মানুহজনৰ ছদ্মনাম ৰবি কিষাণ। সীমান্ত অঞ্চলত খেতি-বাতি কৰি দিন কটায়। আপাত দৃষ্টিত এই সহজ-সৰল মানুহজনক লৈ কোনো সন্দেহৰ প্ৰশ্নই উত্থাপন নহয়। কিন্তু এই সকলোবোৰৰ আঁৰত তেওঁ গোপনে পাকিস্তানৰ আই এছ আইলৈ তথ্য সৰবৰাহ কৰিছিল।
বৃহস্পতিবাৰে ৰাজস্থানৰ জয়ছালমেৰৰ বাসিন্দাজনক গ্ৰেপ্তাৰ কৰে চোৰাংচোৱা বিষয়াসকলে। তেওঁৰ প্ৰকৃত নাম পাঠান খান। ইতিমধ্যে তেওঁৰ বিৰুদ্ধে চৰকাৰী গোপনীয়তা আইন (২০২৩)ৰ অধীনত গোচৰ ৰুজু কৰা হৈছে।
পাঠানে ২০১৩ চনত পাকিস্তান ভ্ৰমণ কৰিছিল। তাত তেওঁ আই এছ আইৰ বিষয়াসকলৰ সৈতে সাক্ষাৎ কৰিছিল। পিছত তেওঁ দেশলৈ উভতি আহে।
কিন্তু তেওঁ গোপনে সীমান্ত অঞ্চলৰ তথ্য পাকিস্তানীক সৰবৰাহ কৰিবলৈ আৰম্ভ কৰে। ইয়াৰ বাবে তেওঁ একাধিক চিম আৰু ছ’চিয়েল মিডিয়া একাউণ্টো ব্যৱহাৰ কৰিছিল।
চোৰাংচোৱা সূত্ৰৰ মতে, তথ্য সৰবৰাহৰ বিনিময়ত তেওঁক বৃহৎ পৰিমাণৰ ধনৰ প্ৰস্তাৱ দিয়া হৈছিল। আনকি তেওঁক চোৰাংচোৱাগিৰিৰ প্ৰশিক্ষণো দিয়া হয়।
