তেলেংগানাৰ নাগৰকুৰ্নুল জিলাত এতিয়াও এটা সুৰংগত আৱদ্ধ হৈ আছে ৮ জন শ্ৰমিক। শ্ৰমিকক উদ্ধাৰৰ বাবে মোতায়েন কৰা হৈছে সেনা। এনডিআৰএফ আৰু এছডিআৰএফৰ এটা দলে প্ৰথমে সুৰংগটোত প্ৰৱেশ কৰিবলৈ চেষ্টা কৰিছিল যদিও বিফল হয়। ইয়াৰ কিছু সময়ৰ পিছতে ভাৰতীয় সেনাৰ ইঞ্জিনিয়াৰ ৰেজিমেণ্টে এক্সকেভেটৰ ড’জাৰেৰে উদ্ধাৰ অভিযান আৰম্ভ কৰে।
এছ ডি আৰ এফৰ এজন কৰ্মীয়ে কয় যে সুৰংগটোৰ ভিতৰলৈ যোৱাৰ কোনো সম্ভাৱনা নাছিল। সম্পূৰ্ণৰূপে ভাঙি গৈছে আৰু ভিতৰত বহুত বোকা আছে। উল্লেখ্য যে শ্ৰীশৈলাম বান্ধৰ পিছফালে থকা সুৰংগ নিৰ্মাণৰ সময়ত কংক্ৰিটৰ এটা অংশ ভাঙি পৰে। সেইটোৱে সুৰংগটোৰ প্ৰৱেশদ্বাৰ বন্ধ কৰি দিয়ে।
তেলেংগানাৰ মন্ত্ৰী এন উত্তম কুমাৰ ৰেড্ডীয়ে নাগৰকুৰ্নুলৰ দুৰ্ঘটনাস্থলী পৰিদৰ্শন কৰে। তেওঁ কয় যে উদ্ধাৰ কামৰ বাবে ৰাজ্য চৰকাৰে বিশেষজ্ঞসকলক নিযুক্তি দিছে। যোৱা বছৰ উত্তৰাখণ্ডত সুৰংগ দুৰ্যোগৰ সময়ত যি বিশেষজ্ঞৰ দল নিয়োগ কৰা হৈছিল, সেই একেটা বিশেষজ্ঞৰ দলেই ইয়াতো আবদ্ধ শ্ৰমিকক উদ্ধাৰৰ বাবে নিয়োগ কৰা হৈছে। ইয়াৰ উপৰিও ১৯ জন কয়লা খনন বিশেষজ্ঞও উদ্ধাৰ অভিযানত যোগদান কৰিবলৈ সেই স্থানলৈ ৰাওনা হৈছে।
সুৰংগটোৰ ভিতৰত আৱদ্ধ হৈ থকা শ্ৰমিকসকলৰ ভিতৰত আছে দুজন অভিযন্তা, দুজন অপাৰেটৰ আৰু চাৰিজন শ্ৰমিক। আৱদ্ধ আঠজন উত্তৰ প্ৰদেশ, ঝাৰখণ্ড, পঞ্জাৱ আৰু জম্মু-কাশ্মীৰৰ বাসিন্দা। উদ্ধাৰকাৰী দলটোৰ এজন সদস্যই কয় যে সুৰংগটোৰ ভিতৰত বায়ু চলাচলৰ বাবে ঠাই থকাৰ বাবে আৱদ্ধ শ্ৰমিকসকলক অক্সিজেন যোগান ধৰাত কোনো বাধা নাই।
সুৰংগ দুৰ্যোগৰ পিছতে শনিবাৰে প্ৰধানমন্ত্ৰী নৰেন্দ্ৰ মোদীয়ে মুখ্যমন্ত্ৰী ৰেবন্ত ৰেড্ডীক ফোন কৰি চলি থকা উদ্ধাৰ অভিযানৰ বিষয়ে সোধা-পোছা কৰে। মোদীয়ে উদ্ধাৰ অভিযান চলাই আৱদ্ধ শ্ৰমিকসকলক নিৰাপদে ঘূৰাই অনাৰ বাবে কেন্দ্ৰৰ পৰা সকলো ধৰণৰ সাহায্য প্ৰদানৰ আশ্বাস দিয়ে।
