মঙলবাৰে পুৱা গাজা ষ্ট্ৰিপত ইজৰাইলৰ বিমান আক্ৰমণত মহিলা আৰু শিশুকে ধৰি কমেও ৩২৬ জন পেলেষ্টাইনী নিহত হয়।
চিকিৎসালয়ৰ বিষয়াসকলৰ মতে, এই আক্ৰমণে জানুৱাৰী মাহৰ পৰা চলি থকা যুদ্ধবিৰতি ভংগ কৰি ১৭ মাহ পুৰণি যুদ্ধখন পুনৰ আৰম্ভ হোৱাত ইন্ধন যোগাইছে।
জানিব পৰা মতে, ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে হামাছৰ সৈতে যুদ্ধবিৰতিৰ চৰ্ত নাকচ কৰি এই বিমান আক্ৰমণৰ নিৰ্দেশ দিয়ে।
ইজৰাইলৰ সেনা বিষয়াসকলে কয় যে এই অভিযান অনিৰ্দিষ্টকাললৈ চলি থাকিব আৰু ইয়াৰ পৰিসৰ বৃদ্ধি পাব পাৰে।
ইফালে ইজৰাইলৰ এই আক্ৰমণক হোয়াইট হাউছে সমৰ্থন কৰা বুলি জনাইছে ইজৰাইলৰ বিষয়া সকলে।
ইজৰাইলৰ সেনাই পূব গাজাৰ পৰা বিশেষকৈ উত্তৰৰ বেইট হানৌন আৰু দক্ষিণৰ অন্যান্য অঞ্চলৰ লোকক উলিয়াই নিয়াৰ নিৰ্দেশ দিছে। ইয়াৰ পৰা বুজা যায় যে ইজৰাইলে অতি সোনকালে স্থল অভিযানৰ বাবে সাজু হৈছে।
নেতানিয়াহুৰ কাৰ্যালয়ৰ বিষয়াই কয় যে ইজৰাইলে এতিয়া হামাছৰ বিৰুদ্ধে অধিক সামৰিক শক্তি ব্যৱহাৰ কৰিব।
এই আক্ৰমণে পুনৰবাৰ হামাছৰ বন্দী হৈ থকা প্ৰায় দুডজন ইজৰাইলী নাগৰিকৰ ভৱিষ্যতক লৈ উদ্বেগ প্ৰকাশ কৰিছে।
ইফালে, ইজাজত আল ৰিচেকে নেতানিয়াহুৱে নিজৰ সোঁপন্থী চৰকাৰক সুৰক্ষা দিবলৈ এই আক্ৰমণ চলোৱাৰ অভিযোগ উত্থাপন কৰি মধ্যস্থতাকাৰীসকলক যুদ্ধবিৰতি কোনে ভংগ কৰিলে সেই কথা প্ৰকাশ কৰিবলৈ আহ্বান জনায়।
উল্লেখ্য যে এই আক্ৰমণৰ কেইবাঘণ্টাৰ পিছতো হামাছে কোনো ধৰণৰ প্ৰত্যাক্ৰমণ কৰা নাই। ইয়াৰ পৰা বুজা যায় যে তেওঁলোকে এতিয়াও যুদ্ধবিৰতি বজাই ৰাখিব বিচাৰে।
