প্ৰযুক্তিৰ ক্ষেত্ৰত ভাৰততকৈ মাত্ৰ ৩ বছৰৰ পিছত স্বাধীনতা লাভ কৰা জাপান প্ৰযুক্তি ক্ষেত্ৰত বহু আগুৱাই গ’ল। জাপানত আছে বিশ্বৰ আটাইতকৈ দ্ৰুততম ৰেল, বুলেট ট্ৰেইন। ইয়াৰ উপৰিও বিভিন্ন প্ৰযুক্তি আৰু কাৰিকৰী দিশত ভাৰততকৈ বহু দূৰ আগত আছে জাপান।
এইবাৰ জাপানে মাত্ৰ ছয় ঘন্টাত এটা সম্পূৰ্ণ ৰেল ষ্টেচন নিৰ্মাণ কৰিবলৈ ওলাইছে। কিন্তু ইমান কম সময়ৰ ভিতৰতে জাপানে এই কঠিন কামটো কেনেকৈ সম্পন্ন কৰিব? উত্তৰটো হ’ল 3D প্ৰিণ্টাৰ।
জাপানৰ ওছাকাৰ পৰা ৬০ মাইল দক্ষিণে অৱস্থিত এখন চহৰ ৱাকায়ামা। তাত ১০৮ বৰ্গফুটৰ এটা নতুন ষ্টেচন নিৰ্মাণ কৰা হ’ব।
পশ্চিম জাপান ৰে’লৱেই ঘোষণা কৰিছে যে এই নতুন ষ্টেশ্যনটো যাত্ৰী আশ্ৰয় শিবিৰৰ বাবে ব্যৱহাৰ কৰা হ’ব। এই সকলোবোৰ কাম থ্ৰীডি প্ৰিণ্টাৰৰ সহায়ত কৰা হ’ব।
ৰে’লৱেই লগতে জনাইছে যে থ্ৰীডি প্ৰিণ্টিং প্ৰযুক্তি ব্যৱহাৰ কৰি গাঁথনিগত উপাদানসমূহ নিৰ্মাণ কৰা হ’ব আৰু তাৰ পিছত সেই স্থানলৈ নিৰ্মাণৰ বয়-বস্তু পৰিবহণ কৰা হ’ব। য’ত শ্ৰমিকসকলে ছয় ঘণ্টাৰ ভিতৰত ষ্টেশ্যনটো নিৰ্মাণ সম্পূৰ্ণ কৰিব।
জাপানৰ স্থানীয় সংবাদ মাধ্যমৰ বাতৰি অনুসৰি অহা ২৫ মাৰ্চত উক্ত ট্ৰেকত শেষৰখন ৰে’ল চলোৱাৰ পিছত এই নিৰ্মাণৰ কাম আৰম্ভ হ’ব।
জানিব পৰা মতে, এই প্ৰকল্পত যোগদান কৰিছে নিৰ্মাণ কোম্পানী চেৰেণ্ডিক্স। থ্ৰী-ডি প্ৰিন্টিং প্ৰযুক্তি ব্যৱহাৰ কৰি ঘৰ নিৰ্মাণৰ বাবে এই কোম্পানীটো পৰিচিত।
ৰে’লৱেই কয় যে এই প্ৰকল্পৰ জৰিয়তে তেওঁলোকৰ লগতে জাপানৰ অন্যান্য ৰাজহুৱা পৰিবহণ কোম্পানীসমূহে ভৱিষ্যতে অন্যান্য অঞ্চলৰ বাবে বহনক্ষম নিৰ্মাণ সামগ্ৰী আৰু অত্যাধুনিক প্ৰযুক্তিৰ সন্ধান কৰাৰ সুযোগ লাভ কৰিব।
উল্লেখ্য যে তৰুণ-তৰুণীৰ সংখ্যা কমি যোৱাৰ বাবে জাপানত শ্ৰমিকৰ সংখ্যা ক্ৰমান্বয়ে হ্ৰাস পাইছে। চৰকাৰী পৰিসংখ্যা অনুসৰি ২০৭০ চনৰ ভিতৰত দেশৰ ৪০%তকৈ অধিক জনসংখ্যা ৬৫ বছৰ বা তাতকৈ অধিক বয়সৰ হ’ব। পশ্চিম জাপান ৰেলৱেই এক বিবৃতিত কয় যে যিহেতু জাপানে শ্ৰমিকৰ সমস্যাৰ সন্মুখীন হৈছে, সেয়েহে থ্ৰীডি প্ৰিন্টিঙৰ দৰে উদ্ভাৱনী প্ৰযুক্তিৰ প্ৰৱৰ্তনে ৰে’লৰ আন্তঃগাঁথনি আধুনিকীকৰণ কৰাটো সহজ কৰি তুলিব।
