অসমৰ এগৰাকী বিশিষ্ট কবি, গীতিকাৰ, কণ্ঠশিল্পী তথা শিক্ষাবিদ ড° লক্ষহীৰা দাসৰ শনিবাৰে পুৱতি নিশা দেহাৱসান ঘটিছে। মৃত্যুৰ সময়ত তেওঁৰ বয়স আছিল ৯৪ বছৰ। শনিবাৰে পুৱা মহানগৰীৰ ৰাজগড়ৰ নিজা বাসভৱনত হৃদৰোগত আক্ৰান্ত হৈ শেষ নিশ্বাস ত্যাগ কৰে।
ড° লক্ষহীৰা দাসৰ জন্ম ১৯৩১ চনৰ ১৩ ফেব্ৰুৱাৰীত শুৱালকুছিত। পিতৃৰ নাম আছিল ললিত চন্দ্ৰ বৈশ্য সাউদ আৰু মাতৃৰ নাম ধৈৰ্যবালা বৈশ্য সাউদ।
তেওঁ ১৯৪৬ চনত যোৰহাট চৰকাৰী ছোৱালী হাইস্কুলৰ পৰা মেট্ৰিক আৰু ১৯৪৮ চনত যোৰহাটৰ জে বি কলেজৰ পৰা কলা শাখাত ইন্টাৰমেডিয়েট পৰীক্ষাত উত্তীৰ্ণ হয়। ১৯৫০চনত তেওঁ কটন কলেজৰ পৰা স্নাতক ডিগ্ৰী লাভ কৰে। ১৯৫৪ চনত তেওঁ স্নাতকোত্তৰ ডিগ্ৰী সমাপ্ত কৰাৰ পিছত ১৯৭২ চনত গুৱাহাটী বিশ্ববিদ্যালয়ৰ পৰা পিএইচডি ডিগ্ৰী লাভ কৰে।
তেওঁ ১৯৫৭চনৰ পৰা ১৯৭৭ চনলৈ কটন কলেজৰ শিক্ষা বিভাগৰ মুৰব্বী অধ্যাপক হিচাপে কৰ্মৰত আছিল। তেওঁ অসমীয়া আৰু ইংৰাজীকে ধৰি মুঠ ১৪খন গ্ৰন্থ ৰচনা কৰিছে। আনহাতে, তেওঁৰ অধীনত ১৪ গৰাকী ছাত্ৰ-ছাত্ৰীয়ে পিএইচডি ডিগ্ৰী লাভ কৰিছে। দেশ-বিদেশৰ বিভিন্ন আন্তৰ্জাতিক আলোচনা চক্ৰত গৱেষণা পত্ৰ পাঠ কৰিছিল।
ড° লক্ষহীৰা দাস গুৱাহাটী অনাতাঁৰ কেন্দ্ৰ এগৰাকী যশস্বী গীতিকাৰ। তেওঁৰ প্ৰকাশিত প্ৰকাশিত পুথিসমূহৰ ভিতৰত- প্ৰথমা, গীতাৰ্ঘ্য, লক্ষহীৰাৰ গীত, প্ৰাণৰ মুক্তিধাৰা, অস্কাৰ ৱাইল্ডৰ গল্প (অনূদিত), তপসী, প্ৰাণগংগা, সূৰ্য আৰু সাগৰৰ সাধু আদি অন্যতম।
ড° দাসে দুখন অসমীয়া চলচ্চিত্ৰ সৰাপাত আৰু লাচিত বৰফুকনত কণ্ঠদান কৰিছিল। ১৯৬৮ চনত লাচিত বৰফুকন ছবিৰ বাবে শ্ৰেষ্ঠা নেপথ্য কণ্ঠশিল্পীৰ বঁটা লাভ কৰিছিল। তেওঁক ড° ভূপেন হাজৰিকা বঁটাৰে সন্মানিত কৰা হৈছিল।
ড° লক্ষহীৰা দাসে লাভ কৰা অন্যান্য বঁটা তথা সন্মানসমূহৰ ভিতৰত আছে- অসম সাহিত্য সভাৰ শুৱালকুছি অধিবেশনৰ কবি সন্মিলনৰ সভানেত্ৰী (১৯৭৯), অসম সাহিত্য সভাৰ বাসন্তী বৰদলৈ বঁটা (১৯৯৫), সংগীতাচাৰ্য উপাধি (১৯৯৫), অসম চৰকাৰৰ শিল্পী বঁটা (২০০৩), প্ৰবীণা শইকীয়া বঁটা (২০০৯), শৈলধৰ ৰাজখোৱা বঁটা (২০১১), হাউলী বঁটা (২০১৫), ভূপেন হাজৰিকা বঁটা (২০১৯) ইত্যাদি।
উল্লেখযোগ্য যে পৰিবেশ্য কলাত সামগ্ৰিক অৱদানৰ কাৰণে ড° লক্ষ্যহীৰা দাসক সংগীত নাটক একাডেমী বঁটা (২০২২) প্ৰদান কৰা হয়৷
ৰাজ্যৰ শিক্ষায়তনিক তথা সাংস্কৃতিক জগতখনৰ এগৰাকী স্বনামধন্যা বিদূষী নাৰী ড° লক্ষহীৰা দাসৰ বিয়োগত বিভিন্নজনে শোকপ্ৰকাশ কৰিছে।
