মহাকাশত ৯ মাহতকৈ অধিক সময় কটোৱাৰ পাছত পুনৰ পৃথিৱীলৈ ঘূৰি আহিছে সুনীতা উইলিয়ামছ। মহাকাশচাৰী বুচ উইলম’ৰো আহিছে সুনীতাৰ লগত।
মহাকাশৰ পৰা ধৰাপৃষ্ঠলৈ ঘূৰি অহাৰ সময়তে সুনীতা উইলিয়ামছলৈ চিঠি লিখি ভাৰতলৈ আমন্ত্ৰণ জনালে দেশৰ প্ৰধানমন্ত্ৰী নৰেন্দ্ৰ মোডীয়ে।
উল্লেখ্য যে কিছুদিন পূৰ্বে মহাকাশচাৰী মাইক মাছিমিনোৰ সৈতে মোদীয়ে সাক্ষাৎ কৰিছিল। চিঠিখনত সেই বৈঠকৰ কথা উল্লেখ কৰি তেওঁ লিখিছে, “মহাকাশচাৰী মাইক মাছিমিনোৰ সৈতে কথা পাতি থাকোঁতে আপোনাৰ কথা ওলাইছিল। আমি আলোচনা কৰিছিলোঁ যে আমি আপোনাক আৰু আপোনাৰ কৃতিত্বক লৈ কিমান গৌৰৱান্বিত।’
মোদীয়ে কয় যে যেতিয়াই তেওঁ আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু প্ৰাক্তন ৰাষ্ট্ৰপতি জো বাইডেনক লগ পায় তেতিয়াই তেওঁ সুনীতাৰ বিষয়ে সোধে।
মোদীয়ে পত্ৰখনত লিখিছে, “আপোনাৰ এই কৃতিত্বৰ বাবে ১.৪ বিলিয়ন ভাৰতীয় সদায় গৌৰৱান্বিত। আপুনি হাজাৰ হাজাৰ মাইল দূৰত থাকিলেও আমাৰ হৃদয়ত আছে। ভাৰতীয় সকলে আপোনালোকৰ সুস্বাস্থ্য আৰু সফলতা কামনা কৰিছে।
প্ৰধানমন্ত্ৰীয়ে সুনীতাক মহাকাশৰ অহাৰ পিছত ভাৰত ভ্ৰমণৰ বাবেও আমন্ত্ৰণ জনায়। চিঠিখনত তেওঁ লিখিছে, “আপোনাৰ উভতি অহাৰ পিছত ভাৰতত আপোনাক দেখাৰ বাবে মই আগ্ৰহেৰে অপেক্ষা কৰি আছো।” ভাৰতৰ এগৰাকী বিখ্যাত কন্যাক আতিথ্য দিয়াটো আমাৰ বাবে আনন্দৰ কথা।”
চিঠিখনত মোদীয়ে সুনীতাৰ পিতৃ দীপক পাণ্ডিয়া, মাতৃ বনী আৰু স্বামী মাইকেল উইলিয়ামছৰ কথাও উল্লেখ কৰিছে। মন কৰিবলগীয়া যে ১ মাৰ্চত মোদীয়ে সুনীতালৈ এই পত্ৰ লিখিছিল। কিন্তু সুনীতা উভতি অহা যানখনত উঠাৰ পিছতহে এই চিঠিখন ৰাজহুৱা হৈছিল।
