আমেৰিকাৰ পৰা আৰু ১১৯ জন অবৈধ ভাৰতীয়ক লৈ এখন আমেৰিকাৰ বিমান অমৃতসৰত অৱতৰণ কৰে। ইয়াৰ লগে লগে আমেৰিকাই দ্বিতীয়বাৰৰ বাবে ভাৰতীয় অবৈধ অনুপ্ৰৱেশকাৰীক বিতাড়ন কৰিলে। আমেৰিকাৰ পৰা বিতাড়িত এই ১১৯ জন লোকৰ ভিতৰত ৬৭ জন পঞ্জাৱৰ আৰু ৩৩ জন হাৰিয়ানাৰ। ইয়াৰ উপৰিও ঘৰলৈ উভতি অহা ৮ জন অবৈধ অনুপ্ৰৱেশকাৰী গুজৰাটৰ, ৩ জন উত্তৰ প্ৰদেশৰ, ২ জন গোৱাৰ, ২ জন মহাৰাষ্ট্ৰৰ, ২ জন ৰাজস্থানৰ পৰা আৰু ১ জনকৈ হিমাচল প্ৰদেশ আৰু জম্মু-কাশ্মীৰৰ।
বাতৰি অনুসৰি, দেওবাৰে অমৃতসৰত ১৫৭ জন অবৈধ অনুপ্ৰৱেশকাৰী কঢ়িয়াই অনা তৃতীয়খন আমেৰিকাৰ বিমানো অৱতৰণ কৰাৰ সম্ভাৱনা আছে।
ইয়াৰ পূৰ্বে ৫ ফেব্ৰুৱাৰীত অবৈধ ভাৰতীয়ক কঢ়িয়াই অনা আমেৰিকাৰ বায়ুসেনাৰ বিমান অমৃতসৰত উপস্থিত হৈছিল। অমৃতসৰত অৱতৰণ কৰা বিমানখনত মুঠ ১০৪ জন ভাৰতীয় নাগৰিক আছিল। সেই বিমানেৰে ঘৰলৈ উভতি অহা বহু ভাৰতীয়ই অভিযোগ কৰিছিল যে গোটেই যাত্ৰাত তেওঁলোকৰ হাত-ভৰি শিকলিৰে বান্ধি থোৱা আছিল। আনকি মহিলাসকলকো ভৰি আৰু কঁকালত শিকলিৰে বান্ধি ৰখাৰ অভিযোগ উত্থাপন হৈছিল।
এই ঘটনাৰ ফলত সংসদত প্ৰতিক্ৰিয়াৰ সৃষ্টি হয়। বিষয়টোক লৈ ভাৰতত তীব্ৰ প্ৰতিবাদৰ পাছত নতুন দিল্লীয়ে বিতাড়িতসকলৰ লগত কৰা ব্যৱহাৰ সন্দৰ্ভত ৱাশ্বিংটনক নিজৰ উদ্বেগ প্ৰকাশ কৰে। ইফালে, শেহতীয়াকৈ আমেৰিকা ভ্ৰমণৰ সময়ত মোদীয়ে ট্ৰাম্পৰ কাষত থিয় হৈ কয়, ‘যিসকলে আন দেশত অবৈধভাৱে বাস কৰি আছে, তেওঁলোকৰ তাত থকাৰ কোনো অধিকাৰ নাই।’ ভাৰত আৰু আমেৰিকাৰ ক্ষেত্ৰত আমি আগতেও কৈছো যে যিসকল সঁচাকৈয়ে ভাৰতীয় আৰু যিসকল অবৈধভাৱে আমেৰিকাত আছে তেওঁলোকক ঘূৰাই ল’বলৈ ভাৰত সাজু।’
ইপিনে, পঞ্জাৱৰ মুখ্যমন্ত্রী ভগৱন্ত মান সিঙে কেন্দ্রীয় চৰকাৰক অমৃতসৰত আমেৰিকাৰ বিমান অৱতৰণ কৰিবলৈ দিয়াত সমালোচনা কৰিছে৷ তেওঁ কয়, “আমাৰ পবিত্ৰ নগৰ (অমৃতসৰ)ক বিতাড়নৰ কেন্দ্ৰ নকৰিব।” ইফালে, অমৃতসৰত দ্বিতীয় পৰ্যায়ত মাৰ্কিন বিমান অৱতৰণ কৰাৰ পূৰ্বে ভগৱন্ত মানে বিমানবন্দৰ পৰিদৰ্শন কৰে। দ্বিতীয়খন বিমানত ভাৰতলৈ উভতি অহা পঞ্জাৱৰ বাসিন্দা অবৈধ অনুপ্ৰৱেশকাৰীসকলক নিজ নিজ ঘৰলৈ লৈ যাবলৈ চৰকাৰে বাহনৰ ব্যৱস্থা কৰিব বুলি তেওঁ জনাইছিল।
প্ৰসংগক্ৰমে দ্বিতীয়বাৰৰ বাবে আমেৰিকাৰ ৰাষ্ট্ৰপতি পদলৈ ঘূৰি অহাৰ পিছৰে পৰা ড’নাল্ড ট্ৰাম্পে ‘অবৈধ বসবাস’ আৰু অনুপ্ৰৱেশৰ দৰে বিষয়ত কঠোৰ স্থিতি গ্ৰহণ কৰিছে। এই পৰিৱেশত কিছুদিন পূৰ্বে ট্ৰাম্প প্ৰশাসনে কলম্বিয়াকে ধৰি কেইবাখনো দেশলৈ ‘অবৈধ অনুপ্ৰৱেশকাৰী’ক ঘূৰাই পঠিয়াইছিল। ইফালে, শেহতীয়াকৈ হোৱাইট হাউছে সামৰিক বিমানেৰে উভতাই পঠোৱা অবৈধ অনুপ্ৰৱেশকাৰীৰ কেইবাখনো ফটো প্ৰকাশ কৰিছে। ইয়াত মানুহক শাৰী পাতি বিমানত উঠাই দিয়া দেখা গৈছিল। সকলোৰে কঁকালত শিকলি বান্ধি থোৱা আছে। যিয়ে তীব্ৰ সমালোচনাৰ সৃষ্টি কৰিছিল।
উল্লেখ্য যে শেহতীয়াকৈ আমেৰিকাৰ ইমিগ্ৰেচন এণ্ড কাষ্টমছ এনফৰ্চমেণ্টে নিউয়ৰ্ক আৰু নিউ জাৰ্চিৰ একাধিক গুৰুদ্বাৰত অভিযান চলাইছে। আমেৰিকাত অবৈধভাৱে বসবাস কৰা শিখসকলক চিনাক্ত কৰিবলৈ এই অভিযান চলোৱা হৈছিল। মন কৰিবলগীয়া যে পূৰ্বে নিয়ম আছিল যে অবৈধ অনুপ্ৰৱেশকাৰীক গ্ৰেপ্তাৰ কৰিবলৈ কোনো ধৰ্মীয় বা শিক্ষানুষ্ঠানত অভিযান চলাব নোৱাৰিব। কিন্তু ক্ষমতালৈ অহাৰ পাছত ট্ৰাম্পে সেই আমেৰিকান নিৰ্দেশনা বাতিল কৰে। এনে পৰিবেশত অবৈধ ভাৰতীয় অনুপ্ৰৱেশকাৰীক ধৰিবলৈ আমেৰিকাৰ গুৰুদ্বাৰত অভিযান চলোৱা হৈছিল।
