আজি ৰাজ্যত পঞ্চায়ত নিৰ্বাচনৰ প্ৰথম পৰ্যায়ৰ ভোটগ্ৰহণ আৰম্ভ হৈছে। পুৱা ৭ বজাৰ পৰা আৰম্ভ হৈছে ভোটদান প্ৰক্ৰিয়া। বিয়লি ৪ বজালৈ চলিব ভোটগ্ৰহণ।
প্ৰথম পৰ্যায়ত পঞ্চায়ত নিৰ্বাচনৰ ভোটগ্ৰহণ অনুষ্ঠিত হ’বলগীয়া জিলা কেইখন হৈছে ক্ৰমে তিনিচুকীয়া, ডিব্ৰুগড়, চৰাইদেউ, শিৱসাগৰ, মাজুলী, যোৰহাট, গোলাঘাট, ধেমাজি, লখিমপুৰ, শোণিতপুৰ, বিশ্বনাথ, কাছাৰ, হাইলাকানন্দি আৰু শ্ৰীভূমি।
নিৰ্বাচন আয়োগে ইতিমধ্যে ঘোষণা কৰা অনুসৰি ২ আৰু ৭ মে’ত অসমৰ ২৭খন জিলাত দুটা পৰ্যায়ত পঞ্চায়ত নিৰ্বাচন অনুষ্ঠিত কৰা হ’ব ৷ ১১মেত ঘোষণা কৰা হব এই নিৰ্বাচনৰ ফলাফল ৷
আজি ২মে’ত ১৪খন আৰু ৭মেত ১৩খন জিলাৰ পঞ্চায়তৰ ২১৯২০টা গাঁও পঞ্চায়তৰ সদস্য, ২১৯২টা আঞ্চলিক পঞ্চায়তৰ সদস্য আৰু ৩৯৭টা জিলা পৰিষদৰ সদস্যৰ বাবে ভোটগ্ৰহণ অনুষ্ঠিত হ’ব ৷
এইবাৰ ২১৯২০জন নিৰ্বাচিত গাওঁ পঞ্চায়ত সদস্যৰ মাজৰ পৰা ২১৯২খন গাওঁ পঞ্চায়তৰ ২১৯২জন সভাপতি আৰু ২১৯২জন উপসভাপতি নিৰ্বাচিত হ’ব ৷ এই আসনসমূহৰ ভিতৰত মহিলাৰ বাবে সংৰক্ষিত আসনৰ সংখ্যা ১০৮৮৩ খন।
প্ৰায় ৯০.৭১লাখ পুৰুষ,৮৯.৬৫লাখ মহিলা ভোটাৰে এই নিৰ্বাচনত ভোটদান কৰিব ৷
ইতিমধ্যে জিলা পৰিষদৰ ৩৭ খন আসনত এন ডি এৰ প্ৰাৰ্থী বিনা প্ৰতিদ্বন্দিতাৰে জয়ী হৈছে। ইয়াৰে ৩৫ খনত বিজেপিৰ প্ৰাৰ্থী আৰু দুখন জিলা পৰিষদ আসনত অগপ প্ৰাৰ্থী জয়ী হৈছে। আঞ্চলিক পঞ্চায়ত পৰ্যায়ত ২৫৯ খনত বিজেপি আৰু ২৯ খনত অগপ জয়ী হৈছে। সেইদৰে, এ আই ইউ ডি এফে আঞ্চলিক পঞ্চায়তৰ এখন আসন, নিৰ্দলীয়ই ১৩ খন আৰু কংগ্ৰেছে ৯ খন আসনত বিনা প্ৰতিদ্বন্দিতাৰে জয়ী হোৱা বুলি কোৱা হৈছে।
দ্বিতীয় পৰ্যায়ত ৭ মে’ত ১৩ খন জিলাত অনুষ্ঠিত হ’ব পঞ্চায়ত নিৰ্বাচনৰ ভোটগ্ৰহণ। দ্বিতীয় পৰ্যায়ত ভোটগ্ৰহণ হ’বলগীয়া জিলা কেইখন হৈছে ক্ৰমে ধুবুৰী, দক্ষিণ শালমৰা, মানকাচৰ, গোৱালপাৰা, বঙাইগাওঁ, বৰপেটা, বজালী, নলবাৰী, কামৰূপ, কামৰূপ মহানগৰ, হোজাই, নগাওঁ, দৰং আৰু মৰিগাওঁ ।
এইবাৰ পঞ্চায়ত নিৰ্বাচনত মুঠ ভোটাৰৰ সংখ্যা ১৮০৩৬৬৮২ গৰাকী।ইয়াৰে পুৰুষ ভোটাৰৰ সংখ্যা ৯০৭১২৬৪ গৰাকী। মহিলা ভোটাৰৰ সংখ্যা ৮৯৬৫০১০ গৰাকী। আনহাতে, তৃতীয় লিংগৰ ভোটাৰৰ সংখ্যা ৪০৮ গৰাকী।
