কোৰিয়াৰ অভিনেত্ৰী কিম চে-ৰনৰ ৰহস্যজনক মৃত্যু ঘটিছে। ঘৰৰ পৰা উদ্ধাৰ হৈছে ২৪ বছৰীয়া অভিনেত্ৰীগৰাকীৰ মৃতদেহ। ‘ব্লাডহাউণ্ডছ’ আৰু ‘দ্য মেন ফ্ৰম ন’হৱেৰ’ ছবিত কৰা অভিনয়ৰ বাবে বিখ্যাত দক্ষিণ কোৰিয়াৰ অভিনেত্ৰীগৰাকী। আৰক্ষীয়ে এই ঘটনাৰ তদন্ত অব্যাহত ৰাখিছে। অৱশ্যে মৃত্যুৰ কাৰণ এতিয়াও জানিব পৰা হোৱা নাই।
বাতৰি অনুসৰি, দেওবাৰে কিম চে-ৰনৰ এজন বন্ধুৱে প্ৰথমে ফোনযোগে যোগাযোগ কৰিবলৈ চেষ্টা কৰিছিল। যেতিয়া দক্ষিণ কোৰিয়াৰ অভিনেত্ৰীগৰাকীৰ সৈতে ফোনত যোগাযোগ কৰিব পৰা নগ’ল, তেতিয়া তেওঁ পৰিয়ালক খবৰ দিয়ে। তাৰ পিছতে আবেলি অভিনেত্ৰীগৰাকীৰ মৃত্যুৰ খবৰ পোৱা যায়। তেওঁৰ মৃত্যুৱে উদ্যোগটোৰ ওপৰত শোকৰ ছাঁ পেলাইছে।
আৰক্ষীয়ে সংবাদ মাধ্যমৰ আগত কয় যে তদন্ত অব্যাহত আছে। অৱশ্যে প্ৰকৃত কাৰণ এতিয়াও জানিব পৰা হোৱা নাই। অভিনেত্ৰীগৰাকীৰ ছ’চিয়েল মিডিয়ালৈ চালে দেখা যায় যে তেওঁ শেষবাৰৰ বাবে ইনষ্টাগ্ৰামত পোষ্ট কৰিছিল জানুৱাৰী মাহত। তেতিয়াৰ পৰা আৰু তেওঁ সক্ৰিয় হৈ থকা নাই।
২০০৯ চনত ‘এ ব্ৰেণ্ড নিউ লাইফ’ ছবিৰে অভিষেক ঘটাই জনপ্ৰিয়তা লাভ কৰিছিল কিম চে-ৰনে। ‘দ্য মেন ফ্ৰম ন’হৱেৰ’ (২০১০) ছবিখনত তেওঁ এক মৰ্মস্পৰ্শী অভিনয় কৰিছিল। ‘দ্য নেইবাৰ্ছ’, ‘লাভ অন হাইস্কুল’ৰ দৰে ছবিত অভিনয়ৰ বাবেও তেওঁ জনপ্ৰিয়।
কিন্তু ২০২২ চনত হোৱা এক ঘটনাই কিমৰ কেৰিয়াৰত এক বৃহৎ বিপৰ্যয়ৰ সৃষ্টি কৰিছিল। তেওঁৰ বিৰুদ্ধে মদ্যপান কৰি গাড়ী চলোৱাৰ অভিযোগ উঠে। যাৰ বাবে অভিনেত্ৰীগৰাকীয়ে বৃহৎ জৰিমনা ভৰিবলগীয়া হৈছিল। ২০২৩ চনৰ এপ্ৰিল মাহত তেওঁ মঞ্চলৈ ঘূৰি অহাৰ চেষ্টা কৰিছিল। কিন্তু অসুস্থতাৰ বাবে সেইটোও সম্ভৱ হোৱা নাছিল।
