অসমৰ নাগৰিক সমাজৰ হৈ হীৰেন গোহাঁই, হৰেকৃষ্ণ ডেকা, অজিত কুমাৰ ভূঞা, আব্দুল মান্নান, পৰেশ মালাকাৰ আৰু শান্তনু বৰঠাকুৰে সংবাদ মাধ্যমলৈ এক বিবৃতি প্ৰেৰণ কৰিছে। বিবৃতিটোৰ দ্বাৰা বিৰোধী ৰাজনৈতিক দল সমূহক এক অনুৰোধ জনাইছে কেইগৰাকীমান বিশিষ্ট ব্যক্তিয়ে – তলত বিবৃতিটো হুবহু সংলগ্ন কৰা হ’ল
“অসমত কি এক নৈৰাজ্য চলি আছে আমি সকলোৱে দেখি আছোঁ। এতিয়া নীতি-নিয়ম, আইন-কানুনৰ কোনো কথা নাই। মুখ্যমন্ত্ৰীজনৰ মুখৰ কথাই আইন।জনসাধাৰণৰ হিতৰ বাবে সুচিন্তিত পদক্ষেপ গ্ৰহণ কৰাৰ কথা নাই। সকলো চৰকাৰী আঁচনিৰ উদ্দেশ্য এটাই, চৰকাৰী পইচাৰে শাসকীয় দলৰ হৈ ভোট কিনা।চৰকাৰে এফালে সমূহীয়া বিহু নাচ, ঝুমুৰ নৃত্য আদিৰ দৰে অনুষ্ঠানৰ আয়োজন কৰি কোটি কোটি টকা অপচয় কৰিছে আৰু আনফালে মূল্যবৃদ্ধি, কৰ্মসংস্থান আদিৰ দৰে মানুহৰ জীৱনৰ মূল
সমস্যাসমূহ সম্পূৰ্ণৰূপে আওকাণ কৰিছে। আনকি ৰাজ্যিক কৰ্মচাৰীৰ দৰমহাই সময় মতে মোকলাই দিব পৰা নাই। ৰাজ্যখনৰ ঋণৰ বোজা দিনক দিনে বাঢ়ি গৈয়ে আছে। ঋণ লৈছে অদৰকাৰী খৰচ কৰিবলৈ। এই কথাবোৰ আজি-কালি সাধাৰণ মানুহেও বুজি পায়।সমস্যা এটাই, জনসাধাৰণৰ এই ক্ষোভক এটা ৰাজনৈতিক পৰিণতি লৈ ৰূপান্তৰিত কৰিবলৈ বিৰোধী ৰাজনৈতিক দলবোৰ যি ধৰণে ঐক্যবদ্ধ হৈ আগ বাঢ়িব লাগিছিল সেইটো এতিয়াও হৈ উঠা নাই। তেনে সময়তে পঞ্চায়ত নিৰ্বাচন ঘোষণা কৰা হৈছে। পঞ্চায়ত নিৰ্বাচনত বিৰোধী দলসমূহে কেনেকৈ অৱতীৰ্ণ হ’ব? বিজেপিৰ বিৰুদ্ধে ঐক্যবদ্ধ যুঁজ দিয়াৰ সলনি তেওঁলোকে যদি সকলোৱে সকলোৰে বিৰুদ্ধে প্ৰতিযোগিতাত নামি পৰে তাৰ পৰিণতি কি হ’ব সি সহজে অনুমেয়। তেতিয়া জনসাধাৰণ আকৌ এবাৰ প্ৰতাৰিত হ’ব।এই অৱস্থাত বিৰোধী দলসমূহলৈ আমাৰ বিনম্ৰ অনুৰোধ এটাই, য’তেই সম্ভৱ তাতেই যেন তেওঁলোকে ঐক্যবদ্ধ হৈ আগন্তুক পঞ্চায়ত নিৰ্বাচনত অৱতীৰ্ণ হয়।”
