শেহতীয়াকৈ দেশত ড্ৰাগছ নিয়ন্ত্ৰণ বিষয়াসকলে দিল্লী, কলকাতাকে ধৰি দেশৰ বিভিন্ন প্ৰান্তৰ পৰা উচ্চ ৰক্তচাপ, মধুমেহ, গেছ, হৃদযন্ত্ৰ বা বৃক্কৰ সমস্যাৰ বাবে ব্যৱহাৰ কৰা ভুৱা ঔষধৰ বেগ জব্দ কৰিছে। এতিয়া সেই তালিকাত যোগ হৈছে ৰেবিছৰ টিকাকৰণৰ ঔষধো!
ড্ৰাগ কণ্ট্ৰল ব্যুৰোৰ তথ্য অনুসৰি দিল্লী, মুম্বাই, আহমেদাবাদ আৰু লক্ষ্ণৌত এটা জনপ্ৰিয় ব্ৰেণ্ডৰ নকল ৰেবিছ বেজী (বেচ নম্বৰ KA24014) প্ৰচলিত হৈ আহিছে। দিল্লীৰ ড্ৰাগ কণ্ট্ৰল ব্যুৰোৱেও শুকুৰবাৰে এই সন্দৰ্ভত ৰাজ্যসমূহক সকীয়াই দিয়ে।
সতৰ্কবাণীটোত স্পষ্টকৈ উল্লেখ আছে যে ভুৱা বেজী গ্ৰহণ কৰিলে ৰোগীক ডাঙৰ বিপদত পৰিব পাৰে। সেয়েহে প্ৰতিটো অঞ্চলত তালাচী চলাই ক’ত কিমান আছে সেইটো নিৰ্ণয় কৰি ভুৱা ঔষধ তৎকালীনভাৱে জব্দ কৰাৰ নিৰ্দেশ জাৰি কৰা হৈছে। একে সময়তে জনসাধাৰণকো সকীয়াই দিয়া হৈছে যে জলাতংকৰ ভেকচিন ভালদৰে পৰীক্ষা নকৰাকৈ ব্যৱহাৰ নকৰিব।
ইয়াৰ পূৰ্বে স্বাস্থ্য বিভাগে জাননী জাৰি কৰি মিশ্ৰিত ঔষধৰ নামৰ তালিকা প্ৰকাশ কৰিছিল। এই সমগ্ৰ ঘটনাই সাধাৰণ জনতাৰ মাজত নতুন শংকা বিয়পাই দিছে।
অৱশ্যে ড্ৰাগছ কণ্ট্ৰল বিভাগে আতংকিত হোৱাৰ কোনো কথা নাই বুলি উল্লেখ কৰিছে। নিয়মীয়াকৈ অনুসন্ধান চলি আছে। শীঘ্ৰে ভুৱা ভেকচিন জব্দ কৰা হ’ব বুলি সদৰী কৰিছে।
