চলন্ত গাড়ীতে এগৰাকী বিউটিচিয়ানক ধৰ্ষণৰ চেষ্টা লক্ষ্ণৌত। বাধা দিবলৈ চেষ্টা কৰাৰ সময়তে ডিঙিত ছুৰীৰে আঘাত কৰা হয়। তেওঁৰ ভগ্নীকো ধৰ্ষণৰ চেষ্টা কৰা হৈছিল। ঘটনাত যুৱতীগৰাকীৰ মৃত্যু হয়। গাড়ীখনো পিছত দুৰ্ঘটনাৰ সন্মুখীন হয়। এই পৰ্যন্ত দুজন লোকক গ্ৰেপ্তাৰ কৰা হৈছে। এজন পলাতক হৈ আছে।
বিয়াত মেহেন্দি লগোৱাৰ বাবে সুধাংশু নামৰ এজন ব্যক্তিয়ে ২৬ বছৰীয়া বিউটিচিয়ানগৰাকীক বুকিং কৰিছিল। যুৱতীগৰাকীয়ে ভনীয়েকৰ লগত মেহেন্দি লগাই দিবলৈ যায়। সুধাংশুৱে তেওঁলোকৰ ঘৰলৈ গাড়ী পঠায়।
ৰাতি হৈ কাম শেষ হোৱাত সুধাংশুৱে দুই ভগ্নীক ঘৰলৈ পঠিওৱাৰ নামত গাড়ীত উঠাই লয়। যদিও সুধাংশু তাত নাছিল। অজয়, বিকাশ আৰু আদৰ্শ নামে তিনিজন যুৱক আছিল।
এইবাৰ অঞ্চলটো পাৰ হৈ যোৱাৰ পিছত যুৱক তিনিজনে চলন্ত গাড়ীত থকা দুয়োজনৰে ওপৰত জপিয়াই পৰে। ধৰ্ষণৰ চেষ্টা চলায়। সিহঁতে বাধা দিবলৈ চেষ্টা কৰাত বিউটিচিয়ানৰ ডিঙিত ছুৰীৰে আঘাত কৰা হয়। তেওঁৰ মৃত্যু হয়।
মৃতকৰ ভগ্নীয়ে অভিযোগ কৰে যে, “তেওঁলোকে চলন্ত গাড়ীত উঠি বাইদেউ আৰু মোক যৌন নিৰ্যাতন চলাবলৈ চেষ্টা কৰিছিল। বাইদেউৱো বাধা দিওঁতে অজয় নামৰ এজন যুৱকে তাইৰ ডিঙিত ছুৰীৰে আঘাত কৰিলে।”
গাড়ীৰ ভিতৰত হোৱা হতাহতিৰ সময়ত সেইখন ডিভাইডাৰত খুন্দা মাৰি ওলটি পৰে। দুয়োগৰাকী ভনীয়েক গাড়ীৰ তলত আবদ্ধ হৈ পৰে। ওচৰৰ গাঁৱৰ মানুহে তেওঁলোকৰ চিঞৰ শুনি তেওঁলোকক সহায় কৰিবলৈ আগবাঢ়ি আহে। তেতিয়ালৈকে তিনিওজন অভিযুক্তই পলায়ন কৰিছিল। পলায়ন কৰাৰ আগতে মৃতকৰ ভগ্নীক ভাবুকি দিছিল – যদি তাই আৰক্ষীক সকলো কথা কয় তেন্তে গোটেই পৰিয়ালটোকে হত্যা কৰিব।
এই ঘটনা জানিব পাৰি বিউটিচিয়ানগৰাকীৰ স্বামী বান্থৰা থানাৰ কাষ চাপে। তাত অভিযোগ দাখিল কৰে। আৰক্ষীয়ে গোচৰ ৰুজু কৰি তদন্ত আৰম্ভ কৰিছে। মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে।
ইতিমধ্যে এই গোচৰত বিকাশ আৰু আদৰ্শক আৰক্ষীয়ে গ্ৰেপ্তাৰ কৰাৰ বিপৰীতে অজয় এতিয়াও পলাতক হৈ আছে। শীঘ্ৰে তেওঁক বিচাৰি উলিওৱাৰ আশ্বাস দিছে এডিচিপি বিকাশ পাণ্ডেই।
