নিজ শহুৰ-শাহুৰক গুৰুলাগুৰুলকৈ প্ৰহাৰ চিকিৎসক বোৱাৰীৰ। শহুৰ-শাহুৰ লগতে স্বামীকো নিৰ্যাতনৰ অভিযোগ। ইতিমধ্যে সামাজিক মাধ্যমত ভাইৰেল হৈ পৰিছে এই ঘটনাৰ ভিডিঅ’।
বেংগালুৰুত সংঘটিত হৈছে এই ঘটনা। ঘটনাৰ বিৱৰণ অনুসৰি, এগৰাকী মহিলা চিকিৎসকে তেওঁৰ শাহু-শহুৰ আৰু স্বামীক শাৰীৰিক নিৰ্যাতন চলোৱাৰ অভিযোগ উত্থাপন হৈছে।
ইতিমধ্যে ছ’চিয়েল মিডিয়াত ভাইৰেল হৈ পৰিছে এই নিৰ্যাতনৰ ভিডিঅ’। ইয়াৰ ফলত ব্যাপক ক্ষোভৰ সৃষ্টি হৈছে আৰু নেটিজেনসকলে চিকিৎসকগৰাকীৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে।
বেংগালুৰুৰ চিকিৎসক ডা. প্ৰিয়দৰ্শিনী এনৰ বিৰুদ্ধে উত্থাপন হৈছে এই অভিযোগ। শহুৰেক জে. নৰসিংহাই অন্নপূৰ্ণেশ্বৰীনগৰ থানাত তেওঁৰ বিৰুদ্ধে এজাহাৰ দাখিল কৰিছে।
অভিযোগত উল্লেখ কৰা মতে, যোৱা ১০ মাৰ্চত প্ৰিয়দৰ্শনীয়ে পুত্ৰ-কন্যাৰ সৈতে শহুৰেকৰ ঘৰলৈ গৈ বৃদ্ধ শহুৰেক, শাহুৱেক, স্বামী নবীন কুমাৰক শাৰীৰিক আৰু মানসিক নিৰ্যাতন চলাইছিল।
নৰসিংহাই কয় যে তেওঁৰ পুত্ৰই ২০০৭ চনত প্ৰিয়দৰ্শনীক বিয়া কৰাইছিল। কিন্তু কেইবাবছৰ পিছত পুত্ৰই বিবাহ বিচ্ছেদৰ বাবে আবেদন জনায়। যোৱা ১০ মাৰ্চৰ নিশা প্ৰায় ৮:৩০ বজাত বোৱাৰীয়েকে কন্যা আৰু পুত্ৰৰ সৈতে শহুৰেকৰ ঘৰত উপস্থিত হৈ সকলোকে শাৰীৰিক আৰু মানসিক নিৰ্যাতন চলায়।
ইতিমধ্যে এই ঘটনা সন্দৰ্ভত গোচৰ ৰুজু কৰিছে আৰক্ষীয়ে। দুয়োপক্ষৰ মন্তব্য সংগ্ৰহ কৰি ঘটনা সম্পৰ্কে আৰক্ষীয়ে আৰম্ভ কৰিছে তদন্ত।
