বড়োলেণ্ড টেৰিটৰিয়েল কাউন্সিলত আনুষ্ঠানিকভাৱে মুকলি কৰা হৈছে “এলটাৰনেটিভ পাৰ্টি অৱ বড়োলেণ্ড” নামৰ এটা নতুন ৰাজনৈতিক দল। নেশ্যনেল ডেম’ক্ৰেটিক ফ্ৰণ্ট অৱ বড়োলেণ্ডৰ প্ৰাক্তন নেতাসকলৰ পৃষ্ঠপোষকতাত এই দলটো গঠন কৰা হৈছে।
উদ্ধোধনি অনুষ্ঠানত ভাষণ দি নৱনিযুক্ত সভাপতি তথা মুখ্য পৃষ্ঠপোষক অঞ্জলি দৈমাৰীয়ে কয় যে বড়ো শান্তি চুক্তিৰ অসম্পূৰ্ণ ৰূপায়ণক লৈ ক্ৰমাৎ বৃদ্ধি পোৱা অসন্তুষ্টিৰ বাবেই দলটো গঠন কৰা হৈছে মত প্ৰকাশ কৰে। তেওঁ দাবী কৰে যে চুক্তিখন ফলপ্ৰসূভাৱে কাৰ্যকৰী হোৱা নাই, যাৰ ফলত বড়োসম্প্ৰদায়ৰ ভিতৰত বহুতো অমীমাংসিত সমস্যা ৰৈ গৈছে।
বৰ্তমানৰ প্ৰশাসনৰ শক্তিশালী বিকল্প হিচাপে নিজকে উপস্থাপন কৰাৰ স্বাৰ্থত আগন্তুক বিটিচি নিৰ্বাচনত প্ৰতিদ্বন্দ্বিতা কৰাৰ সিদ্ধান্তও ঘোষণা কৰিছে দলটোৱে।
দৈমাৰীয়ে বিটিচি চৰকাৰক সমালোচনা কৰি বড়ো জনসাধাৰণৰ ন্যায় আৰু নিৰাপত্তা সুনিশ্চিত কৰাত ব্যৰ্থ হোৱাৰ অভিযোগ উত্থাপন কৰে। তেওঁ কাৰাগাৰত থকা এনডিএফবিৰ সদস্যসকলক মুকলি কৰি দিয়াটো চৰকাৰে অগ্ৰাধিকাৰ দিয়া নাই বুলিও অভিযোগ কৰে।
এই আনুষ্ঠানিক ঘোষণা মুছলপুৰৰ বৰবৰীৰ এন ডি এফ বিৰ শিবিৰত ২১ জনীয়া এখন কমিটী গঠন কৰা হয়। প্ৰধান নিযুক্তিসমূহৰ ভিতৰত প্ৰদীপ কুমাৰ ব্ৰহ্মক প্ৰশাসনিক সম্পাদক আৰু জগদীশ বসুমতাৰীক সাংগঠনিক সম্পাদক নিযুক্তি দিয়া হৈছে।
