হত্যাৰ গোচৰত যাৱজ্জীৱন কাৰাদণ্ডৰ ভয়। তাৰ পৰা হাত সাৰিবলৈ যুৱকজনে নিজৰ মৃত্যুৰ ‘নাটক’ ৰূপায়ন কৰিলে। আনকি এই ঘটনাই এখন চিনেমাকো হাৰ মনাব। এআইৰ সহায়ত সৃষ্টি কৰা হয় মৃতদেহৰ ছবি। মৃত্যুৰ প্ৰমাণ পত্ৰও লাভ কৰিলে। আনকি, নিজৰ পৰিৱৰ্তে অন্ত্যেষ্টিক্ৰিয়াৰ চিতাত নিজৰ সলনি জ্বলাই দিয়া হ’ল এটা ছাগলী। উত্তৰ প্ৰদেশৰ মাউ জিলাত সংঘটিত হৈছে ঘটনা। অভিযুক্তক আৰক্ষীয়ে গ্ৰেপ্তাৰ কৰিছে।
গ্ৰেপ্তাৰ হোৱা লোকজনৰ নাম ৰাজকুমাৰ ৰাজভৰ ওৰফে ৰাজু। বয়স ৩৮ বছৰ। আৰক্ষীয়ে জনোৱা মতে, ৰাজু ১৮ মাহ ধৰি পলাতক হৈ আছিল। দেওবাৰে তেওঁক গ্ৰেপ্তাৰ কৰা হয়। ২০১৬ চনত তেওঁৰ বিৰুদ্ধে হত্যাৰ গোচৰত বিচাৰ চলি আছিল।
আৰক্ষীৰ দাবী, ২০১৬ চনত ৰাজকুমাৰ আৰু তেওঁৰ সহযোগী সুদৰ্শন ৰাজভৰৰ বিৰুদ্ধে জনৈক যোগেশ সিঙক গুলীয়াই হত্যা কৰাৰ অভিযোগ উত্থাপন হৈছিল। সেই গোচৰৰ বিচাৰ চলি আছিল মাউৰ আদালতত। সাক্ষ্য লৈ প্ৰমাণ দাখিল কৰাৰ পিছত ৰাজকুমাৰে নিজৰ ভৱিষ্যতক লৈ বৰ চিন্তিত হৈ পৰিল।
আৰক্ষীয়ে দাবী কৰিছে যে ৰাজকুমাৰে ক্ৰিপ্টোকাৰেন্সীকে ধৰি বিভিন্ন স্থানত ধন বিনিয়োগ কৰিছিল। বিনিয়োগৰ বাবেও দুই এজনৰ পৰা টকা লৈছিল। ইয়াৰ পিছত তেওঁৰ চিনাকি হোমিঅ’পেথিক ডাক্তৰ এজনে হেনো তেওঁক মৃত্যুৰ নাটক এখন ৰূপায়ন কৰিবলৈ পৰামৰ্শ দিলে। ৰাজকুমাৰৰ কথাটো মনত লাগিল।
অভিযোগ অনুসৰি ৰাজকুমাৰক প্ৰথমে অসুস্থ আৰু অচেতন বুলি দেখুওৱা হৈছিল। ইয়াৰ পিছত এআই ব্যৱহাৰ কৰি তেওঁৰ মৃত্যুৰ এখন ছবি তৈয়াৰ কৰা হয়। সেই ছবিখনত তেওঁক শ্মশানৰ চিতাৰ ওপৰত পৰি থকা দেখা যায়। আৰক্ষীয়ে দাবী কৰিছে যে গাজীপুৰত অন্ত্যেষ্টিক্ৰিয়াৰ ব্যৱস্থা কৰা হৈছিল। কিন্তু চিতাত ৰাজকুমাৰৰ সলনি ছাগলী এটা জ্বলাই দিয়া হ’ল! পিছত তেওঁ গাজীপুৰৰ পৰা মৃত্যুৰ প্ৰমাণ পত্ৰও লাভ কৰে।
অৱশ্যে শেষ ৰক্ষা নহ’ল। মাউৰ কোটোৱালি নগৰ থানাৰ আৰক্ষী আৰু তদন্তকাৰী দলে অভিযুক্তক আটক কৰে। তেওঁৰ বিৰুদ্ধে জালিয়াতিৰ অভিযোগত নতুনকৈ গোচৰ ৰুজু কৰা হৈছে। সদ্যহতে তেওঁ কাৰাগাৰতে ঠাই পাইছে।
