পূৰ্বৰ চাকৰিৰ অভিজ্ঞতা থকা শিক্ষিত পত্নীয়ে কেৱল স্বামীৰ পৰা ৰক্ষণাবেক্ষণৰ ধন লাভ কৰিবলৈ নিবনুৱা হৈ থাকিব নালাগে। শেহতীয়াকৈ দিল্লী উচ্চ ন্যায়ালয়ে বৈবাহিক বিবাদৰ এক গোচৰৰ শুনানি গ্ৰহণ কৰি এই কথা উল্লেখ কৰিছে।
জানিব পৰা মতে ২০১৯ চনত বিবাহপাশত আবদ্ধ হোৱা দম্পতীহালে বিয়াৰ কিছু সময়ৰ পিছতে ছিংগাপুৰলৈ স্থানান্তৰিত হৈছিল। মহিলা গৰাকীয়ে নিৰ্যাতনৰ বলি হোৱাৰ অভিযোগ উত্থাপন কৰিছে। মহিলাগৰাকী ২০২১ চনৰ ফেব্ৰুৱাৰী মাহত ভাৰতলৈ উভতি আহি স্বামী আৰু শহুৰেকৰ বিৰুদ্ধে পৰিয়াল আদালতৰ কাষ চাপিছিল। অৰু স্বামীৰ পৰা প্ৰতিমাহে ৩ লাখ ২৫ হাজাৰ টকাৰ ৰক্ষণাবেক্ষণৰ বাবে অনুৰোধ জনাইছিল। কিন্তু মহিলাগৰাকীৰ অন্তৱৰ্তীকালীন ৰক্ষণাবেক্ষণৰ অনুৰোধ নাকচ কৰে আদালতে। পিছত পৰিয়াল আদালতৰ নিৰ্দেশক প্ৰত্যাহ্বান জনাই উচ্চ ন্যায়ালয়ৰ কাষ চাপিছিল মহিলাগৰাকীয়ে। উচ্চ ন্যায়ালয়েও মহিলাগৰাকীৰ আবেদন খাৰিজ কৰে।
প্ৰতিবেদন অনুসৰি এই গোচৰৰ অভিযোগকাৰী সুশিক্ষিত। ২০০৬ চনত তেওঁ স্নাতকোত্তৰ অধ্যয়ন সম্পূৰ্ণ কৰে। ২০০৫ চনৰ পৰা ২০০৭ চনলৈকে তেওঁ ডুবাইত কাম কৰিছিল। বিবাহৰ পিছত তেওঁ কাম নকৰাৰ সিদ্ধান্তৰ বিষয়ে মহিলাগৰাকীৰ ভাষ্যৰ পৰা অনুমান কৰিব পাৰি। উত্তৰত মহিলাগৰাকীৰ স্বামীয়ে কয় যে তেওঁৰ পত্নী উচ্চ শিক্ষিত আৰু নিজৰ জীৱিকা উপাৰ্জনৰ ক্ষমতা আছে। সেয়েহে নিবনুৱা সমস্যাক কাৰণ বুলি উল্লেখ কৰি তেওঁ জীৱিকাৰ ধন বিচাৰিব নোৱাৰে।
দুয়োপক্ষৰ যুক্তি শুনা পাছত আদালতে কয় যে পত্নী উচ্চ শিক্ষিত আৰু শাৰীৰিকভাৱে সক্ষম। সেয়ে আদালতে এই গোচৰত মহিলাগৰাকী ভৰণ-পোষণৰ বাবে যোগ্য নহয় বুলি বিবেচনা কৰে।
