ৰাজ্যৰ প্ৰাথমিক আৰু উচ্চ প্ৰাথমিক বিদ্যালয়ৰ চাৰি সহস্ৰাধিক অনিয়মীয়া শিক্ষকৰ পদ নিয়মীয়া কৰণৰ দাবীত গুৱাহাটী মহানগৰীৰ চচলত ৰূপায়ন কৰা আমৰণ অনশন কাৰ্যসূচীৰ প্ৰতি পূৰ্ণ সমৰ্থন আগবঢ়াইছে আম আদমী পাৰ্টিয়ে।
১৩ ফেব্ৰুৱাৰীৰ পৰা অব্যাহত এই প্ৰতিবাদী কাৰ্যসূচীৰ প্ৰতি ৰাজ্য চৰকাৰৰ শিক্ষা বিভাগে কোনো ধৰণৰ সঁহাৰি নজনোৱাত তীব্ৰ প্ৰতিক্ৰিয়া প্ৰকাশ কৰিছে আপৰ ৰাজ্যিক সাধাৰণ সম্পাদক (সাংগঠিনক) ৰাজীৱ শইকীয়াই ।
আজি এই সন্দৰ্ভত এক প্ৰেছ বিজ্ঞপ্তি যোগে শইকীয়াই বঞ্চিত শিক্ষক সকলৰ দাবী পূৰণ কৰিবলৈ চৰকাৰক আহ্বান জনায়। উল্লেখ্য যে ৰাজ্য চৰকাৰৰ শিক্ষা বিভাগে ২০২১ চনত ৪,৫৪১ গৰাকী শিক্ষকক নিযুক্তি প্ৰদান কৰিছিল। বৰ্তমানৰ মুখ্যমন্ত্ৰী হিমন্ত বিশ্ব শৰ্মাই নিযুক্তি প্ৰদান কৰা সেই সকল শিক্ষকৰ পদ আজিলৈকে নিয়মীয়া নকৰা বিষয়টোৱে ৰাজ্য চৰকাৰৰ ব্যৰ্থতা উদঙাই দিছে। অনবৰতে উন্নয়নৰ ঢাক-ঢোল বজোৱা মুখ্যমন্ত্ৰী গৰাকীয়ে শিক্ষকৰ ন্যায্য দাবীৰ প্ৰতি কাণ সাৰ নিদিয়া বুলি অভিযোগ উত্থাপন কৰিছে আপৰ নেতাগৰাকীয়ে।
সংবাদ মাধ্যমলৈ প্ৰেৰণ কৰা প্ৰেছ বিজ্ঞপ্তিত ৰাজ্যৰ স্বীকৃতি প্ৰাপ্ত ভেঞ্চাৰ স্কুলসমূহ প্ৰাদেশিকীকৰণৰ বাবেও দাবী জনায়। ইপিনে চচলত প্ৰতিবাদী শিক্ষকৰ অনশনস্থলীত আপৰ নেতা জিতু ডেকাৰ নেতৃত্বত এটা সজাতী দল উপস্থিত হৈ বঞ্চিত শিক্ষক সকলৰ সমস্যাৰ বুজ লয়। ৰাজ্যৰ শিক্ষক সমাজ তথা শিক্ষাখণ্ডৰ সমস্যা সমাধানত চৰকাৰৰ শোচনীয় ব্যৰ্থতাৰ তীব্ৰ সমালোচনা কৰে দলটোৰ যুৱনেতা জিতু ডেকাই।
এডভান্টেজ অসম ১.০ৰ শ্বেতপত্ৰ প্ৰকাশৰ দাবী আপৰ
এডভান্টেজ অসম ২.০ ৰ নামত বিশাল বিনিয়োগ সন্মিলনৰ আয়োজন সন্দৰ্ভত প্ৰতিক্ৰিয়া প্ৰকাশ কৰিছে আম আদমী পাৰ্টিয়ে।
ৰাজ্য চৰকাৰে পূৰ্বে অনুষ্ঠিত কৰা এডভান্টেজ অসম সন্মিলনৰ নামত ৰাজকোষৰ কিমান পুঁজি খৰছ কৰিছিল আৰু তাৰ বিপৰীতে অসমৰ উদ্যোগিক খণ্ডত কিমান বিনিয়োগ হ’ল সেই তথ্য শ্বেতপত্ৰ আকাৰে ৰাজহুৱা কৰিবলৈ আহ্বান জনাইছে আপৰ ৰাজ্যিক সাধাৰণ সম্পাদক ৰাজীৱ শইকীয়াই।
বৰ্তমানলৈকে মুখ্যমন্ত্ৰীয়ে ৰাজ্যৰ উদ্যোগীকৰণত বিদেশী পুঁজিৰ বিনিয়োগ সন্দৰ্ভত স্পষ্ট তথ্য দিব পৰা নাই। আনহাতে মুখ্যমন্ত্ৰী গৰাকীয়ে নুমলীগড় শোধনাগাৰৰ উৎপাদন তিনি মিলিয়ন মেট্ৰিকটনৰ পৰা ৯ মিলিয়ন মেট্ৰিকটনলৈ সম্প্ৰসাৰণৰ বিষয়টোক এডভান্টেজ অসম ১.০ ৰ সফলতা বুলি আভুৱা ভাৰিছে।
এই সন্দৰ্ভত আপৰ নেতাগৰাকীৰ প্ৰশ্ন – ‘৪০ বছৰ পূৰ্বে স্বাক্ষৰিত অসম চুক্তিৰ চৰ্ত অনুসৰি ভাৰত চৰকাৰে স্থাপন কৰা নুমলীগড় শোধনাগাৰৰ সম্প্ৰসাৰণ বৰ্তমান চৰকাৰৰ এডভান্টেজ অসমৰ সম্পৰ্ক কি মুখ্যমন্ত্ৰীয়ে বুজাই দিবনে?
