লোকসভাত ৩ এপ্ৰিল বৃহস্পতিবাৰে গৃ্হীত হ’ল ৱাকফ সংশোধনী বিধেয়ক। বুধবাৰে কেন্দ্ৰীয় মন্ত্ৰী কিৰেন ৰিজিজুৱে এই বিতৰ্কিত বিধেয়কখন উত্থাপন কৰিছিল। ১২ ঘণ্টাৰো অধিক বিতৰ্কৰ পিছত ২৮৮ জন সাংসদে বিধেয়ক খনৰ পক্ষত আৰু ২৩২ জনে বিপক্ষত ভোট দান কৰিছিল।
কেন্দ্ৰীয় মন্ত্ৰী ৰিজিজুৱে কয় যে এই আইনে মুছলমানৰ ধৰ্মীয় অধিকাৰত হস্তক্ষেপ নকৰে, কেৱল সম্পত্তিৰ ব্যৱস্থাপনাৰ সৈতে জড়িত। ইফালে গৃহমন্ত্ৰী অমিত শ্বাহে ৱাকফ সন্দৰ্ভত মত প্ৰকাশ কৰি কয় যে প্ৰস্তাৱিত সংশোধনীৰ জৰিয়তে মুছলমানসকলৰ ধৰ্মীয় কাম-কাজ বা তেওঁলোকে উচৰ্গা কৰা সম্পত্তিত হস্তক্ষেপ হ’ব বুলি এক বৃহৎ ভুল ধাৰণা আছে।
আনহাতে বিৰোধীপক্ষই ৱাকফ সংসোধনীৰ তীব্ৰ বিৰোধ প্ৰদৰ্শন কৰে। বিধেয়কখনক সমালোচনা কৰি কংগ্ৰেছৰ সাংসদ গৌৰৱ গগৈয়ে ইয়াক সংবিধানৰ মৌলিক গাঁথনিৰ ওপৰত আক্ৰমণ বুলি অভিহিত কৰে।
তৃণমূলৰ কল্যাণ বেনাৰ্জীয়ে এই আইনক মুছলমানৰ ধৰ্মীয় অধিকাৰৰ লঙ্ঘন। কংগ্ৰেছৰ কে চি বেনুগোপালে বিজেপিক সংখ্যালঘুৰ ওপৰত আক্ৰমণৰ অভিযোগ উত্থাপন কৰে। কেৰালাৰ বিপ্লৱী সমাজবাদী পাৰ্টিৰ সাংসদ এন কে প্ৰেমচন্দ্ৰনে কয়, যে চৰকাৰে ৱাকফ ব’ৰ্ডত অমুছলমান সদস্য থকাটো বাধ্যতামূলক কৰিছে। মন্দিৰৰ দেৱস্বম ব’ৰ্ডৰ ক্ষেত্ৰতো একেই কথা ক’বনে বুলি প্ৰশ্ন কৰে।আইএমআইএমৰ আছাদুদ্দিন ওৱেইচিয়ে বিধেয়কৰ প্ৰতিলিপি ফালি প্ৰতিবাদ কৰে। বিৰোধীৰ সমালোচনক নেওচি শাসক পক্ষই কেৰালাৰ মুনাম্বাম-ৱাকফ বিবাদ সমাধানত এই বিধেয়কে সহায় কৰিব বুলি মত প্ৰকাশ কৰিছে।
উল্লেখ্য যে ৱাকফৰ সম্পত্তিৰ নিয়ন্ত্ৰণৰ ক্ষেত্ৰত ১৯৯৫ চনৰ ৱাকফ আইন সংশোধনৰ প্ৰস্তাৱ দিয়া এই বিধেয়কখন প্ৰথমবাৰৰ বাবে ২০২৪ চনৰ আগষ্ট মাহত লোকসভাত উত্থাপন কৰা হৈছিল।ইয়াৰ পিছত ইয়াক যুটীয়া সংসদীয় সমিতিলৈ প্ৰেৰণ কৰা হয়। আৰু সমিতিয়ে বিধেয়কখনত কিছু সংশোধনীৰ পৰামৰ্শ গ্ৰহণ কৰিছিল।
প্ৰসংগ ক্ৰমে ৱাকফে ইছলামিক আইনৰ অধীনত বিশেষভাৱে ধৰ্মীয় বা দাতব্য উদ্দেশ্যত উৎসৰ্গিত সম্পত্তিক বুজায়। ভাৰতত ৱাকফৰ সম্পত্তিৰ প্ৰশাসন নিয়ন্ত্ৰণৰ বাবে ১৯৯৫ চনৰ ৱাকফ আইন প্ৰণয়ন কৰা হৈছিল।
