বিগত দহ বছৰত কেন্দ্ৰীয় গৃহ মন্ত্ৰণালয়ে দেশৰ পৰা মাওবাদী নিৰ্মূল কৰিবলৈ ধাৰাবাহিক পদক্ষেপ হাতত লৈছে। কেন্দ্ৰীয় গৃহমন্ত্ৰী অমিত শ্বাহে উল্লেখ কৰিছে যে প্ৰধানমন্ত্ৰী নৰেন্দ্ৰ মোদী চৰকাৰে ২০২৬ চনৰ ৩১ মাৰ্চৰ ভিতৰত দেশৰ পৰা মাওবাদীক সম্পূৰ্ণৰূপে নিৰ্মূল কৰিব বুলি দাবী কৰিছে। এইবাৰ পৰিসংখ্যা দেখুৱাই শ্বাহে কয় কেন্দ্ৰৰ কঠোৰ পদক্ষেপৰ ফলত দেশত ‘মাওবাদীৰ কবলত থকা জিলা’ৰ সংখ্যা ১২ৰ পৰা কমি ৬লৈ নামিছে।
মঙলবাৰে এক্সৰ এটা পোষ্টত ‘নক্সালমুক্ত ভাৰত’ৰ প্ৰতিশ্ৰুতি দি শ্বাহে লিখিছে যে “নক্সালবাদীৰ বিৰুদ্ধে কঠোৰ পদক্ষেপ আৰু সৰ্বাঙ্গীণ উন্নয়নৰ কাৰ্যসূচীৰ জৰিয়তে এখন শক্তিশালী, নিৰাপদ আৰু সমৃদ্ধ ভাৰত গঢ়ি তুলিব। ২০২৬ৰ ৩১ মাৰ্চৰ ভিতৰত নক্সালবাদ নিৰ্মূল কৰিবলৈ চৰকাৰ দৃঢ়প্ৰতিজ্ঞ। গৃহ মন্ত্ৰণালয়ৰ তথ্য অনুসৰি, ২০২৪ চনত নিৰাপত্তা বাহিনীৰ সৈতে সংঘৰ্ষত ২০৭ জন মাওবাদী নিহত হৈছিল। এই বছৰৰ প্ৰথম তিনি মাহতেই সেই সংখ্যা প্ৰায় পাৰ হৈ গৈছে।
প্ৰসংগক্ৰমে বিগত জানুৱাৰীত সংসদৰ শীতকালীন অধিবেশনত কেন্দ্ৰীয় গৃহ প্ৰতিমন্ত্ৰী নিত্যানন্দ ৰায়ে এটা প্ৰশ্নৰ উত্তৰত কৈছিল যে ২০১০ চনত ১০খন ৰাজ্যৰ ১২৬ খন জিলা ক্সালবাদী অধ্যুষিত বুলি চিহ্নিত কৰা হৈছিল। এতিয়া সেই সংখ্যা কমি ৩৮লৈ নামিছে। কিন্তু মাত্ৰ দুমাহৰ ভিতৰতে মাওবাদী অধ্যুষিত জিলাৰ সংখ্যা ‘১২ৰ পৰা ৬লৈ কেনেকৈ নামিল’ তাক লৈ প্ৰশ্ন উত্থাপিত হৈছে।
গৃহ মন্ত্ৰণালয়ৰ সূত্ৰই জনোৱা মতে, মাওবাদী প্ৰভাৱিত জিলাবোৰক দুটা শ্ৰেণীত ভাগ কৰা হৈছে— ‘গুৰুতৰ’ আৰু ‘উদ্বেগজনক’। শ্বাহে সম্ভৱত কেৱল ‘গুৰুতৰভাৱে মাওবাদী অধ্যুষিত জিলা’ৰ কথাই বুজাব খুজিছিল বহুজনে মত প্ৰকাশ কৰিছে।
