মাত্ৰ দুটা চাকৰি। সেইটোও আকৌ ইন্টাৰ্নশ্বিপ। আবেদনকাৰীৰ সংখ্যা হৈছে ১২০০ জন। আনমেনড ডাইনেমিক্সৰ চিইঅ’ তথা বিজ্ঞানী শ্ৰীনাথ মল্লিকাৰ্জুনে তেওঁৰ কোম্পানীৰ ভাৰতীয় শাখাত চাকৰি প্ৰত্যাশীৰ ভিৰ দেখি উদ্বেগ প্ৰকাশ কৰিছে।
ভাৰতৰ জনসংখ্যাৰ বিশাল চাপ আৰু নিবনুৱা সমস্যাক লৈ উদ্বেগ প্ৰকাশ কৰি তেওঁ লিখিছে, “জনসংখ্যাৰ চাপৰ বাবে ভাৰত দুৰ্যোগৰ দিশে আগবাঢ়িছে।” শ্ৰীনাথ মল্লিকাৰ্জুনে দেশৰ শিক্ষা ব্যৱস্থাৰ দুৰ্বল অৱস্থাৰ বিষয়েও মাত মাতিছে।
মল্লিকাৰ্জুনে ছ’চিয়েল মিডিয়াত লিখিছে, “মই ভাবো ভাৰতত কৰ্মসংস্থাপন আৰু যোগ্য শ্ৰমিকৰ অভাৱে নিবনুৱা সমস্যাক গুৰুতৰ স্তৰলৈ লৈ গৈছে।” দেশৰ আগশাৰীৰ সংবাদ মাধ্যমে এই কথা ক’বলৈ ভয় কৰে। আমাৰ কোম্পানীৰ ভাৰতীয় শাখাত দুটা ইন্টাৰ্ণ পদ খালী আছিল। সেই পদৰ বাবে ১২০০ লোকে আবেদন কৰিছিল। ইয়াৰে ২০ জনক আমি পৰীক্ষাৰ অন্তিম পৰ্যায়ৰ বাবে বাছি লৈছো।’
বিষয়টো যে কিমান ভয়ংকৰ সেই কথা উল্লেখ কৰি ছচিয়েল মিডিয়াত মল্লিকাৰ্জুনে ভাৰতৰ শিক্ষা ব্যৱস্থাৰ আন্তঃগাঁথনিগত পাঁচটা ত্ৰুটি তুলি ধৰিছে। সেইবোৰ হৈছে…
১. বেছিভাগ আই আই টিৰ ছাত্ৰ-ছাত্ৰীয়ে জে ই ই উত্তীৰ্ণ হোৱাৰ পিছত পঢ়া বন্ধ কৰি দিয়ে। ফলত বাস্তৱ জগতত চাকৰিৰ বাবে অযোগ্য হৈ পৰে।
২. ব্যক্তিগত মহাবিদ্যালয় আৰু বিশ্ববিদ্যালয়সমূহে উপযুক্ত শিক্ষা প্ৰদান কৰাত ব্যৰ্থ হয়।
৩. বেছিভাগ ক্ষেত্ৰতে স্নাতকসকলে কোনো প্ৰকৃত জ্ঞান লাভ নকৰাকৈয়ে ডিগ্ৰী লাভ কৰে।
৪. অনুন্নত পাঠ্যক্ৰম, ভিত্তিহীন পৰীক্ষা, অযোগ্য শিক্ষক ছাত্ৰ-ছাত্ৰীৰ ভৱিষ্যতৰ বাবে এক বৃহৎ সমস্যা।
৫. ফলত লাখ লাখ স্নাতক কল চেণ্টাৰ, বেক অফিচ, কেৰাণীৰ চাকৰিৰ বাবে উপযুক্ত। কৃত্ৰিম বুদ্ধিমত্তাৰ বাবে ভৱিষ্যতে এই চাকৰিবোৰ নোহোৱা হ’বলৈ গৈ আছে।
দেশৰ অকাৰ্যকৰী শিক্ষা ব্যৱস্থাৰ এনে এক অন্ধকাৰ ছবি তুলি ধৰি মল্লিকাৰ্জুনে লিখিছে, “জনসংখ্যা বৃদ্ধি যিকোনো দেশৰ বাবে অতি উপকাৰী দিশ, কিন্তু ভাৰতৰ ক্ষেত্ৰত ই দুৰ্যোগৰ ইংগিত দিয়ে।” ছাত্ৰ-ছাত্ৰীক তেওঁৰ পৰামৰ্শ যে তেওঁলোকে কেৱল পাঠ্যপুথিয়েই নহয়, বিষয়টোৰ ওপৰত ভাল বিদেশী কিতাপও পঢ়িব লাগে। বুদ্ধিহীনসকলৰ দৰে পৰম্পৰাগত শিক্ষাৰ বাহিৰলৈ গৈ তেওঁ হাতে কামে শিক্ষণত গুৰুত্ব দিয়াৰ পৰামৰ্শ দিয়ে।
