২০২৪-২৫ বিত্তীয় বৰ্ষৰ ওৰ পৰিবলৈ সন্মুখত আৰু মাত্ৰ ডেৰটা মাহ বাকী। যাৰ বাবে অসম চৰকাৰে নির্ধাৰিত ঋণ লোৱাৰ প্রক্রিয়া সম্পূৰ্ণ কৰাৰ বাবে খৰধৰ লগাইছে। ফেব্ৰুৱাৰী মাহৰ ৪ তাৰিখে পোন্ধৰ বছৰীয়া ম্যাদত চৰকাৰী বণ্ড বন্ধকত থৈ ৯০০ কোটি টকাৰ ঋণ লোৱা হিমন্ত বিশ্ব চৰকাৰখনে অহা ১৮ ফেব্রুৱাৰীত দহ বছৰীয়া ম্যাদত চৰকাৰী বণ্ড বন্ধকত থৈ পুনৰ ৯০০ কোটি টকাৰ ঋণ লোৱাৰ বাবে বিজার্ভ বেংকৰ ওচৰত প্ৰস্তাৱ দাখিল কৰিছে।
উল্লেখ্য যে, নৱবৰ্ষৰ আৰম্ভণিৰ জানুৱাৰী মাহটোতে চৰকাৰে ৫০০ কোটি টকাকে দুবাৰ একেই চৰকাৰী বণ্ড বন্ধকত দি ঋণ লৈছিল। চলিত বিত্তীয় বর্ষৰ অধীনত বাজেট ঘোষণাযোগে প্রায় ২৯ হেজাৰ কোটি টকা ঋণ লোৱাৰ পৰিকল্পনা কৰা হৈছিল যদিও বিত্তীয় দায়বদ্ধতা আৰু বাজেট ব্যবস্থাপনা আইনৰ লগতে জিএছডিপিৰ তাৰতম্যতাৰ বাবে ঋণৰ পৰিমাণ ১৭-২০ হাজাৰ কোটি টকাৰ ভিতৰত সীমিত ৰখাৰ সিদ্ধান্ত ল‘বলৈ চৰকাৰ বাধ্য হয়।
মনকৰিবলগীয়া কথা এয়ে যে প্রতি মাহে ঋণৰ ওপৰত নিৰ্ভৰশীল ৰাজ্য চৰকাৰখনে ঋণৰ সপক্ষে যিমানেই যুক্তি আগনবঢ়াওক কিয় কেগৰ প্ৰতিবেদন, ৰিজার্ভ বেংকৰ প্রতিবেদন আনকি ৰূপান্তৰ আৰু উন্নয়ন বিভাগে প্রকাশ কৰা ৰাজ্যৰ অর্থনৈতিক জৰীপ সংক্রান্তীয় প্রতিবেদনতো ঋণৰ পৰিমাণ ক্রমাগত বৃদ্ধি পোৱাক লৈ গভীৰ উদ্বিগ্নতা প্রকাশ কৰিছে।
যোৱা ২০১৬-১৭ বিত্তীয় বর্ষত মাত্র ২,৬৫৫ কোটি টকা ঋণ লৈয়ে ক্ষান্ত থকা অসম চৰকাৰখনে মূলধনী ব্যয়ৰ জৰিয়তে উৎপাদনমূলক শিতানত অগ্রাধিকাৰ দিয়াৰ সলনি নগদ ধনৰ বিনামূলীয়া হিতাধিকাৰী আঁচনিসমূহ প্রবর্তন কৰিবলৈ যোৱাৰ ফলতেই বছৰি ঋণৰ প্রকোপ বৃদ্ধি পাইছে।
ৰাজ্য চৰকাৰে যোৱা ২০২১-২২ বিত্তীয় বর্ষটোতে ২১,৩৫৫ কোটি টকা, ২০২২-২৩ বর্ষত ১৭,৪৫৭ কোটি টকা, ২০২৩-২৪ বৰ্ষত ২১ হাজাৰ কোটি টকাৰ ঋণ লৈছিল। যোৱা ২০১৬-১৭ বৰ্ষত ৰাজ্য চৰকাৰৰ মুঠ ৩৮,৩৪৫.৭৭ কোটি টকাৰ ঋণৰ বিপৰীতে বর্তমান মুঠ ঋণৰ পৰিমাণ ১ লাখ ৬৫ হাজাৰ কোটি টকালৈ বৃদ্ধি পাইছে।
ইপিনে প্রতি বছৰে ঋণৰ সুত বৃদ্ধি পোৱাই নহয়, মূল ঋণৰ ধন পৰিশোধৰ হাৰো বাঢ়ি গৈছে। কাৰণ ১০ বছৰীয়া ম্যাদত লোৱা ঋণৰ ধন সময়মতে পৰিশোধ কৰিবলৈ চৰকাৰ বাধ্য। কংগ্ৰেছ চৰকাৰৰ আমোলত নামমাত্র ঋণ লোৱা হৈছিল বাবেই ম্যাদৰ ভিতৰত সেই ঋণ পৰিশোধ কৰা বর্তমান চৰকাৰৰ বাবে সম্ভৱ হৈছে। কিন্তু শাসকীয় বিজেপি চৰকাৰখনে মাত্র একোটা বর্ষতে ২১ হেজাৰ কোটি টকা পর্যন্ত ঋণ লোৱাৰ ফলত দহ বছৰীয়া ম্যাদৰ শেষত একেলগে সেই ঋণ পৰিশোধ কৰিবলৈ যাওঁতে ৰাজ্য চৰকাৰ গভীৰ সংকটৰ সন্মুখীন হ’ব লাগিব।
স্মৰ্তব্য যে ঋণৰ ধন মূলধনী ব্যয় দেখুৱাই হিতাধিকাৰী আঁচনিসমূহৰ নামত মাহে মাহে ব্যয় কৰিবলৈ যোৱাৰ বাবেই শেহতীয়াকৈ চৰকাৰখন আর্থিক সংকটত ভুগিছে। কলেজ শিক্ষক, চৰকাৰী কৰ্মচাৰী, গাঁওৰক্ষী বাহিনীকে ধৰি ৰাজ্যৰ বিভিন্ন চৰকাৰী খণ্ডৰ কৰ্মচাৰীয়ে সময়মতে দৰমহা পোৱাৰ পৰা বঞ্চিত হৈছে। তাৰ জোৰা মাৰিবলৈ যাওঁতে ঋণৰ পাছত ঋণৰ বাবে অসম চৰকাৰে চৰকাৰী বণ্ড বন্ধকত দি ৰিজার্ভ বেংকৰ ওচৰত হাত পাতিছে।
