যোৱা ১ মে’, ২০২৫ৰ কথা। গুৱাহাটীস্থিত ৰয়েল গ্ল’বেল বিশ্ববিদ্যালয়ত অধ্যাপক শৰৎ মহন্ত ফাউণ্ডেশ্যনৰ এক বক্তৃতা অনুষ্ঠান।
এই অনুষ্ঠানত বিশিষ্ট বক্তা অক্ষত গুপ্তাই “Rediscovering Our Roots: The Relevance of Hindu Mythology in Modern Times” শীৰ্ষক বিষয়ত বক্তৃতা প্ৰদান কৰে। বক্তৃতা অনুষ্ঠান উদ্বোধন কৰিছিল অসমৰ ৰাজ্যপাল লক্ষ্মণ প্ৰসাদ আচাৰ্যই, আৰু আমন্ত্ৰিত অতিথিৰ মাজত দেখা গৈছিল অসমৰ অন্যতম উদ্যোগী মহিলা ৰিণিকি ভূঞা শৰ্মা আৰু অসম আৰক্ষীৰ সঞ্চালক প্ৰধান হৰমীত সিং।
উল্লেখ্য যে, শৰৎ মহন্ত ফাউণ্ডেশ্যনৰ এই বক্তৃতা অনুষ্ঠান অনুষ্ঠিত কৰে প্ৰয়াত শৰৎ মহন্তৰ দুই পুত্ৰ IPS পাৰ্থ সাৰথি মহন্ত আৰু গড়গাঁও মহাবিদ্যালয়ৰ অধ্যক্ষ সব্যসাচী মহন্ত প্ৰমূখ্যে পৰিয়ালবৰ্গই।
কিন্তু এই অনুষ্ঠানৰ মাজতে ঘটিল অঘটন, অসমৰ অন্যতম ডিজিটেল সংবাদ মাধ্যম ডিএ নিউজ প্লাছে ফেচবুকত দিয়া এটা ভিডিঅ’ত ( https://www.facebook.com/watch?v=584700197360239 ) পোৱা অনুসৰি বক্তৃতা অনুষ্ঠানটোত উপস্থিত হ’ল ‘স্বামী পৰশুৰাম’ । হাতত কুঠাৰ লৈ ৰ’য়েল গ্ল’বেল বিশ্ববিদ্যালয়ত উপস্থিত হ’ল স্বামী পৰশুৰাম, হাতত সকলোকে অস্ত্ৰ লৈ থাকিবলৈ আহ্বান জনালে স্বামী পৰশুৰামে। আনকি ভিডিঅ’টোত দেখা গৈছে যে গুৱাহাটীৰ আৰক্ষী আয়ুক্ত পাৰ্থ সাৰথি মহন্তৰ উপস্থিতিত স্বামী পৰশুৰামে অসমৰ মুখ্যমন্ত্ৰীক ৰাজ্যৰ সমূহ হিতাধিকাৰীক বিনামূলীয়া ৰেচন বা সা-সুবিধাৰ পৰিৱৰ্তে মাৰণাস্ত্ৰ দিবলৈ পৰামৰ্শ দিয়ে, আনকি স্বামী পৰশুৰামে স্কুল-কলেজত অধ্যয়নৰত সনাতনী হিন্দু শিক্ষাৰ্থী অস্ত্ৰ চালনা প্ৰশিক্ষণৰ পৰামৰ্শ দিয়ে।
এতিয়া প্ৰশ্ন হয়, যিটো সময়ত ভাৰতবিৰোধী মন্তব্য কৰা বাবে পহলগাম আক্ৰমণৰ পাছত কালিলৈকে ৪২ জন লোকক হিমন্ত বিশ্ব শৰ্মাৰ আৰক্ষীয়ে গ্ৰেপ্তাৰ কৰিছে ঠিক তেনে এটা প্ৰেক্ষাপটত এজন জ্যেষ্ঠ আৰক্ষী বিষয়াৰ সন্মুখত ‘বধ’ কৰাৰ উদ্দেশ্যৰে চৰকাৰী পৃষ্ঠপোষকতাত মাৰণাস্ত্ৰ বিতৰণ আৰু প্ৰশিক্ষণৰ কথা কোৱাৰ পাছতো কিয় একো পদক্ষেপ লোৱা নহ’ল তাক লৈ সচেতন অসমীয়াসকলৰ পাছত প্ৰশ্ন উত্থাপন হৈছে।
তদুপৰি স্বামী পৰশুৰামে, ভাৰতীয় ন্যায় সংহিতাৰ ধাৰা ১৯৬ অনুসৰি কথিত-লিখিত, আৰু ইলেক্ট্ৰনিক মাধ্যমেৰে ধৰ্ম, বৰ্ণ, ভাষা, অঞ্চল, জাতি আৰু সম্প্ৰদায়ৰ মাজত দ্বেষ প্ৰসাৰত কৰাত নিষেধাজ্ঞা আৰোপ কৰাৰ পাছতো দিয়া বক্তব্যৰ বাবে কিয় আইপিএছ বিষয়াজনে নিজাববীয়া একো পদক্ষেপ গ্ৰহণ নকৰিলে তাক লৈয়ো প্ৰশ্ন উত্থাপন হৈছে।
