দ্ৰাবিড়া মুনেত্ৰ কাঝাগাম (ডিএমকে) নেতৃত্বাধীন তামিলনাডু চৰকাৰে ২০২১ চনৰ মে’ মাহত ক্ষমতালৈ অহাৰ পিছত দেওবাৰে (২৭ এপ্ৰিল) ষষ্ঠবাৰৰ বাবে কেবিনেট সালসলনিৰ কথা ঘোষণা কৰে।
ক্ৰমে আইনী প্ৰতিক্ৰিয়া আৰু জনসাধাৰণৰ সমালোচনাৰ সন্মুখীন হোৱা মন্ত্ৰী ভি ছেন্থিল বালাজী আৰু কে পনমুডীয়ে মন্ত্ৰীপদৰ পৰা পদত্যাগ কৰাৰ ফলত এই সালসলনিৰ কৰা হৈছে।
মন্ত্ৰীসভাত নতুন মুখ অন্তৰ্ভুক্ত হ’ব পাৰে বুলি জল্পনা-কল্পনা চলিছিল যদিও এটা ব্যতিক্ৰম বাদ দি বৰ্তমানৰ মন্ত্ৰীসকলৰ পৰ্টফলিঅ’ সালসলনি কৰা হৈছে।
পূৰ্বৰ সংশোধনৰ সময়ত অপসাৰণ কৰা প্ৰাক্তন মন্ত্ৰী পদ্মনাভন মনো থাংগৰাজক পুনৰ নিযুক্তি দিয়া হৈছে যদিও সদ্যহতে কোনো পৰ্টফলিঅ’ প্ৰদান কৰা নাই।
সোমবাৰে (২৮ এপ্ৰিল) সন্ধিয়া ৬ বজাত ৰাজভৱনত অনুষ্ঠিত হ’ব লগা শপতগ্ৰহণ অনুষ্ঠানত নতুন নিযুক্তি সম্পৰ্কে আনুষ্ঠানিক ঘোষণা কৰা হ’ব।
দৰাচলতে, মন্ত্ৰীসভাৰ এই সালসলনিত উচ্চতম ন্যায়ালয়ৰ ককৰ্থনা আৰু জনতাৰ ৰোষৰ প্ৰতিফলন ঘটিছে।
জামিনত বাহিৰত থকা অৱস্থাত কাৰ্যভাৰ অব্যাহত ৰখাক লৈ উচ্চতম ন্যায়ালয়ৰ তীব্ৰ সমালোচনাৰ পিছতে ছেন্থিল বালাজীয়ে পদ ত্যাগ কৰে।
যোৱা ২৩ এপ্ৰিলত ন্যায়াধীশ অভয় এছ ওকা আৰু আগাষ্টাইন জৰ্জ মাছিহক লৈ গঠিত দুজনীয়া বিচাৰপীঠে বালাজীক মন্ত্ৰী হিচাপে পদ অব্যাহত ৰখা বা চাকৰিৰ বিনিময়ত নগদ ধন কেলেংকাৰীৰ গোচৰত দিয়া জামিন অটুট ৰখাৰ ভিতৰত এটা বাছি ল’বলৈ চূড়ান্ত সকীয়নি দিয়ে।
বিচাৰপীঠে উল্লেখ কৰে যে তেওঁ আৰু মন্ত্ৰী পদ ধৰি নাৰাখিব বুলি বিশ্বাস ৰাখিয়েই জামিন প্ৰদান কৰা হৈছিল।
উল্লেখ্য যে ২০১১ চনৰ পৰা ২০১৫ চনৰ ভিতৰত এ আই এ ডি এম কে চৰকাৰত পৰিবহণ মন্ত্ৰী হিচাপে থকা সময়ছোৱাত উৎকোচ গ্ৰহণ কৰাৰ অভিযোগত ২০২৩ চনৰ জুন মাহত বলবৎকাৰী সঞ্চালকালয়ে (ইডি) তেওঁক গ্ৰেপ্তাৰ কৰিছিল। ২০১৮ চনত ডি এম কেত যোগদান কৰাৰ পিছত তেওঁক বিদ্যুৎ তথা নিবাৰণ আৰু আবকাৰী মন্ত্ৰী হিচাপে নিযুক্তি দিয়া হৈছিল।
গ্ৰেপ্তাৰৰ পিছত যদিও তেওঁ পদত্যাগ কৰিছিল, ২০২৪ চনৰ ছেপ্টেম্বৰ মাহত জামিনত মুকলি হোৱাৰ পিছত তেওঁক পুনৰ নিযুক্তি দিয়া হৈছিল। এই পদক্ষেপৰ বাবে উচ্চতম ন্যায়ালয়ৰ সমালোচনাৰ সন্মুখীন হৈছিল। আদালতে উদ্বেগ প্ৰকাশ কৰে যে বালাজীৰ পদমৰ্যাদাই তেওঁক সাক্ষীক প্ৰভাৱিত কৰিবলৈ সক্ষম কৰিব পাৰে।
একেদৰে ৰাজহুৱা অনুষ্ঠানত কৰা মন্তব্যক লৈ ধাৰাবাহিক সমালোচনাৰ পিছত কে পনমুডীক অপসাৰণ কৰা হৈছে য’ত তেওঁ শৈৱ আৰু বৈষ্ণৱ ধৰ্মক সমালোচনা কৰিবলৈ গৈ যৌনকৰ্মীসকলৰ প্ৰসংগ উল্লেখ কৰিছিল।
ইয়াৰ পিছতে চলিত মাহৰ আৰম্ভণিতে পনমুডীক উপ-সাধাৰণ সম্পাদকৰ পদৰ পৰা অপসাৰণ কৰা হৈছিল।
কিন্তু ধাৰাবাহিক সমালোচনাৰ সন্মুখীন হোৱাৰ পিছত তেওঁক কেবিনেটৰ পৰা অপসাৰণ কৰিবলৈ বাধ্য হয়।
২০২১ চনত মুখ্যমন্ত্ৰী এম কে ষ্টেলিনে কাৰ্যভাৰ গ্ৰহণ কৰাৰ পিছৰে পৰা তামিলনাডুৰ মন্ত্ৰীসভাত একাধিক সালসলনি ঘটিছে।
