আজিৰ দ্ৰুতগতিত চলি থকা পৃথিৱীখনত শিশুসকলে অহৰহ শিকি আছে, তথ্য গ্ৰহণ কৰি আছে আৰু মনোযোগ আৰু সবল স্মৃতিশক্তি গঠন হোৱা কামত মগ্ন হৈছে। আৰু এই সকলোবোৰ কামৰ বাবে স্বাস্থ্যসন্মত পুষ্টিৰ বাহিৰে কোনো বিকল্প নাই।
শৈক্ষিক বিষয় আয়ত্ত কৰাই হওক বা নতুন দক্ষতা লাভ কৰিব পৰাই হওক, মগজুক অনুকূলভাৱে কাম কৰাৰ বাবে সঠিক ইন্ধনৰ প্ৰয়োজন। মগজুৰ বিকাশত জেনেটিক্স আৰু জীৱনশৈলীৰ ভূমিকা থকাৰ বিপৰীতে পুষ্টি হৈছে বিকাশৰ ভেটি।
দ্ৰুতগতিত চলি থকা জীৱনশৈলী আৰু স্বাস্থ্যৰ প্ৰতি কম মনোযোগৰ বাবে শিশুৱে জাংক ফুড আৰু বেছিভাগেই সহজে উপলব্ধ আৰু খাবলৈ সোৱাদযুক্ত খাদ্যৰ প্ৰতি আকৰ্ষিত হয়। জাংক ফুড, অত্যধিক স্ক্ৰীণ টাইম, সুষম খাদ্যৰ অভাৱে শিশুৰ স্মৃতিশক্তি আৰু মগজুৰ বিকাশত প্ৰভাৱ পেলাব পাৰে। কিন্তু শিশুৰ দৈনন্দিন খাদ্যত স্মৃতিশক্তি বৃদ্ধি কৰা ছুপাৰফুড অন্তৰ্ভুক্ত কৰিলে পাৰ্থক্য আহিব পাৰে।
১. বাদাম
স্মৃতিশক্তি বৃদ্ধি কৰা খাদ্যৰ তালিকাৰ শীৰ্ষত আলমণ্ড আছে। স্বাস্থ্য সচেতন লোকসকলে মগজুৰ শক্তি বৃদ্ধিৰ বাবে দীৰ্ঘদিন ধৰি বাদামৰ ওপৰত নিৰ্ভৰ কৰি আহিছে। ভিটামিন ই, এন্টিঅক্সিডেন্ট, আৰু ওমেগা-৩ ফেটি এচিডযুক্ত আলমণ্ডে স্মৃতিশক্তি, মগজুৰ কাৰ্য্যক্ষমতা আৰু মগজুৰ স্বাস্থ্য উন্নত কৰে। ইয়াৰ উপৰিও ইয়াত ৰাইবোফ্লেভিন আৰু এল-কাৰ্নিটিন থাকে, যিয়ে মগজুৰ কোষ বৃদ্ধিত সহায় কৰে আৰু স্নায়ুৰ অৱক্ষয়ী বিকাৰৰ সম্ভাৱনা হ্ৰাস কৰে।
৪-৫ টা আলমণ্ড ৰাতি তিয়াই ৰাতিপুৱা খোলা উলিয়াই খালী পেটত শিশুক খুৱাব। ইচ্ছা কৰিলে এগিলাচ গাখীৰত মিহিকৈ কটা আলমণ্ডো দিব পাৰে।
২. আখৰোট
মগজুৰ বাবে আখৰোটৰ দৰে গুৰুত্বপূৰ্ণ আন কোনো খাদ্য চাগে নাই। আখৰোট দেখাত সৰু সৰু মগজুৰ দৰে! DHA (এবিধ ওমেগা-৩ ফেটি এচিড)ৰে সমৃদ্ধ এই বাদামবোৰ জ্ঞানমূলক কাৰ্য্যক্ষমতা বৃদ্ধি আৰু মানসিক চাপ হ্ৰাস কৰাৰ বাবে অতি উত্তম। ইয়াৰ উপৰিও ইয়াত পলিফিনল থাকে, যিয়ে মগজুৰ কোষৰ মাজত যোগাযোগ উন্নত কৰাত সহায় কৰে, শিক্ষণ ক্ষমতা বৃদ্ধি কৰে, মগজুৰ অৱক্ষয় ৰোধ কৰে।
৩. ঘিউ
ঘিউক মগজুৰ বিকাশৰ বাবে অম্ল হিচাপে গণ্য কৰা হয়। যুগ যুগ ধৰি ভাৰতীয় খাদ্যৰ প্ৰধান খাদ্য হিচাপে পৰিগণিত হৈ আহিছে। ঘিউত প্ৰচুৰ পৰিমাণে স্বাস্থ্যকৰ চৰ্বি থাকে, যিয়ে মগজুৰ কোষ গঠন আৰু কাৰ্য্যত সহায় কৰে। ঘিউত চৰ্বিত দ্ৰৱীভূত হোৱা প্ৰয়োজনীয় ভিটামিন (A, D, E, আৰু K) থাকে যিয়ে স্মৃতিশক্তি ধৰি ৰখা আৰু শিক্ষণত সহায় কৰে।
৪. হালধি
হালধি মগজুৰ বাবে অতি উত্তম আৰু স্বাস্থ্যকৰ। হালধি হৈছে কাৰকুমিন সমৃদ্ধ এক উপকাৰী মছলা, যিয়ে মগজুৰ কাৰ্য্যক্ষমতা বৃদ্ধি কৰে আৰু স্মৃতিশক্তি হেৰুৱাৰ পৰা ৰক্ষা কৰে। ইয়াৰ এন্টি-ইনফ্লেমেটৰী আৰু এন্টিঅক্সিডেন্ট গুণ আছে যিয়ে মগজুৰ বিকাশত সহায় কৰে, অক্সিডেটিভ ক্ষতি ৰোধ কৰে, আৰু চেৰ’টনিন আৰু ড’পামিনৰ মাত্ৰা বৃদ্ধি কৰি মেজাজ উন্নত কৰে।
৫. চকলেট
চকলেট মগজুৰ বাবে ভাল, কিন্তু সঠিক মানৰ হ’লেহে। ডাৰ্ক চকলেট (কমেও ৭০% ক’ক’ থকা)ত ফ্লেভন’ইড, কেফেইন, আৰু এন্টিঅক্সিডেন্ট থাকে যিয়ে মগজুৰ কাৰ্য্যক্ষমতা আৰু স্মৃতিশক্তি বৃদ্ধি কৰে। ইয়াৰ উপৰিও মগজুলৈ তেজৰ সোঁত বৃদ্ধি কৰে। কিন্তু ডাৰ্ক চকলেট পৰিমিত পৰিমাণে খোৱাটো জৰুৰী আৰু চেনিৰ পৰিমাণ বেছি থকা মিল্ক চকলেট পৰিহাৰ কৰা উচিত।
