লখিমপুৰ জিলাৰ পূব তেলাহীৰ আদিসুতিত উন্নয়নৰ নামত ৰাইজক প্ৰতাৰণৰ অভিযোগ তুলি আজি শতাধিক ৰাইজে এক উত্তাল প্ৰতিবাদ সাব্যস্ত কৰে।
প্ৰতিবাদকাৰী ৰাইজে স্বাধীনোত্তৰ কালৰে পৰা বৃহত্তৰ আদিসুতি অঞ্চলৰ ৰাইজক প্ৰতাৰণা কৰাৰ অভিযোগ তুলি হিমন্ত বিশ্ব শৰ্মা গ‘বেগ, মানৱ ডেকা গ’বেগ, বিজু পেগু গ’বেগ আৰু অসম চৰকাৰ কাম নাই আদি শ্লোগান দি পদযাত্ৰা বাহিৰ কৰি উত্তাল প্ৰতিবাদ সাব্যস্ত কৰে।
উল্লেখ্য যে চৰকাৰৰ অবহেলাৰ বাবেই সামান্য ববৰষুণতে বাট পথ বোকা পানী হোৱাৰ বাবে বহু সমস্যাৰ সৃষ্টি হোৱাৰ লগতে বিদ্যালয়লৈ ছাত্ৰ ছাত্ৰী সকলে চাৰি-পাঁচ কিলোমিটাৰ খোজ কাঢ়ি যাবলৈও বহু অসুবিধাৰ সন্মুখীন হ’বলগীয়া হয়। যাৰ বাবে গাঁৱৰ ডেকা, বুঢ়া -বুঢ়ী সকলোৱে উত্তাল প্ৰতিবাদ সাব্যস্ত কৰে।
পথৰ দুৰৱস্থাৰ বাবে সামান্য বেমাৰ বা প্ৰসূতি মহিলাক চিকিৎসা কৰিবলৈ লখিমপুৰ সদৰলৈ লৈ যাব হ’লে ৬-৭ কিলোমিটাৰ কান্ধত তুলি লৈ যাব লাগে। প্ৰতিবাদকাৰীসকলে অঞ্চলটোৰ ৰাইজৰ সুবিধাৰ্থে পকী পথ নিৰ্মাণ কৰিবলৈ দাবী জনায়।
অন্যথা ২০২৬ চনৰ বিধানসভা নিৰ্বাচন, পঞ্চায়ত নিৰ্বাচন আৰু এম এ চিৰ নিৰ্বাচনৰ পূৰ্বে পকী পথ নিৰ্মাণ কৰি নিদিলে ভোট বৰ্জন কৰাৰ হুংকাৰ আদিসুতি অঞ্চলৰ ৰাইজৰ। অঞ্চলটোৰ উন্নয়নৰ ক্ষেত্ৰত মিছিং স্বায়ত্ব পৰিষদেও আজিলৈকে একো কাম নকৰাৰ অভিযোগ উত্থাপন কৰে।
