শান্ত হৈ থকা নাই ইজৰাইল। পুনৰ গাজাত আক্ৰমণ কৰিছে ইজৰাইলে। গাজাৰ খান ইউনিছৰ এখন ইউৰোপীয় চিকিৎসালয়ত ইজৰাইলৰ বিমান আক্ৰমণত এতিয়ালৈকে ৫১ গৰাকী লোক নিহত খোৱা বুলি খবৰ পোৱা গৈছে।
হামাছে পৰিচালনা কৰা অসামৰিক প্ৰতিৰক্ষা সংস্থাৰ এগৰাকী মুখপাত্ৰই এই কথা সদৰী কৰিছে।
স্থানীয় সূত্ৰৰ মতে, ইজৰাইলৰ যুদ্ধ বিমানে গাজাৰ এই চিকিৎসালয়খনৰ ওপৰত একেলগে ছটা বোমা নিক্ষেপ কৰিছিল, এই বোমা চিকিৎসালয়খনৰ চোতাল আৰু ইয়াৰ আশে-পাশে থকা অঞ্চলত পৰিছিল।
ইজৰাইলৰ সেনাই কয় যে তেওঁলোকে এটা কমাণ্ড এণ্ড কণ্ট্ৰ’ল চেণ্টাৰত আক্ৰমণ চলাইছে। ইজৰাইলে দাবী কৰিছে যে এই কেন্দ্ৰটো চিকিৎসালয়খনৰ তলত আছিল।
জানিব পৰা মতে, এই আক্ৰমণত বিবিচিৰ এজন ফ্ৰীলান্স সাংবাদিকো আহত হয়। অৱশ্যে চিকিৎসাৰ অন্তত এতিয়া তেওঁৰ অৱস্থা সুস্থিৰ বুলি কোৱা হৈছে।
উল্লেখ্য যে ২০২৩ চনৰ ৭ অক্টোবৰৰ পৰা আৰম্ভ হোৱা ইজৰাইল আৰু হামাছৰ মাজত এই সংঘাতত এতিয়ালৈকে গাজাত ৫০ হাজাৰতকৈ অধিক লোকৰ মৃত্যু হৈছে।
