এক নতুন গৱেষণাই প্ৰকাশ কৰিছে যে পুৰুষসকল মহিলাতকৈ তিনিটা প্ৰধান ৰোগত অধিক আক্ৰান্ত হৈছে: ডায়েবেটিছ, উচ্চ ৰক্তচাপ, আৰু এইডছ। ‘প্ল’ছ’ নামৰ চিকিৎসা আলোচনীত প্ৰকাশিত এই গৱেষণাৰ বাবে ১৩১খন দেশৰ পুৰুষ আৰু মহিলাৰ ওপৰত সমীক্ষা চলোৱা হৈছিল। গৱেষকসকলে লক্ষ্য কৰিছে যে এই তিনিটা ৰোগত পুৰুষৰ আক্ৰান্তৰ হাৰ আৰু মৃত্যুৰ হাৰ মহিলাতকৈ বেছি। এই তথ্যই পুৰুষৰ স্বাস্থ্যৰ প্ৰতি অধিক মনোযোগ দিয়াৰ প্ৰয়োজনীয়তাৰ ওপৰত আলোক্পাত কৰিছে।
গৱেষণাৰ মতে, পুৰুষৰ অস্বাস্থ্যকৰ জীৱনশৈলী এই ৰোগৰ বাবে বহুপৰিমাণে দায়ী। ধূমপান, অত্যধিক মদ্যপান, অস্বাস্থ্যকৰ খাদ্যাভ্যাস, শাৰীৰিক ব্যায়ামৰ অভাৱ, আৰু নিয়মিত স্বাস্থ্য পৰীক্ষাৰ অভাৱৰ ফলত ডায়েবেটিছত আক্ৰন্তৰ সংখ্যা বৃদ্ধি পায়। ভাৰত, বাংলাদেশ, পাকিস্তান, ইথিওপিয়া, আৰু ইকুৱেডৰৰ দৰে দেশত পুৰুষৰ ডায়েবেটিছৰ প্ৰৱণতা অধিক। ৩০ বছৰৰ পিছত এই ৰোগৰ সম্ভাৱনা বৃদ্ধি পায়, আৰু বহুতেই প্ৰি-ডায়েবেটিছৰ পৰ্যায়ত থাকে বা নিয়মিত ইনচুলিন গ্ৰহণ কৰিবলগীয়া হয়। ইয়াৰ উপৰিও, এইচ আই ভি/এইডছৰ ক্ষেত্ৰতো পুৰুষৰ আক্ৰান্তৰ সংখ্যা বেছি। অসুৰক্ষিত যৌন সম্পৰ্ক, একাধিক সংগী, আৰু সজাগতাৰ অভাৱৰ বাবে এই ৰোগৰ প্ৰাদুৰ্ভাৱ বৃদ্ধি পাইছে, বিশেষকৈ যুৱক-যুৱতীৰ মাজত।
উচ্চ ৰক্তচাপ এছিয়াৰ দেশসমূহত, বিশেষকৈ ভাৰতত, এক গুৰুতৰ সমস্যা। ৰাষ্ট্ৰীয় পৰিয়াল স্বাস্থ্য সমীক্ষাৰ তথ্য অনুসৰি, ভাৰতৰ প্ৰায় ৫০ শতাংশ পুৰুষ উচ্চ ৰক্তচাপত ভুগিছে, মহিলাৰ ক্ষেত্ৰত এই হাৰ ৩৬ শতাংশৰ ওচৰত। ২০ৰ পৰা ৩০ বছৰ বয়সৰ প্ৰতি দহজন পুৰুষৰ মাজত এজন এই সমস্যাত আক্ৰান্ত। ভাৰতীয় চিকিৎসা গৱেষণা পৰিষদৰ ২০১৯-২০২১ চনৰ সমীক্ষাত দেখা গৈছে যে চহৰ আৰু গ্ৰাম্য দুয়োটা অঞ্চলৰ পুৰুষ উচ্চ ৰক্তচাপৰ শিকাৰত ভুগিছে। এই ৰোগৰ ফলত হৃদৰোগ আৰু ষ্ট্ৰোকৰ সংখ্যাও বৃদ্ধি পাইছে। গৱেষকসকলে পৰামৰ্শ দিছে যে নিয়মিত স্বাস্থ্য পৰীক্ষা, স্বাস্থ্যকৰ জীৱনশৈলী, আৰু সজাগতাৰ জৰিয়তে এই ৰোগসমূহৰ প্ৰতিৰোধ সম্ভৱ।
