ধন সৰবৰাহৰ গোচৰত ন্যায়াধীশ যশৱন্ত বাৰ্মাৰ বিৰুদ্ধে এফআইআৰ দাখিল কৰাৰ আবেদন উচ্চতম ন্যায়ালয়ে মানি লোৱা নাছিল। শুকুৰবাৰে উচ্চতম ন্যায়ালয়ৰ ন্যায়াধীশ অভয় ওকা আৰু উজ্জ্বল ভূঞাই আবেদন খাৰিজ কৰি কয় যে আভ্যন্তৰীণ তদন্ত প্ৰথমে সম্পূৰ্ণ কৰিব লাগে। দিল্লী উচ্চ ন্যায়ালয়ৰ প্ৰাক্তন ন্যায়াধীশ যশৱন্ত বাৰ্মাৰ চৰকাৰী বাসগৃহত অগ্নিকাণ্ড সংঘটিত হোৱাৰ পাছতে তেওঁৰ ঘৰৰ পৰা বিপুল পৰিমাণৰ নগদ ধন উদ্ধাৰ হোৱাৰ অভিযোগ উত্থাপন হৈছে। সেই অভিযোগৰ পোহৰত তেওঁৰ বিৰুদ্ধে এফআইআৰ বিচৰা এখন আবেদনৰ শুনানি আজি চলি আছিল।
আজি বিচাৰপীঠে কয় যে যদি ন্যায়াধীশ বাৰ্মাক আভ্যন্তৰীণ তদন্তত দোষী সাব্যস্ত কৰা হয়, তেন্তে দেশৰ মুখ্য ন্যায়াধীশ যশৱন্ত বাৰ্মাই তেওঁৰ বিৰুদ্ধে গোচৰ ৰুজু কৰিবলৈ অনুমতি দিব পাৰে। অথবা তেওঁক চাকৰিৰ পৰা বৰ্খাস্ত কৰাৰ বাবে চৰকাৰক পৰামৰ্শ দিব পাৰে। কিন্তু তাৰ আগতে এই বিষয়ত ব্যৱস্থা লোৱাৰ কোনো ভিত্তি নাই। যিহেতু আভ্যন্তৰীণ তদন্ত চলি আছে, সেয়েহে প্ৰতিবেদনত বহু কথা ওলাই আহিব।
উচ্চতম ন্যায়ালয়ে গঠন কৰা তিনিজনীয়া কমিটীয়ে ন্যায়াধীশ বাৰ্মাৰ সৈতে শীঘ্ৰে বৈঠকত মিলিত হ’ব। ন্যায়াধীশ যশৱন্ত বাৰ্মাই কমিটীৰ সন্মুখত হাজিৰ হোৱাৰ পূৰ্বে জ্যেষ্ঠ অধিবক্তাৰ সৈতে আলোচনা কৰি আছে। অধিবক্তা সিদ্ধাৰ্থ আগৰৱালা, মানেকা গুৰুস্বামী, অৰুন্ধতী কাটজু আৰু তাৰা নাৰুলাই ন্যায়াধীশ বাৰ্মাৰ লুটিয়েনছৰ দিল্লীত থকা বাসগৃহত উপস্থিত হয়।
