদ্ধি পাইছে। এই তালিকাত আমেৰিকাৰ স্থান ২৮ নম্বৰ। যোৱাবাৰ আমেৰিকা ২৪ নম্বৰত আছিল।
প্ৰসংগক্ৰমে ট্ৰেন্সপাৰেন্সি ইণ্টাৰনেশ্যনেলে অৰ্থনৈতিক স্বচ্ছতা বা অস্পষ্টতাৰ বিভিন্ন সূচকৰ ওপৰত এক সমীক্ষা কৰি এই প্ৰতিবেদন প্ৰস্তুত কৰিছিল। এই তথ্যসমূহ বিশ্ব বেংক, আফ্ৰিকান ডেভেলপমেণ্ট বেংক, এছিয়ান ডেভেলপমেণ্ট বেংক, আৰু আইএমডি বিজনেছ স্কুলৰ দৰে আগশাৰীৰ বিত্তীয় বা ব্যৱসায়িক পৰিচালনা সংস্থাৰ পৰা লোৱা হৈছে। তাৰ ওপৰত ভিত্তি কৰি সংখ্যা দিয়া হয় আৰু এখন তালিকা তৈয়াৰ কৰা হয়।
ডেনমাৰ্ক আকৌ এবাৰ প্ৰথম স্থানত আছে আটাইতকৈ দুৰ্নীতিমুক্ত দেশ হিচাপে। বিশেষজ্ঞসকলৰ মতে এই দেশসমূহ এদিনতে সপোনৰ ভূমিলৈ ৰূপান্তৰিত হোৱা নাছিল। তাতো দুৰ্নীতিৰ বিৰুদ্ধে যুঁজ দিয়াৰ ইতিহাস বহু পুৰণি। উদাহৰণস্বৰূপে, সোতৰ শতিকাৰ ডেনমাৰ্কত দুৰ্নীতিৰ বিৰুদ্ধে আটাইতকৈ উল্লেখযোগ্য পদক্ষেপ আছিল উৎকোচক শাস্তিযোগ্য অপৰাধ বুলি ঘোষণা কৰা। পুনৰ ১৯ শতিকাত তাত চৰকাৰী কৰ্মচাৰীৰ কামৰ নৈতিক মানদণ্ড প্ৰৱৰ্তন কৰা হ’ল। দুৰ্নীতিৰ অন্ত পেলোৱাৰ ক্ষেত্ৰত স্ক্যাণ্ডিনেভিয়াৰ দেশসমূহে লাভ কৰা সফলতাৰ আঁৰত নিহিত হৈ আছে এক দীঘলীয়া আন্দোলন। তাত সামাজিক সুৰক্ষা অতি শক্তিশালী।
দুৰ্নীতিৰ সূচকাংক তালিকাত নিউজিলেণ্ড আৰু ফিনলেণ্ডৰ স্থান দ্বিতীয় আৰু তৃতীয়। আৰু দক্ষিণ চুডান আৰু ছোমালিয়া আটাইতকৈ দুৰ্নীতিগ্ৰস্ত দেশ হিচাপে শেষ স্থানত আছে।
