সময় তেতিয়া ৰাতিপুৱা ৫:৩৬ বাজিছে! সোমবাৰে পুৱাই ভূমিকম্পই কেই ছেকেণ্ডমানৰ বাবে কঁপাই তোলে ৰাজধানী দিল্লীকে ধৰি উত্তৰ ভাৰতৰ বিভিন্ন প্ৰান্ত।
বহু লোক আতংকিত হৈ ঘৰ এৰি ৰাজপথলৈ ওলাই আহে। দিল্লীৰ স্থানীয় ৰাইজে জনোৱা মতে, বিগত ২৫ বছৰে ৰাজধানীত এনে ভূমিকম্প সংঘটিত হোৱা নাই।
ৰিখটাৰ স্কেলত এই ভূমিকম্পৰ প্ৰাবল্য আছিল ৪। দিল্লীৰ পৰা পাঁচ কিলোমিটাৰ দূৰত্বত অৱস্থিত ধৌলাকুঁৱাত ভূমিকম্পৰ কেন্দ্ৰবিন্দু। অৱশ্যে ক্ষয়-ক্ষতি বা হতাহতৰ কোনো কোনো তথ্য এতিয়াও পোৱা হোৱা নাই।
ইয়াৰ পূৰ্বে ১১ জানুৱাৰী আৰু ২৩ জানুৱাৰীত দিল্লীত ভূমিকম্পৰ কম্পন অনুভৱ কৰা হৈছিল। পুনৰ একেটা ঘটনাৰ পুনৰাবৃত্তিত সঘনাই হোৱা ভূমিকম্পত মানুহ আতংকিত হৈ পৰিছে। ৰাজধানী দিল্লী, আগ্ৰা, হাৰিয়ানা আদিকে ধৰি উত্তৰ ভাৰতৰ বিভিন্ন প্ৰান্তত কম্পন অনুভূত হয়।
আজি পুৱা প্ৰধানমন্ত্ৰীয়ে দিল্লীৰ জনসাধাৰণক টুইট কৰি কয় যে কৰ্তৃপক্ষই পৰিস্থিতি নিৰীক্ষণ কৰি আছে। সকলোৱে শান্ত আৰু সজাগ হৈ থাকক।”
যোৱা শনিবাৰে দিল্লী ষ্টেচনত কুম্ভলৈ যোৱা ৰে’লত উঠিবলৈ চেষ্টা কৰি থকা অৱস্থাত ১৮ গৰাকী তীৰ্থযাত্ৰীৰ পদপিষ্ট হৈ মৃত্যুমুখত পৰে। তাৰপিছতে এই ভূমিকম্পৰ বাবে ৰাজধানীৰ জনসাধাৰণৰ মাজত এক নতুন আতংকৰ পৰিৱেশৰ সৃষ্টি হৈছে। সেইবাবেই প্ৰধানমন্ত্ৰীয়ে সকলোকে শান্ত হৈ থাকিবলৈ আহ্বান জনোৱা বুলি ধাৰণা কৰা হৈছে।
দিল্লী ষ্টেচনৰ এজন চাহ বিক্ৰেতাই আজি পুৱা ভূমিকম্পৰ পাছত সংবাদ সংস্থাক জনাইছে, “এটা বৃহৎ জোকাৰণি। দোকানখনৰ সকলো বস্তু কঁপি উঠিছিল। আন এটা ৰেল দুৰ্ঘটনা যেন লাগিছিল। পিছত শুনিলো যে ভূমিকম্প হৈছে!”
