ৱাকফ বিলৰ পিছত ডিজিটেল পাৰ্চনেল ডাটা প্ৰটেকচন এক্টক লৈ মোডী চৰকাৰ আৰু ইণ্ডিয়া জোঁটৰ মাজত নতুন সংঘাত আৰম্ভ হ’বলৈ আগবাঢ়িছে।
বৃহস্পতিবাৰে ইণ্ডিয়া জোঁটে অভিযোগ কৰে যে যুটীয়া সংসদীয় সমিতিখনক সম্পূৰ্ণৰূপে অন্ধকাৰত ৰাখি ডিজিটেল ডাটা প্ৰটেকচন এক্টৰ সংশোধনী অনা হৈছে। এনেকুৱা এটা পদক্ষেপ গ্ৰহণ কৰা হৈছে য’ত তথ্যৰ অধিকাৰ আইনখনৰ অন্যতম গুৰুত্বপূৰ্ণ এটা নাগৰিক অধিকাৰ বিলুপ্ত কৰিবলৈ ব্যৱস্থা গ্ৰহণ কৰা হৈছে।
বৃহস্পতিবাৰে দিল্লীত ইণ্ডিয়া মিত্ৰজোঁটে বিৰোধী নেতাসকলৰ স্বাক্ষৰিত এখন স্মাৰক পত্ৰ চৰকাৰক দিয়া হ’ব বুলি প্ৰকাশ কৰে। তথ্য আৰু প্ৰযুক্তি মন্ত্ৰী অশ্বিনী বৈষ্ণৱৰ ওচৰত তথ্যৰ অধিকাৰ আইনখন যাতে এনেদৰে ধ্বংস কৰা নহয় তাৰ বাবে আবেদন জনোৱা হ’ব।
বিৰোধীৰ হৈ কংগ্ৰেছ নেতা গৌৰৱ গগৈয়ে তথ্য জনাৰ অধিকাৰ আইনৰ ৪৪(৩) ধাৰা বাতিল কৰিব লাগে বুলি মন্তব্য কৰে। এই দফাটো ডিজিটেল ডাটা প্ৰটেকচন বিলত অন্তৰ্ভুক্ত কৰা হৈছে। এই ধাৰাটোৰ জৰিয়তে তথ্যৰ অধিকাৰ আইনৰ ধাৰা ৮(১) পৰোক্ষভাৱে অৱজ্ঞা তথা খাৰিজ কৰা হৈছে।
তথ্যৰ অধিকাৰ আইনত উল্লেখ আছে যে যদি কোনো ব্যক্তিগত তথ্যই বৃহত্তৰ প্ৰেক্ষাপটত জনস্বাৰ্থৰ ওপৰত কোনো বিৰূপ প্ৰভাৱ পেলায়, তেন্তে সেই তথ্য প্ৰকাশ কৰিব লাগিব। কিন্তু ডিজিটেল ডাটা প্ৰটেকচন এক্টৰ সেই ধাৰাটো সলনি কৰি কোৱা হৈছে যে কোনো ব্যক্তিগত তথ্য প্ৰকাশ কৰিব নোৱাৰিব। অৰ্থাৎ জনস্বাৰ্থৰ ক্ষতি হ’লেও তথ্য প্ৰকাশ কৰিব নোৱাৰি।
গগৈয়ে কয় যে বিহাৰত প্ৰতিদিনে এখন দলং ভাঙি যোৱাৰ অৰ্থ হ’ল এই বিধেয়কখন গৃহীত হ’লে, কোনোবাই যদি তথ্য জনাৰ অধিকাৰ আইনৰ অধীনত কোনজন ঠিকাদাৰে দলং নিৰ্মাণৰ নিবিদা বা ঠিকা লাভ কৰিছে বা কিমান চুক্তি লাভ কৰিছে সেই কথা জানিব বিচাৰে তেন্তে এই তথ্য প্ৰদান কৰা নহ’ব? কাৰণ ঠিকাদাৰৰ ব্যক্তিগত তথ্য? অৰ্থাৎ এই তথ্য সুৰক্ষা বিধেয়কখন দুৰ্নীতি লুকুৱাবলৈ এক অস্ত্ৰ হ’বলৈ গৈ আছে।
বিৰোধীসকলৰ কয় যে বৰ্তমানৰ তথ্যৰ অধিকাৰ আইনখনে বিকল্প সাংবাদিকতা আৰু সামাজিক এক্টিভিজমৰ জন্ম দিছে। এনেদৰে বহু দুৰ্নীতি আৰু অনিয়ম উদঙাই দিয়া হৈছে। সেইটো ৰোধ কৰিবলৈ সচেষ্ট হৈ পৰিছে কেন্দ্ৰীয় চৰকাৰ।
এই অভিযোগ খণ্ডন কৰিছে তথ্য প্ৰযুক্তি মন্ত্ৰী অশ্বিনী বৈষ্ণৱে। জয়ৰাম ৰমেশলৈ লিখা এখন পত্ৰত মন্ত্ৰীগৰাকীয়ে কয় যে ডিজিটেল তথ্য সুৰক্ষা আইনখনে তথ্যৰ অধিকাৰ আইনখনক কোনো ধৰণৰ প্ৰভাৱ পেলোৱা নাই। বৰঞ্চ এই দুখন আইন ইটোৱে সিটোৰ লগত ভাৰসাম্য আৰু সমন্বয়ৰে কাম কৰি যাব।
উচ্চতম ন্যায়ালয়ৰ ৰায়দানত স্পষ্টকৈ উল্লেখ আছে যে ব্যক্তিগত তথ্যৰ সুৰক্ষাৰ অধিকাৰ সৰ্বোচ্চ অগ্ৰাধিকাৰ। সংবিধানৰ ২১ নং অনুচ্ছেদ অনুসৰি এই অধিকাৰ সুৰক্ষিত হ’ব লাগিব। এই ৰায়দানৰ লগত খাপ খুৱাই তথ্য সুৰক্ষা আইনখন সৃষ্টি কৰা হৈছিল। ইয়াৰ উপৰিও যদি কোনো তথ্য কোনো জনকল্যাণমূলক প্ৰকল্পৰ সৈতে জড়িত, তেন্তে সেই তথ্য প্ৰকাশ কৰিব লাগিব। আগতে যিদৰে আছিল, এতিয়াও সেইদৰে আছে।
অৱশ্যে এই বক্তব্য মানি ল’বলৈ ইচ্ছুক নহয় বিৰোধীয। আনকি আদালতলৈ যোৱাৰ ৰাস্তাও মুকলি আছে, তাৰো ইংগিত দিয়া হৈছে।
