হুলস্থুলীয়া পৰিৱেশৰ মাজতে বৃহস্পতিবাৰে লোকসভাত কেন্দ্ৰীয় বিত্তমন্ত্ৰী নিৰ্মলা সীতাৰমণে নতুন আয়কৰ বিধেয়ক উত্থাপন কৰে। ১ ফেব্ৰুৱাৰীত বাজেট ভাষণত নিৰ্মলা সীতাৰমণে এই বিধেয়ক উত্থাপন কৰাৰ কথা ঘোষণা কৰিছিল। যদিহে নতুন আয়কৰ বিধেয়কখন আইনত পৰিণত হয় তেন্তে ই ১৯৬১ চনৰ আয়কৰ আইনখনৰ ঠাই ল’ব। ৬৪ বছৰীয়া আয়কৰ আইনখনক নতুন আয়কৰ বিধেয়কত এনেদৰে সৰল কৰি তোলা হৈছে, যাতে সাধাৰণ মানুহেও সহজে বুজিব পাৰে।
নতুন আয়কৰ বিধেয়ক উত্থাপনৰ সময়ত বিৰোধী দলৰ একাংশ সাংসদে ৱাক আউট কৰে। আন কিছুমানে কেন্দ্ৰীয় বিত্তমন্ত্ৰীগৰাকীলৈ তীব্ৰ প্ৰশ্ন নিক্ষেপ কৰে। কংগ্ৰেছৰ মনীষ তেৱাৰী আৰু আৰ এছ পিৰ এন কে প্ৰেমচন্দ্ৰনে দাবী কৰে যে নতুন আয়কৰ বিধেয়কখন আচলতে পুৰণিখনতকৈ অধিক জটিল। নিৰ্মলা সীতাৰমণে প্ৰত্যুত্তৰ দি কয় যে বৰ্তমানৰ আইনখনত ৮০০ৰো অধিক ধাৰা আছিল, আনহাতে প্ৰস্তাৱিত আইনখনত মাত্ৰ ৫৩৬টা ধাৰা আছে।
তৃণমূলৰ সাংসদ সৌগত ৰয়ে নতুন আয়কৰ বিধেয়কখনক “যান্ত্ৰিক” বুলি সমালোচনা কৰে। ইয়াৰ উত্তৰত কেন্দ্ৰীয় বিত্তমন্ত্ৰী সীতাৰমণে কয়, “… উল্লেখযোগ্য পৰিৱৰ্তন কৰা হৈছে। শব্দৰ সংখ্যা আধা হ্ৰাস কৰা হৈছে… বহু দফা আৰু অনুচ্ছেদ কৰ্তন কৰা হৈছে। ইয়াক সাধাৰণ ইংৰাজীত প্ৰস্তুত কৰা হৈছে।” কেইবাজনো সংসদ সদস্যই প্ৰস্তাৱিত নতুন আইনখন প্ৰৱৰ্তনৰ বাবে ধ্বনি ভোটৰ দাবী জনায়।
ইয়াৰ পিছতে কেন্দ্ৰীয় বিত্তমন্ত্ৰীয়ে প্ৰস্তাৱিত আয়কৰ বিধেয়কখন যুটীয়া সংসদীয় সমিতিলৈ প্ৰেৰণ কৰে। এই সমিতিৰ সদস্যসকলে নতুন কৰ প্ৰস্তাৱসমূহ ভালদৰে পৰীক্ষা কৰিব আৰু প্ৰয়োজন হ’লে পৰিৱৰ্তন কৰিব। তাৰ পিছত এই বিধেয়কখন পুনৰ সংসদত উত্থাপন কৰা হ’ব।
বাজেট অধিৱেশনৰ দ্বিতীয়াৰ্ধৰ প্ৰথম দিনা ১০ মাৰ্চত যুটীয়া সংসদীয় সমিতিয়ে বিধেয়কখন সন্দৰ্ভত প্ৰতিবেদন দাখিল কৰাৰ সম্ভাৱনা আছে। এই কমিটি গঠন কৰি দিব লোকসভাৰ অধ্যক্ষ ওম বিৰলাই।
নতুন আয়কৰ বিধেয়ক উত্থাপন হোৱাৰ কিছু সময়ৰ পাছতে নিৰ্মলা সীতাৰমনৰ কাৰ্যালয়ে টুইট কৰি কয়, “নতুন আয়কৰ বিধেয়ক (২০২৫) সংসদত উত্থাপন কৰা হৈছে। এই বিধেয়কখনৰ লক্ষ্য হৈছে বৰ্তমানলৈকে সংশোধন কৰা বৰ্তমানৰ আইনখনৰ ভাষা সৰল কৰা। বিধেয়কখন (এটা প্ৰতিলিপি) আমাৰ ৱেবছাইটত উপলব্ধ।”
নতুন আয়কৰ বিধেয়কৰ বৈশিষ্ট্যসমূহঃ
নতুন আয়কৰ বিধেয়কখনৰ আটাইতকৈ ডাঙৰ বৈশিষ্ট্যটো হ’ল ই আয়কৰৰ সৈতে জড়িত বিধানসমূহৰ ব্যাখ্যা সৰল কৰি তুলিছে, যাতে আইনী বিবাদ আৰু গোচৰৰ সংখ্যা হ্ৰাস কৰিব পাৰি। নতুন আয়কৰ বিলখন মাত্ৰ ৬২২ পৃষ্ঠাৰে সামৰি লোৱা হৈছে। আনহাতে বৰ্তমানৰ আয়কৰ আইনখনৰ ৮৮০ পৃষ্ঠা আছিল। কেন্দ্ৰীয় চৰকাৰৰ লক্ষ্য হৈছে কৰ ব্যৱস্থাক সৰল আৰু ডিজিটেলাইজ কৰা, যাতে দেশৰ কৰ ব্যৱস্থা সাধাৰণ মানুহৰ বাবে সহজে বুজিব পৰা যায়।
নতুন আয়কৰ বিলত নতুন কি আছে ?
* নতুন আয়কৰ বিলত মূল্যায়ন বৰ্ষৰ সলনি “কৰ বৰ্ষ” বা Tax Year ব্যৱহাৰ কৰা হৈছে।
* নতুন আয়কৰ বিধেয়কত এনপিএছ আৰু ইপিএফৰ কৰ ৰেহাইৰ সীমা বৃদ্ধি কৰা হৈছে। অৱসৰৰ পুঁজি আৰু মিউচুৱেল ফাণ্ডত বিনিয়োগৰ ওপৰত আপুনি কৰ ৰেহাইৰ সুবিধা পাব। বীমা পৰিকল্পনাত অধিক কৰ সুবিধা উপলব্ধ হ’ব।
* কোনোবাই যদি কৰ পৰিহাৰ কৰিবলৈ ভুৱা তথ্য দিয়ে তেন্তে তেওঁলোকৰ বিৰুদ্ধে কঠোৰ শাস্তি আছে আৰু তেওঁলোকৰ বিৰুদ্ধে গোচৰ ৰুজু হ’ব পাৰে। আয় লুকুৱাই ৰাখিলে সম্পত্তি জব্দ পৰ্যন্ত হ’ব পাৰে।
* যিসকলে কৰ নিদিয়ে তেওঁলোকৰ ওপৰত জৰিমনা বা উচ্চ সুতৰ হাৰ আৰোপ কৰা হ’ব পাৰে।
* ৰাজনৈতিক দল আৰু নিৰ্বাচনী ট্ৰাষ্টৰ আয় কৰমুক্ত কৰা হৈছে। কৃষি আয়ক কিছুমান চৰ্তত কৰ ৰেহাই দিয়া হৈছে।
* ধৰ্মীয় ট্ৰাষ্ট আৰু সমাজ কল্যাণমূলক অনুষ্ঠানলৈ আগবঢ়োৱা অনুদানৰ ওপৰত কৰ ৰেহাই দিয়া হ’ব।
* ইয়াৰ লগতে ষ্টাৰ্টআপ, ক্ষুদ্ৰ আৰু মজলীয়া উদ্যোগ আৰু বিশেষ ব্যৱসায়কো কৰ ৰেহাই দিয়া হৈছে।
* ভাড়াৰ আয়ৰ ওপৰত টিডিএছৰ সীমা বছৰি ২.৪ লাখৰ পৰা ৬ লাখ টকালৈ বৃদ্ধি কৰা হৈছে।
* যিকোনো সম্পত্তি বা সম্পত্তিৰ পৰা উপাৰ্জন কৰা লাভৰ ওপৰত মূলধনী লাভৰ কৰ লোৱাৰ বাবে নতুন নিয়ম সৃষ্টি কৰা হৈছে।
