ৰাজস্থানৰ ভিলৱাৰাৰ ৩০ বছৰীয়া ইউ পি এছ চিৰ আকাংক্ষী ৰাজকুমাৰ জাটৰ ৰহস্যজনক মৃত্যুৱে চাঞ্চল্যৰ সৃষ্টি কৰিছে, পৰিয়ালে হত্যাৰ অভিযোগ উত্থাপন কৰি চি বি আইৰ তদন্তৰ দাবী জনাইছে। মৰণোত্তৰ পৰীক্ষাৰ প্ৰতিবেদন অনুসৰি ৰাজকোট-আহমেদাবাদ ঘাইপথত উদ্ধাৰ হোৱা জাটৰ মৃতদেহত ৪০টাতকৈও অধিক আঘাতৰ চিন আছিল, যাৰ ফলত আৰক্ষীয়ে পথ দুৰ্ঘটনা বুলি দাবী কৰাৰ পিছতো হত্যাৰ সন্দেহৰ কৰিছে পৰিয়ালে।
ৰাজকুমাৰৰ পিতৃ ৰতনলাল জাটে বিধায়ক গীতাবা জয়ৰাজসিং জাডেজাৰ পুত্ৰ জ্যোতিৰাদিত্যসিং জাদেজা (উৰফে গণেশ) আৰু তেওঁৰ সহযোগীসকলে হত্যাৰ ষড়যন্ত্ৰ কৰাৰ অভিযোগ উত্থাপন কৰিছে। ৰতনলালে অভিযোগ কৰে যে যোৱা ২ মাৰ্চত বিধায়কগৰাকীৰ বাসগৃহৰ সমীপত তেওঁ আৰু তেওঁৰ পুত্ৰক আক্ৰমণ কৰা হৈছিল আৰু তাৰ পিছত ৰাজকুমাৰ নিৰুদ্দেশ হৈছিল। পৰিয়ালৰ দাবী, আৰক্ষীয়ে চিচিটিভি ফুটেজ আৰু মৰণোত্তৰ পৰীক্ষাকে ধৰি প্ৰমাণৰ লগত খেলা কৰাৰ লগতে বাৰে বাৰে অভিযোগ উত্থাপন হোৱাৰ পিছতো এফআইআৰ ৰুজু কৰা নাই।
বিষয়টো তীব্ৰতৰ হৈ পৰাত ৰাজস্থানৰ সাংসদ হনুমান বেনিৱাল আৰু স্থানীয় জনসাধাৰণে ন্যায় বিচাৰিছে। পৰিয়ালটোক প্ৰতিনিধিত্ব কৰা অধিবক্তা জয়ন্ত মুণ্ডে কয় যে ৰাজকুমাৰ শৰীৰৰ আঘাতে বৰ্বৰতাকহে আঙুলিয়াই দিছে এয়া দুৰ্ঘটনা নহয় বুলি উল্লেখ কৰাৰ লগতে সত্য উন্মোচন কৰিবলৈ চিবিআইৰ তদন্তৰ দাবী কৰিছে।
চিচিটিভিৰ প্ৰমাণৰ উদ্ধৃতি দি আৰক্ষীয়ে ৰাজকুমাৰক বাছে খুন্দা মৰা বুলি জোৰ দিয়ে যদিও পৰিয়ালটোৱে এই কথাত একমত নহয় আৰু তদন্তত অনিয়মৰ অভিযোগ উত্থাপন কৰিছে। ৰাজকুমাৰৰ মৃত্যু আকস্মিক হওক বা ইচ্ছাকৃতভাৱে হওক, তেওঁৰ ন্যায় সুনিশ্চিত কৰিবলৈ কৰ্তৃপক্ষক আহ্বান জনাই ভিলৱাৰা আৰু গণ্ডালত প্ৰতিবাদ অব্যাহত ৰাখিছে।
