পোহৰলৈ আহিছে ভাৰতৰ বেংকৰ পৰা কোটি কোটি টকা ঋণ লৈ ভাৰতৰ পৰা বিদেশলৈ পলায়ন কৰা ললিত মোদীৰ সম্পৰ্কে আন এক বিস্ফোৰক খবৰ।
মোদীক বিদেশৰ পৰা ভাৰতলৈ ঘূৰাই অনাৰ প্ৰচেষ্টা চলি থকাৰ মাজতে এই কথা পোহৰলৈ আহিছে।
উল্লেখ্য যে ইণ্ডিয়ান প্ৰিমিয়াৰ লীগৰ প্ৰতিষ্ঠাপক ললিত মোদীয়ে ভাৰতীয় নাগৰিকত্ব ত্যাগ কৰিবলৈ আগ্ৰহী। ললিতে ভাৰতীয় পাছপ’ৰ্ট জমা দিবলৈ লণ্ডনত থকা ভাৰতীয় উচ্চায়ুক্তত আবেদন জনাইছে। শুকুৰবাৰে এই তথ্য নিশ্চিত কৰিছে বৈদেশিক পৰিক্ৰমা মন্ত্ৰালয়ে।
বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে কয় যে ললিত মোদীয়ে পাছপ’ৰ্ট বিচাৰি আবেদন কৰিছে। আৱেদন পৰীক্ষা কৰি সিদ্ধান্ত লোৱা হ’ব। তেওঁৰ বিৰুদ্ধে যি আইনী ব্যৱস্থা ল’ব লাগিব, সেয়া লোৱা হ’ব।
ভাৰতীয় নাগৰিকত্ব ত্যাগ কৰি ক’ত নাগৰিকত্ব ল’ব লোলিত মোদীয়ে? জানিব পৰা মতে ললিতে দক্ষিণ প্ৰশান্ত মহাসাগৰীয় দ্বীপ ৰাষ্ট্ৰ ভানুআটুৰ নাগৰিকত্ব লাভ কৰিছে।
উল্লেখ্য যে ২০১০ চনত ললিত মোদীয়ে ভাৰত ত্যাগ কৰি লণ্ডনলৈ পলায়ন কৰে। আই পি এলৰ মুৰব্বী হৈ থকা সময়ত কোটি কোটি টকা আত্মসাৎ কৰাৰ অভিযোগ উত্থাপন হৈছে ললিত মোদীৰ বিৰুদ্ধে। জানিব পৰা মতে, দ্বীপ ৰাষ্ট্ৰ ভানুআটুৰ ভাৰতৰ সৈতে প্ৰত্যাৰ্পণ চুক্তি নাই। গতিকে ভৱিষ্যতে ভাৰতীয় আইনৰ অধীনত তেওঁক দোষী সাব্যস্ত হ’লেও ভাৰতে চৰকাৰে তেওঁক বিতাড়িত কৰিব নোৱাৰিব।
