ভাৰতৰ কেন্দ্ৰীয়শাসিত অঞ্চল আন্দামানৰ অংশ হৈছে নৰ্থ চেন্টিনেল দ্বীপ। এই দ্বীপত বাস কৰে আদিবাসী সম্প্ৰদায়ৰ লোকে। প্ৰযুক্তি-বিদ্যা বা আধুনিক সভ্যতাৰ পোহৰ পৰা নাই এই দ্বীপটোত। এতিয়াও আদিম মানুহৰ দৰে চিকাৰ কৰি, গছপাত বা জন্তুৰ ছাল পৰিধান কৰি জীৱন নিৰ্বাহ কৰে নৰ্থ চেন্টিনেলত বাস কৰা আদিবাসী লোকসকলে।
এই দ্বীপটোত পৰ্যটকৰ ভ্ৰমণ নিষিদ্ধ। এই দ্বীপত যাতে কোনেও প্ৰৱেশ কৰিব নোৱাৰে, তাৰ ওপৰত তীক্ষ্ণ নজৰ ৰাখে ভাৰত চৰকাৰে। কিন্তু ভাৰত চৰকাৰ আৰক্ষী-প্ৰশাসনৰ চকুত ধূলি দি শেহতীয়াকৈ এই দ্বীপত প্ৰৱেশ কৰিলে এগৰাকী মাৰ্কিন যুৱকে।
আমেৰিকাৰ এই ২৪ বছৰীয়া যুৱকজনৰ নাম মিখাইলো পলিয়াকোভ। যোৱা ৩১ মাৰ্চত চি আই ডিয়ে তেওঁক গ্ৰেপ্তাৰ কৰে।
অভিযোগ অনুসৰি, মিখাইলোৱে এখন নাও লৈ আদিবাসী সকলৰ বাবে সংৰক্ষিত তথা নিষিদ্ধ অঞ্চল নৰ্থ চেণ্টিনেল দ্বীপলৈ গৈছিল। তেওঁৰ হাতত নাছিল কোনো বৈধ অনুমতি পত্ৰ।
জানিব পৰা মতে, ২৬ মাৰ্চত প’ৰ্ট ব্লেয়াৰত উপস্থিত হোৱা আমেৰিকান যুৱকজনে ২৯ মাৰ্চৰ পুৱা ১ বজাত কুৰ্মা ডেৰা বিচৰ পৰা যাত্ৰা আৰম্ভ কৰিছিল। চেন্টিনেলত বাস কৰা আদিবাসী সকলক খুৱাবলৈ তেওঁ নাৰিকল আৰু শীতল পানীয়ও লৈ গৈছিল বুলি আৰক্ষীয়ে জানিবলৈ দিছে।
৩০ মাৰ্চৰ পুৱা ১০ বজাত নৰ্থ চেণ্টিনেল দ্বীপত উপস্থিত হয় যুৱকজন। আৰক্ষীয়ে জনোৱা মতে, তেওঁ বাইনোকুলাৰেৰে সমগ্ৰ অঞ্চলটো চাইছিল। কিন্তু তেওঁ দ্বীপটোত কাকো দেখা পোৱা নাছিল। আমেৰিকান যুৱকজনে সাগৰৰ পাৰত এঘণ্টা ধৰি অপেক্ষা কৰিছিল।
আৰক্ষীয়ে জনোৱা মতে, তেওঁ ৫ মিনিটৰ বাবে দ্বীপটোলৈ গৈছিল। তেওঁ সাগৰৰ বালিৰ নমুনা সংগ্ৰহ কৰা লগতে লগত লৈ যোৱা খাদ্যখিনি তাত থৈ আহিছিল আৰু তাৰ পিছত নাওখনলৈ উভতি অহাৰ আগতে এটা ভিডিঅ’ বনাইছিল।
৩০ মাৰ্চৰ সন্ধিয়া প্ৰায় ৭ বজাত যুৱকজনে কুৰ্মা ডেৰা বিললৈ উভতি আহিছিল। তেতিয়াই তেওঁক স্থানীয় মাছমৰীয়াই প্ৰত্যক্ষ কৰিছিল। মাছমৰীয়া সকলৰ পৰাই কথাটো আৰক্ষীয়ে জানিবলৈ পাৰিছিল।
ইতিমধ্যে যুৱকজনক গ্ৰেপ্তাৰ কৰি তেওঁ কিয় দ্বীপটোলৈ গৈছিল সেই কথা জানিবলৈ চেষ্টা চলাইছে আৰক্ষীয়ে। তদন্তকাৰীয়ে যুৱকজনৰ কোনো নিৰ্দিষ্ট উদ্দেশ্য আছিল নেকি সেইটো নিৰ্ণয় কৰিবলৈ জেৰা কৰি আছে। অৱশ্যে আৰক্ষী নিশ্চিত যে আমেৰিকান যুৱকজনে নিজৰ ভ্ৰমণৰ পৰিকল্পনা ভালদৰে কৰিছিল। গোটেই যাত্ৰাত তেওঁ জিপিএছ প্ৰযুক্তি ব্যৱহাৰ কৰিছিল।আৰক্ষীয়ে জনোৱা মতে, যোৱা অক্টোবৰ মাহতো এবাৰ আন্দামানলৈ গৈছিল যুৱকজন। আৰক্ষীয়ে যুৱকজনৰ পৰা কেমেৰা আৰু অন্যান্য সামগ্ৰী জব্দ কৰিছে। বৰ্তমান যুৱকজন আৰক্ষীৰ জিম্মাতে আছে।
