কেইবাখনো দেশৰ নাগৰিকৰ ওপৰত ভ্ৰমণ নিষেধাজ্ঞা আৰোপ কৰিব ট্ৰাম্প প্ৰশাসনে। সংবাদ সংস্থা ৰয়টাৰৰ এক প্ৰতিবেদনত প্ৰকাশিত তথ্য অনুসৰি ট্ৰাম্প প্ৰশাসনে ৪১খন দেশৰ বিৰুদ্ধে কঠোৰ নিষেধাজ্ঞা আৰোপৰ পৰিকল্পনা কৰিছে।
এই ৪১খন দেশক তিনিটা ভিন্ন গোটত বিভক্ত কৰা হৈছে। প্ৰথম গোটত ১০খন দেশ অন্তৰ্ভুক্ত কৰা হ’ব। প্ৰথম গোটত ভিতৰত আফগানিস্তান, ইৰাণ, ছিৰিয়া, কিউবা আৰু উত্তৰ কোৰিয়া অন্তৰ্ভুক্ত কৰিছে। এই দেশসমূহৰ নাগৰিকৰ বাবে আমেৰিকাৰ ভিছা সম্পূৰ্ণৰূপে নিষিদ্ধ কৰা হ‘ব।
দ্বিতীয় গোটত ৫খন দেশক অন্তৰ্ভুক্ত কৰা হৈছে। ইৰিত্ৰিয়া, হাইটি, লাওছ, ম্যানমাৰ আৰু দক্ষিণ চুডান আদি দেশ অন্তৰ্ভুক্ত কৰা হৈছে। এই দেশসমূহৰ নাগৰিকৰ ভিছাত আংশিক নিষেধাজ্ঞা আৰোপ কৰা হ‘ব। পৰ্যটক, ছাত্ৰ আৰু অন্যান্য অনুপ্ৰৱেশকাৰী ভিছাৰ ওপৰত প্ৰভাৱ পৰিব যদিও কিছুমান ক্ষেত্ৰত ইয়াৰ ব্যতিক্ৰম হ‘ব পাৰে বুলি প্ৰকাশ পাইছে।
আনহাতে তৃতীয় গোটত ২৬খন দেশৰ নাম অন্তৰ্ভুক্ত কৰিছে। বেলাৰুছ, পাকিস্তান আৰু তুৰ্কমেনিস্তানৰ আদি দেশৰ নাম আছে তৃতীয় গোটত । এই দেশসমূহৰ নাগৰিকৰ ওপৰত আংশিক ভিছা নিষেধাজ্ঞা আৰোপ কৰা হ‘ব। এই দেশসমূহক ৬০ দিনৰ ভিতৰত নিৰাপত্তাৰ অভাৱ দূৰ কৰাৰ সুযোগ প্ৰদান কৰা হ‘ব।
প্ৰতিবেদন অনুসৰি, এই তালিকাত কিছুমান নতুন দেশৰ নাম যোগ কৰাৰ সম্ভাৱনা আছে। চূড়ান্ত তালিকা প্ৰশাসনৰ অনুমোদনৰ পাছতে প্ৰকাশ পাব।
উল্লেখযোগ্য যে, ড‘নাল্ড ট্ৰাম্পৰ প্ৰথম কাৰ্যকালত মুছলমান সংখ্যাগৰিষ্ঠ সাতখন দেশৰ নাগৰিকৰ ওপৰত ভ্ৰমণ নিষেধাজ্ঞা আৰোপ কৰা হৈছিল, যিটো ২০১৮ চনত উচ্চতম ন্যায়ালয়েও সমৰ্থন কৰিছিল।
