২৬/১১ৰ মুম্বাই আক্ৰমণৰ অভিযুক্ত তাহাউৰ ৰানাক বিমানৰ পৰা নামি অহাৰ লগে লগে গ্ৰেপ্তাৰ কৰে ৰাষ্ট্ৰীয় তদন্তকাৰী সংস্থাই। বৃহস্পতিবাৰে মাজনিশা দিল্লীৰ পাটিয়ালা হাউছ কোৰ্টত NIAৰ বিশেষ আদালতৰ ন্যায়াধীশৰ সন্মুখত ৰানাক হাজিৰ কৰোৱা হয়।
মুম্বাই আক্ৰমণৰ আঁৰৰ ষড়যন্ত্ৰৰ তদন্তৰ বাবে ৰানাক জিম্মাত জেৰাৰ বাবে অনুৰোধ জনাইছিল নিয়াই। আবেদন মঞ্জুৰ কৰি ন্যায়াধীশে ৰাণাক ১৮ দিনৰ বাবে নিয়াৰ জিম্মালৈ প্ৰেৰণ কৰাৰ নিৰ্দেশ দিয়ে। অৱশ্যে নিয়াই ৰাণাক ২০ দিনৰ বাবে নিজৰ জিম্মাত ল’ব বিচাৰিছিল।
ৰাণাই সন্ত্ৰাসবাদী কাৰ্য সংঘটিত কৰাৰ অপৰাধমূলক ষড়যন্ত্ৰ সংঘটিত কৰা বুলি আদালতৰ আগত নিয়াই কয়। আন ষড়যন্ত্ৰকাৰীৰ লগতো আলোচনা কৰিছিল। ন্যায়াধীশে ৰানাক সোধে যে তেওঁ নিজৰ পক্ষ ল’বলৈ অধিবক্তা নিয়োগ কৰিব নে আদালতে তেওঁক আইনী সহায় আগবঢ়াব?
ৰানা মূলতঃ পাকিস্তানী মূলৰ যদিও বৰ্তমান তেওঁ কানাডাৰ নাগৰিক। ইমান দিনে তেওঁক লছ এঞ্জেলছৰ কাৰাগাৰত বন্দী কৰি ৰখা হৈছিল। অভিযোগ অনুসৰি পাকিস্তানী মূলৰ আন এজন সন্ত্ৰাসবাদী ডেভিদ কলমেন হেডলীৰ সৈতে তেওঁৰ ঘনিষ্ঠ যোগাযোগ আছিল। হেডলীৰ সৈতে ৰাণাই ২৬/১১ৰ মুম্বাই আক্ৰমণৰ ষড়যন্ত্ৰ কৰিছিল। নিষিদ্ধ উগ্ৰপন্থী সংগঠন লস্কৰ-ই-তৈবাৰ সৈতেও তেওঁৰ সম্পৰ্ক আছিল। আন এটা উগ্ৰপন্থী সংগঠন হৰকত-উল-জিহাদী ইছলামী (হুজি)ৰ সৈতেও তেওঁৰ যোগাযোগ আছিল।
বৃহস্পতিবাৰে সন্ধিয়া প্ৰায় ৬:৩০ বজাত ৰাণাৰ সৈতে দিল্লী বিমানবন্দৰত অৱতৰণ কৰে NIAৰ বিষয়াসকলে। বুধবাৰে ৰাণাক ‘জি৫৫০ জেট’ নামৰ বিশেষ বিমানত আমেৰিকাত উঠোৱা হয়। আমেৰিকাৰ পৰা ভাৰত অভিমুখী বিমানখন বুধবাৰে নিশা প্ৰায় ৯:৩০ বজাত ৰোমানিয়াৰ বুখাৰেষ্টত অৱতৰণ কৰে। ১১ ঘণ্টা তাত ৰখোৱাৰ পিছত বৃহস্পতিবাৰে ভাৰতীয় সময় অনুসৰি পুৱা ৮:৪৫ বজাত বিমানখন ভাৰত অভিমুখে ৰাওনা হয়। ৰাণাক কঢ়িয়াই অনা বিমানখন সন্ধিয়া ৬:৩০ বজাত দিল্লী বিমানবন্দৰত অৱতৰণ কৰে।
ৰাণাক ভাৰতলৈ ঘূৰাই অনাৰ পাছত ৰাষ্ট্ৰীয় তদন্তকাৰী সংস্থাই এক বিবৃতি প্ৰকাশ কৰি কয় যে ২০০৮ চনৰ সন্ত্ৰাসবাদী আক্ৰমণৰ মাষ্টাৰমাইণ্ড ৰাণা! নিয়াৰ এক বিবৃতিত কোৱা হৈছে যে, “২৬/১১ৰ মুম্বাই সন্ত্ৰাসবাদী আক্ৰমণৰ মাষ্টাৰমাইণ্ড তাহাউৰ হুছেইন ৰানাক বৃহস্পতিবাৰে ভাৰতলৈ ঘূৰাই অনা হয়। ২০০৮ চনৰ ঘটনাৰ মাষ্টাৰমাইণ্ডক বিচাৰৰ মাজলৈ আনিবলৈ কেইবাবছৰ ধৰি প্ৰচেষ্টা অব্যাহত আছিল।” প্ৰাথমিকভাৱে খবৰ পোৱা গৈছে যে ৰাণাক দিল্লীৰ তিহাৰ কাৰাগাৰত ৰখা হ’ব। সেই কাৰণে তাত নিৰাপত্তা কটকটীয়া কৰা হৈছে।
ইতিমধ্যে নিয়াৰ মুখ্য কাৰ্যালয়ত ৰাণাক জেৰা কৰিবলৈ এটা বিশেষ কক্ষ স্থাপন কৰা হৈছে। প্ৰথমতে সিদ্ধান্ত লোৱা হৈছে যে পাকিস্তানী মূলৰ কানাডাৰ ব্যৱসায়ীজনক ১২ জন বিষয়াই জেৰা কৰিব। এই ১২ জন লোকৰ ভিতৰত আছে নিয়াৰ ডিজি সদানন্দ ডাটে, আই জি আশীষ বাত্ৰা, ডিআইজি জয়া ৰায়।
ৰাণাক ভাৰতলৈ প্ৰত্যাৰ্পণ কৰাৰ বিষয়ে মুকলিকৈ প্ৰকাশ কৰিছে আমেৰিকাই। আমেৰিকাৰ প্ৰতিৰক্ষা বিভাগৰ মুখপাত্ৰ টেমি ব্ৰুছে কয় যে, “আমেৰিকাই দীৰ্ঘদিন ধৰি ভাৰতে এনে আক্ৰমণৰ সৈতে জড়িতসকলক ন্যায়ৰ ওচৰলৈ অনাৰ প্ৰচেষ্টাক সমৰ্থন কৰি আহিছে। এতিয়া তেওঁ (ৰানা) ভাৰতৰ হাতত। আমি সন্তুষ্ট।”
ৰাণাই বাৰে বাৰে আমেৰিকাৰ আদালতত আশংকা প্ৰকাশ কৰিছিল যে ভাৰতীয় কাৰাগাৰত তেওঁক অত্যাচাৰ কৰা হ’ব। অৱশ্যে আমেৰিকাৰ সৈতে প্ৰত্যাৰ্পণ চুক্তিৰ চৰ্তসমূহ উলংঘা নহ’ব বুলি ভাৰতে আশ্বাস দিছে। নতুন দিল্লীয়ে জনাইছে যে কাৰাগাৰতো ৰাণা সুৰক্ষিত থাকিব।
