তামিলনাডুৰ টুটিকোৰিনৰ জিলা আদালতে আৰক্ষীৰ জিম্মাত থকা অৱস্থাত এজন লোকৰ মৃত্যুৰ ঘটনাত ৯ জন লোকক যাৱজ্জীৱন কাৰাদণ্ডৰ শাস্তি প্ৰদান কৰিছে। শাস্তি পোৱাসকলৰ ভিতৰত আছে ডি এছ পি পৰ্যায়ৰ এজন বিষয়াও। বাকী সকলো প্ৰাক্তন আৰক্ষী কৰ্মী।
১৯৯৯ চনত টুটিকোৰিন জিলাৰ থালামুথু থানাত আৰক্ষীৰ জিম্মাত এজন ব্যক্তিৰ মৃত্যু হয়। সেই ব্যক্তিজনৰ নাম ভিনচেণ্ট। তেওঁ আৰু তেওঁৰ পত্নী কৃষ্ণমল আলংগাৰথাট্টুৰ বাসিন্দা আছিল।
ভিনচেণ্টক এটা গোচৰৰ সৈতে জড়িত থকাৰ অভিযোগত সোধা-পোছাৰ বাবে থালামুথু থানালৈ অনা হয়। জেৰাৰ বাবে অনাৰ পিছদিনা ভিনচেণ্টৰ মৃত্যু হয়। সেই সময়ত সন্দেহজনক মৃত্যুক লৈ প্ৰতিক্ৰিয়াৰ সৃষ্টি হৈছিল।
কৃষ্ণম্মালে দাবী কৰে যে আৰক্ষীৰ নিৰ্যাতনৰ বাবে স্বামীৰ জিম্মাত মৃত্যু হয়। মৃতকৰ পত্নীৰ অভিযোগৰ ভিত্তিত তদন্ত আৰম্ভ কৰা হয়। তদন্তৰ প্ৰতিবেদনত কোৱা হৈছে যে আৰক্ষীৰ জিম্মাত নিৰ্যাতনৰ বাবে ভিনচেণ্টৰ মৃত্যু হৈছিল। তেওঁক নিৰ্মমভাৱে লাঠিৰে প্ৰহাৰ কৰা হয়। যাৰ বাবে শৰীৰত একাধিক আঘাতৰ চিন পোৱা যায়।
আৰক্ষীৰ জিম্মাত থকা অৱস্থাত মৃত্যুৰ সৈতে জড়িত ১১জন লোকৰ বিৰুদ্ধে গোচৰ চলি আছিল। প্ৰায় ২৬ বছৰ ধৰি চলি থকা এই গোচৰৰ শনিবাৰে ৰায়দান কৰে। আদালতৰ ন্যায়াধীশে পৰ্যবেক্ষণ কৰে যে ১৯৯৯ চনৰ ১৮ ছেপ্টেম্বৰৰ দুপৰীয়া ১:৩০ বজাৰ পৰা ৭:৩০ বজাৰ ভিতৰত তেওঁৰ মৃত্যু হৈছিল।
চিকিৎসা প্ৰমাণ অনুসৰি আৰক্ষীৰ জিম্মাত তেওঁ অকথ্য নিৰ্যাতনৰ বলি হৈছিল। গতিকে এইটো হৈছে জিম্মাত ঘটা মৃত্যু। ইয়াৰে ২ জন অভিযুক্তক মুকলি কৰি দিছে আৰক্ষীয়ে। বাকী ৯ জনক যাৱজ্জীৱন কাৰাদণ্ডৰ লগতে ১০ হাজাৰ টকাকৈ জৰিমনা বিহা হয়। আটাইকেইজন অভিযুক্ত আৰক্ষীকৰ্মীয়ে ইতিমধ্যে অৱসৰ গ্ৰহণ কৰিছে। এজন এতিয়াও ডি এছ পি পদৰ বিষয়া। ঘটনাৰ সময়ত তেওঁ এজন পৰিদৰ্শক আছিল।
