অসম আৰক্ষীৰ জালত এটা মানৱ সৰবৰাহকাৰী চক্ৰ৷ এই চক্ৰটোৰ কৱলৰ পৰা ৰাজস্থানত বিক্ৰী কৰা দুগৰাকী নাবালিকাক আৰক্ষীয়ে উদ্ধাৰ কৰিবলৈ সক্ষম হৈছে।
আৰক্ষীয়ে জনোৱা মতে, এই মানৱ সৰবৰাহকাৰী চক্ৰ সৈতে জড়িত মূল অভিযুক্ত ৰূপালী দত্ত আৰু গংগা গঞ্জু নামৰ দুগৰাকী মহিলাই দুগৰাকী নাবালিকাক চাকৰি প্ৰলোভন দি বিক্ৰী কৰিছিল। আৰু নাবালিকা দুগৰাকীক অচিনাকি ব্যক্তিৰ সৈতে বলপূৰ্বকভাৱে বিবাহপাশত আৱদ্ধ কৰোৱা হৈছিল।
কাছাৰ জিলাৰ এজন ব্যক্তিয়ে তেওঁৰ জীয়ৰী আৰু ওচৰচুবুৰীয়াৰ জীয়ৰীক চাকৰিৰ মিছা প্ৰতিশ্ৰুতি দি দুগৰাকী মহিলা ৰূপালী দত্ত আৰু গংগা গঞ্জুৱে অজ্ঞাত ঠাইলৈ লৈ যোৱাৰ গোচৰ দিয়াৰ পিছতে তদন্ত আৰম্ভ কৰিছিল বুলি এগৰাকী জ্যেষ্ঠ আৰক্ষী বিষয়াই জানিবলৈ দিয়ে।
অৱশ্যে নিৰুদ্দেশ হোৱা এগৰাকী নাবালিকাই ঘৰলৈ পলাই আহিবলৈ সক্ষম হয়৷ নাবালিকাগৰাকীয়ে আৰক্ষীক জনোৱা মতে, ৫ জানুৱাৰীত তেওঁলোকে লাভজনক চাকৰিৰ প্ৰস্তাৱ দি ঘৰৰ পৰা হায়দৰাবাদলৈ লৈ যোৱা হৈছিল আৰু তাৰ পিছত ৰাজস্থানলৈ লৈ যোৱা হয় আৰু বলপূৰ্বকভাৱে জ্যেষ্ঠ লোকৰ লগত বিয়া কৰোৱা বুলি উল্লেখ কৰিছে।
আৰক্ষীয়ে ৰাজস্থান আৰক্ষীৰ সহায় লৈ আনজনী ছোৱালীৰ ফোন নম্বৰৰ সন্ধান উলিয়ায়। জয়পুৰৰ সমীপৰ এখন গাঁৱৰ পৰা উদ্ধাৰ কৰে।এই চক্ৰটোৰ সৈতে জড়িত থকা দুয়োগৰাকী মহিলাক গ্ৰেপ্তাৰৰ চেষ্টা অব্যাহত ৰাখিছে আৰক্ষীয়ে৷
সম্প্ৰতি অসমত দৰিদ্ৰ পৰিয়ালৰ ছোৱালীক চাকৰিৰ মিছা আশ্বাস প্ৰদান কৰি বিক্ৰী কৰাৰ ঘটনা বাঢ়ি অহাটো উদ্বেগৰ বিষয় হৈ পৰিছে।
