২৫ মিনিটৰ বিজ্ঞাপন! এজন যুৱকে নিজৰ সময় নষ্ট কৰাৰ বাবে এটা জনপ্ৰিয় চিনেমা হল আৰু টিকট বুকিং কোম্পানীৰ বিৰুদ্ধে গোচৰ তৰে! সেই ঘটনাৰ ক্ষতিপূৰণ হিচাপে সংশ্লিষ্ট চিনেমা হল কৰ্তৃপক্ষক আদালতে ৬৫ হাজাৰ টকা ক্ষতিপূৰণ দিবলৈ নিৰ্দেশ দিছে।
সৰ্বভাৰতীয় সংবাদ মাধ্যমৰ সূত্ৰ অনুসৰি ত্ৰিশ বছৰীয়া যুৱকজনে ২০২৩ চনত বেংগালুৰুৰ জনপ্ৰিয় পিভিআৰ ইনক্স থিয়েটাৰত ‘ছেম বাহাদুৰ’ নামৰ এখন ছবি চাবলৈ গৈছিল। এই কাৰণতে তেওঁ ইতিমধ্যে ‘বুক মাই শ্ব’’ এপৰ পৰা অনলাইনযোগে টিকট ক্ৰয় কৰিছিল। সন্ধিয়া ৪ বজাৰ অনুষ্ঠান চাবলৈ যুৱকজনে টিকট কিনিছিল। তেঁও ভাবিছিল সন্ধিয়া ৬:৩০ বজাৰ আগতে চিনেমা শেষ হ’ব। ইয়াৰ পাছত তেওঁৰ এটা জৰুৰী কামো আছিল। কিন্তু অভিযোগটো হ’ল যে নিৰ্ধাৰিত সময় অনুসৰি চিনেমাখন আৰম্ভ কৰাৰ পৰিৱৰ্তে প্ৰায় ৪:৩০ বজাৰ পৰা আৰম্ভ হয়! তাৰ আগতে দীঘলীয়া ২৫ মিনিট বিজ্ঞাপন দেখুওৱা হৈছিল। ফলত যুৱকজনৰ কামত পলম হৈছিল। ইয়াৰ পাছত তেওঁ চিনেমা হল কৰ্তৃপক্ষ আৰু টিকট বুকিং কোম্পানীটোৰ বিৰুদ্ধে ক্ষোভিত হৈ গোচৰ ৰুজু কৰিলে!
আদালতত যুৱকজনে দাবী কৰিছিল যে সেই চিনেমা হলৰ বাবেই তেওঁৰ “মূল্যৱান সময়” অপচয় হৈছে। পলম হোৱাৰ বাবে সিদিনা সন্ধিয়া আন কোনো কামত উপস্থিত থাকিব নোৱাৰিলে। সকলো শুনাৰ পাছত আদালতে যুৱকজনৰ সপক্ষে ৰায় দিলে! আদালতে লক্ষ্য কৰিছিল যে সময় টকাৰ সমাৰ্থক। গতিকে সময় নষ্ট কৰাৰ অভিযোগ ন্যায্য। তদুপৰি চিনেমা চাই থাকোঁতে দৰ্শকক বিজ্ঞাপন চাবলৈ বাধ্য কৰাটো এক অন্যায় বাণিজ্যিক প্ৰথা। নিয়ম অনুসৰি চিনেমা আৰম্ভ হোৱাৰ ১০ মিনিট আগতে আৰু দুটা অৰ্ধৰ মাজত বিজ্ঞাপন দেখুৱাব পাৰিব। পিভিআৰ আৰু ইনক্সক সময় নষ্ট কৰাৰ বাবে ৫০ হাজাৰ টকা, মানসিক হাৰাশাস্তিৰ বাবে ৫ হাজাৰ টকা, যুৱকসকলে দাখিল কৰা অভিযোগ আৰু আইনী খৰচৰ বাবে ১০ হাজাৰ টকা জৰিমনা বিহা হয়। এই সকলো টকা সেই ব্যক্তিজনৰ হাতত গতাই দিব লাগিব। তদুপৰি আদালতে প্ৰতিষ্ঠান দুটাক এক লাখ টকা অতিৰিক্ত জৰিমনা আদায় দিবলৈ নিৰ্দেশ দিয়ে। কিন্তু টিকট বুকিং কোম্পানী ‘বুক মাই শ্ব’’ এই ঘটনাৰ পৰা বাদ দিয়া হৈছে। আদালতে যুক্তি দিছিল যে এই কাণ্ডৰ সৈতে সংগঠনটোৰ কোনো প্ৰত্যক্ষ সম্পৰ্ক নাই।
